Rum 11

₁Awit kuwi aku takon: Apa kira-kira Gusti Allah wis nampik umaté? Babar pisan ora! Awit aku déwé ya wong Israèl turunané Abraham, sangka taleré Bényamin. ₂Gusti Allah ora nampik umaté sing dipilih wiwit mbiyèn. Apa kowé pada ora mangertèni, apa sing wis diomongké ing Kitab bab Elia, nalika nggugat Israèl ing ngarepé Gusti Allah, ₃“Duh Gusti, para nabi Panjenengan wis pada dipatèni, mesbèh Panjenengan wis diambruké, mung kula déwé sing ijik urip, nanging wong-wong kuwi pada kepéngin matèni kula.” ₄Nanging kepriyé tembungé Gusti Allah marang Elia mau? Ngéné: “Aku ijik ngèngèhké wong 7000 kanggo Aku, sing ora tau sujut nyembah marang Baal.” ₅Mengkono uga ing waktu saiki, ya ana turahan sak rombongan miturut pilihané karo dasar kawelasan. ₆Yèn bab kuwi kedadiané awit sangka kawelasan-Né, dadiné ora sangka penggawé menèh, yèn ora mengkono, sing dijenengké kawelasan kuwi duduk kawelasan menèh. ₇Dadiné kepriyé? Israèl ora bisa nggayuh apa sing digolèki, nanging para wong sing dipilih kuwi bisa pada olèh. Nanging liyané, atiné wis pada diwangkotaké,

₁₁Awit kuwi aku takon: Apa wong mau enggoné pada kesandung kuwi supaya tiba? Babar pisan ora! Nanging sangka paneraké, keslametan terus tekan marang bangsa-bangsa kapir, supaya pada mèri. ₁₂Awit yèn panerak mau tegesé kasugihan kanggo jagat, lan gagalé dadi kesugihané bangsa kapir, luwih-luwih menèh kasampurnané.

₁₃Aku ngomong marang kowé, hé para bangsa sing sangka bangsa kapir. Ya awit aku iki dadi rasulé para bangsa sing duduk bangsa Ju, aku nganggep yèn bab iki dadi kamulyané enggonku ngladèni, ₁₄ya kuwi mbok menawa aku bisa nukulké rasa mèri ing sak njeruhné atiné para sedulurku tunggal bangsa miturut daging, lan bisa nylametké marang sak untara wong tunggalé wong-wong kuwi. ₁₅Awit yèn nampiké kuwi tegesé rukunan kanggo jagat, nampané wong-wong kuwi apa pada nduwèni tegesé liyané kejaba urip sangka antarané wong mati? ₁₆Yèn jladrèn sing sepisanan kuwi sutyi, dadiné jladrèné kabèh uga sutyi, lan yèn oyoté sutyi, pangé uga sutyi. ₁₇Mulané, yèn pangé wis ana sak bagéan sing diketoki, lan kowé sing dadi tukulan alasan wis dityangkokké kanggo gantiné, banjur mèlu olèh bagéan sangka oyoté wit saitun sing kebak tlutuh kuwi, ₁₈kowé aja pada gemunggung marang kabèh pang kuwi! Yèn kowé pada gemunggung, pada élinga, yèn duduk kowé sing nyangga oyoté, nanging oyoté kuwi sing nyangga kowé. ₁₉Bisa uga kowé bakal omong: Ana pangé sing pada diketoki, kuwi supaya aku dityangkokké. ₂₀Ya bener! Enggoné pada diketoki kuwi, awit sangka enggoné ora pertyaya, lan kowé bisa jejek kuwi mung awit pertyaya. Kowé aja umuk, nanging malah wedia! ₂₁Awit, yèn Gusti Allah ora ngéman marang kabèh pang sing asli, Panjenengané ora bakal ngéman marang kowé uga. ₂₂Mulané delengen kawelasané Gusti Allah, nanging uga penggawéané sing abot, ya kuwi penggawéané sing abot kanggo wong sing wis pada tiba, nanging kawelasané kanggo kowé, semono kuwi yèn kowé tetep ing kawelasané, yèn ora, kowé ya bakal pada diketok uga. ₂₃Nanging pangé sing wis pada diketok mau uga bakal dityangkokké, yèn ora wangkot enggoné ora pertyaya, jalaran Gusti Allah nduwé pangwasa nyangkokké kuwi menèh. ₂₄Awit yèn kowé sing dadi pangé wit saitun alas wis pada diketok, lan béda karo kahananmu kuwi, kowé wis pada dityangkokké ing wit saitun sejati, luwih-luwih menèh kabèh pang sing asli, mesti bakal dityangkokké ing wit saitun asliné déwé.

₂₅Para sedulur, supaya kowé aja pada rumangsa pinter, karepku kowé pada ngertènana perkara iki: Wong Israèl kuwi sak pérangan pada mangkotké atiné, nganti tekan genepé tyatyahé wong-wong sangka bangsa-bangsa kapir sing nemoni marang Gusti Allah. ₂₆Karo tyara sing mengkono, wong Israèl bakal dislametké kabèh, kaya sing ketulis, tembungé:

₃₃Wah, tenan gedéné kasugihan, kawityaksanan lan putusané Gusti Allah! Tenan putusan-Né ora kena dijajaki, lan dalan-Né ora kena ditlusuri.