Rum 16

₁Aku njaluk wigatimu kanggo Fébé, sedulur wadon tunggal pertyaya sing dadi diaken ing pasamuan Kèngkréa, ₂supaya kok tampani ing njeruhné Gusti, karo tyara sing sak mestiné marang para sutyi, lan wènèhana, pitulungan yèn dibutuhké. Awit wong kuwi wis ngekèki pitulungan marang wong okèh, klebu aku déwé.

₃Salam keslametan marang Priska lan Akwila, kantya-kantyaku sak penggawéan ing Kristus Yésus. ₄Wong-wong mau wis pada ngetohké nyawané kanggo uripku. Ora mung aku waé sing ngekèki pamuji, nanging ya sak kabèhé pasamuan wong kapir.

₅Salam keslametan marang pasamuan sing ana omahé.

Salam keslametan marang Epénétus, sedulur tunggal pertyaya sing tak trésnani, sing dadi woh sing sepisanan sangka bawah Asia Tyilik kanggo Kristus.

₆Salam keslametan marang Maria, sing wis nyambutgawé tanpa ngitung kesel kanggo kowé kabèh.

₇Salam keslametan marang Andronikus lan Yunias, sedulurku tunggal bangsa, sing wis tau diukum bareng aku, sing pada kajèn ing antarané para rasul, lan sing enggoné dadi kristen sak durungé aku.

₈Salam keslametan marang Ampliatus sing tak trésnani ing Gusti.

₉Salam keslametan marang Urbanus kantyaku sak penggawéan ing Kristus, lan salam keslametan marang Stakis, sing tak trésnani.

₁₀Salam keslametan marang Apèlès, sing wis ketitik tahan uji ing Kristus. Salam keslametan marang wong sing pada klebu brayaté Aristobulus.

₁₁Salam keslametan marang Hérodion, kantyaku tunggal bangsa. Salam keslametan marang wong sing pada klebu brayaté Narkisus, ing njeruhné Gusti.

₁₂Salam keslametan marang Triféna lan Trifosa, sing pada mempeng banget enggoné ngladèni kanggo Gusti.

Salam keslametan marang Persis, sing tak trésnani, sing wis ngupaya sak kuwaté karo mempeng kanggo Gusti.

₁₃Salam keslametan marang Rufus, wong sing dipilih ing Gusti, lan salam keslametan marang ibuné sing kanggo aku uga dadi ibuku.

₁₄Salam keslametan marang Asinkritus, Flégon, Hèrmes, Patrobas, Hèrmes lan para sedulur tunggal pertyaya sing pada dadi siji karo sedulur-sedulur.

₁₅Salam keslametan marang Filologus lan Yulia, Néréus lan seduluré wadon, lan Olimpas, uga sak kabèhé para sutyi sing pada dadi siji karo sedulur-sedulur mau. ₁₆Pada salamana karo ambungan sing sutyi.

Salam keslametan marang kowé kabèh sangka sak kabèhé pasamuané Kristus.

₁₇Nanging kowé pada tak pituturi, para sedulur, pada sing ati-ati marang para wong sing nyebar tukaran, nggawé sandungan, angèl karo piwulang sing wis kok tampa. Singkirana wong-wong kuwi. ₁₈Awit wong-wong sing kaya mengkono kuwi, pada ora ngladèni marang Kristus, Gusti kita, nanging pada ngabdi marang wetengé déwé. Lan karo tetembungan sing muluk-muluk lan basané sing alus, pada ngapusi marang wong-wong sing tulus atiné. ₁₉Kabar bab kasetianmu wis dirungokké wong okèh. Mulané aku bungah banget kanggo kowé. Nanging karepku, kowé pada wityaksanaa kanggo apa waé sing betyik lan resik sangka sak rupané sing ala. ₂₀Gusti Allah, sing dadi sumberé katentreman, bakal gelis nglebur sétan ing sak ngisoré tlapakané sikilmu. Kawelasané Yésus, Gusti kita, nunggal ing kowé kabèh.

₂₁Salam keslametan marang kowé kabèh sangka Timotius, kantyaku sak penggawéan, lan sangka Lukius, Yason uga Sosipater, kantya-kantyaku tunggal bangsa.

₂₂Kula Tèrtius sing nulis layang iki, ya kirim salam keslametan marang sampéyan kabèh ing tunggal Gusti.

₂₃Salam keslametan marang kowé kabèh sangka Gayus, sing ngekèki panginepan marang aku, lan marang pasamuan kabèh.

Salam keslametan marang kowé kabèh sangka Erastus, juru nata bandané negara, lan sangka Kwartus sedulur kita tunggal pertyaya.

[ ₂₄Kawelasané Yésus Kristus, Gusti kita, nunggal ing kowé kabèh! Amin.]

₂₅Kanggo Panjenengané, sing kwasa nguwatké kowé kabèh, miturut Injil sing tak wartakké lan kabar bab Yésus Kristus, tyotyok karo kebukaké wahyu sing disimpen pirang-pirang abad suwéné, ₂₆nanging sing saiki wis kebukak, lan wis diwartakké karo kitab-kitabé para nabi, miturut tembungé Gusti Allah sing langgeng marang sak kabèhé bangsa, kanggo nuntun ing mbangun turuté pertyaya ₂₇kanggo Gusti Allah, ya mung Panjenengané piyambak sing kebak kawityaksanan, awit sangka Yésus Kristus: sak kabèhé kamulyan langgeng ing sak lawas-lawasé! Amin.