1 Korintus 1

₁Sangka Paulus, sing dipanggil dadi rasulé Kristus Yésus, awit sangka karepé Gusti Allah, lan sangka Sosténes, sedulur kita tunggal pertyaya. ₂Marang pasamuané Gusti Allah ing Korintus, ya kuwi para sing disutyèkké ing Kristus Yésus, lan sing pada dityeluk dadi wong sutyi, uga sak kabèhé wong sing pada nyebut asmané Gusti kita Yésus Kristus, ya kuwi Gustiné wong-wong mau lan ya Gusti kita.

₃Kawelasan lan katentreman sangka Gusti Allah, Bapak kita, lan sangka Gusti Yésus Kristus, anaa ing kowé kabèh.

₄Aku tansah maturkesuwun marang Gusti Allahku awit kowé kabèh, jalaran sangka kawelasané Gusti Allah sing dikèkké marang kowé ing Kristus Yésus. ₅Awit ing Panjenengané, kowé wis pada dadi sugih ing samubarang, ya sak rupané tetembungan lan kabèh kaweruh, ₆tyotyok karo paseksi bab Kristus, sing wis disantosakké ing tengahmu. ₇Terus kowé pada ora kekurangan ing bab kabèh berkah, sak njeruhné kowé pada ngentèn-entèni ngétokké Gusti kita Yésus Kristus. ₈Panjenengané ya bakal nyantosakké kowé nganti tekan ing pungkasan, nganti kowé pada tanpa tyiri mbésuk ing dinané Gusti kita Yésus Kristus. ₉Gusti Allah, sing wis manggil kowé marang kumpulan karo Putrané Yésus Kristus, Gusti kita, kuwi setia tuhu.

₁₀Nanging penjalukku karo temen marang kowé kabèh, para sedulur, awit sangka asmané Gusti kita Yésus Kristus, kowé kabèh padaa dadi siji lan aja nganti tukaran ing tengahmu; nanging kowé padaa bebarengan, tunggal pikiran lan tunggal pangrasa. ₁₁Awit, para sedulurku, aku wis dikabari karo wong-wong sangka brayaté Kloé bab kowé kabèh, yèn ing tengahmu ana tukaran. ₁₂Sing tak karepké ya kuwi siji-sijiné tunggalmu ngomong: Aku iki golongané Paulus! Aku golongané Apolos! Aku golongané Kéfas! Utawa aku golongané Kristus! ₁₃Apa Kristus kuwi dibagi-bagi? Apa Paulus kuwi dipentèng awit sangka kowé? Utawa apa kowé pada dibaptis ing jenengé Paulus? ₁₄Aku maturkesuwun awit siji waé sangka tengahmu ora ana sing tak baptis kejaba Krispus lan Gayus, ₁₅terus ora ana wong sing bisa ngomong yèn kowé pada dibaptis ing jenengku. ₁₆Aku ya mbaptis brayaté Stéfanas. Kejaba kuwi aku ora kèlingan, apa ijik ana wong liyané menèh sing tak baptis. ₁₇Awit Kristus enggoné ngutus aku kuwi ora supaya mbaptis, nanging supaya ngabaraké Injil, lan bab kuwi ora nganggo kawityaksanané tembung, supaya salipé Kristus aja nganti tanpa guna.

₁₈Awit kabar bab salip kuwi pantyèn dianggep bodo kanggo wong sing bakal pada mati, nanging kanggo kita sing pada dislametké, kabar kuwi kekuwatané Gusti Allah.

₂₀Ing ngendi wong sing wityaksana? Ing ngendi juru Torèt? Ing ngendi tukang mbantah ing jaman iki? Gusti Allah apa ora wis ndadèkké kawityaksanané jagat iki dadi bodo? ₂₁Awit sak njeruhné kawityaksanané Gusti Allah jagat ora kenal marang Panjenengané karo kawityaksanané, mulané wis dadi karepé Gusti Allah nylametaké marang wong sing pada pertyaya awit sangka kabar Injil sing dianggep bodo. ₂₂Wong Ju pada ngupaya tanda, lan wong Yunani pada nggolèki kawityaksanan, ₂₃nanging aku pada ngabaraké Kristus sing dipentèng: Kanggo wong Ju dadi sandungan lan kanggo wong kapir dianggep bodo, ₂₄nanging kanggo para sing dipanggil, embuh wong Ju, embuh wong sing duduk Ju, Kristus kuwi dadi kekuwatané Gusti Allah lan kawityaksanané Gusti Allah. ₂₅Awit apa sing dianggep bodoné Gusti Allah kuwi luwih wityaksana tenimbang karo manungsa, lan keringkihané Gusti Allah kuwi luwih rosa tenimbang manungsa. ₂₆Pada ngélingana waé, para sedulur, kepriyé kahananmu nalikané kowé pada dipanggil, miturut ukurané manungsa ora okèh sing klebu wong wityaksana, ora okèh wong sing klebu gedé wibawané, ora okèh sing klebu wong luhur. ₂₇Nanging sing dianggep bodo kanggo jagat, dipilih karo Gusti Allah kanggo ngisinké para wong wityaksana, uga sing dianggep ringkih kanggo jagat, dipilih karo Gusti Allah kanggo ngisinké sing rosa, ₂₈lan sing asor lan ala kanggo jagat, kuwi dipilih karo Gusti Allah, malah sing ora ana ajiné dipilih karo Gusti Allah kanggo ngilangké sing aji, ₂₉supaya aja ana manungsa siji waé sing gemunggung ing ngarepé Gusti Allah. ₃₀Nanging awit sangka Panjenengané, kowé wis pada ing Kristus Yésus sing sangka Gusti Allah wis dadi kawityaksanan kanggo kita. Panjenengané wis mbenerké, nyutyèkké lan nebus kita, ₃₁mulané kaya sing ketulis, tembungé: “Sapa sing gemunggung, kuwi gemunggunga ing Gusti.”