Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
1 Kownu 5
1Kownu Hiram fu Tirus nanga David ben de bun mati te leki David dede. Dat' meki di Hiram yere tak' den salfu Salomo leki kownu èn taki a teki a presi fu en p'pa, a seni boskopuman go na Salomo. 2Dan Salomo seni a boskopu disi gi Hiram: 3“Yu sabi tak' mi p'pa David no ben man meki wan oso gi MASRA, a Gado fu en, pe sma ben kan anbegi En. Bika fu ala sei feti ben e miti en, te leki MASRA ben meki a wini ala den feyanti fu en. 4Ma now MASRA, a Gado fu mi, meki tak' no wan dyugudyugu no de ini a kondre. No wan feyanti de di wani feti nanga wi, no wan ogri no de fu miti wi. 5Dat' meki mi wani meki a oso gi MASRA, a Gado fu mi, pe sma kan anbegi En, soleki fa MASRA ben pramisi mi p'pa David. Gado ben taigi en taki: ‘Na a manpikin fu yu, di Mi sa poti ini yu presi tapu a kownusturu, sa meki a oso gi mi, pe den kan anbegi mi.’ 6Dat' meki mi e aksi yu fu yu meki den knekti fu yu go na a Libanonbergi go koti sedrebon gi mi. Den knekti fu mi sa yepi den di fu yu. Omeni yu wani tak' den wrokoman fu yu mus kisi, na dati mi o gi yu. Bika yu sabi tak' wi no abi sma di kan fala bon so bun leki den man fu Sidon.”
7Di Hiram yere san Salomo seni aksi en, a ben breiti srefsrefi. A taki: “Prijse MASRA, di gi David wan koni manpikin fu tiri a bigi folku disi.” 8Dan Hiram seni piki Salomo taki: “Mi kisi a boskopu fu yu. Mi sa gi yu someni sedre-udu nanga sipres-udu leki yu wani. 9Den knekti fu mi sa tyari den fu a Libanonbergi go na se. Mi sa sorgu tak' den tai den na wan èn tyari den abra a se go poti pe yu wani den. Drape den sa lusu den, dan yu kan kon teki den. Leki pai mi sa wani tak' yu sorgu fu nyanyan gi a kownu-oso fu mi.”
10Dan so Hiram ben e tyari sedre-udu nanga sipres-udu gi Salomo, someni leki a ben abi fanowdu. 11Salomo fu en sei, ben e gi Hiram ala yari sowan tutenti dusun saka tarwe nanga sowan fo dusun nanga fo hondro liter fini oleif-oli. 12MASRA ben gi Salomo koni, neleki fa a ben pramisi en. Salomo nanga Hiram ben e libi ini freide nanga makandra èn den ben meki wan ferbontu.
13Dan kownu Salomo seni teki mansma fu ala sei fu Israel. A ben ferplekti den fu wroko fu soso gi en. A ben teki wan grupu fu dritenti dusun wrokoman. 14A prati a grupu dati na ini dri grupu fu tin dusun man èn ala mun a ben e seni wan grupu go na a Libanonbergi. So den grupu ben e kenki, wan mun na a bergi, tu mun na oso. Adoniram ben de edeman fu den wrokoman disi di ben mus wroko fu soso. 15Moro fara Salomo ben abi aititenti dusun man di ben e kapu ston puru na den bergi nanga seibitenti dusun man di ben e syow den ston dati tyari gwe. 16Boiti dati a ben abi dri dusun nanga dri hondro fesiman di ben e luku den wrokoman. 17Kownu ben komanderi taki den man ben mus kapu bigi pisi fu a moro bun ston. Dan den ben mus wroko den so wan fasi fu den ben kan poti den leki fundamenti fu a oso. 18Den wrokoman fu Salomo, den di fu Hiram nanga den wrokoman di ben kmoto fu Gebal, ben e wroko a udu nanga a ston tapu sowan fasi taki den ben kan fiti wantron na a oso.
