Salomo e bigin nanga a bow fu a tempel
1Salomo bigin meki a oso fu MASRA fo yari baka di a tron kownu. Dati ben de fo hondro nanga aititenti yari baka di den sma fu Israel kmoto na Egipte. A bigin bow en ini a mun Siw, a di fu tu mun fu a yari.
2A oso di kownu Salomo ben e meki gi MASRA, ben langa dritenti meter, a ben bradi tin meter èn a ben hei tin-na-feifi meter. 3Na fes'sei fu a oso, fesi a bigi kamra wan gadri ben de, di ben langa tin meter leki fa a oso ben bradi èn a ben langa feifi meter go inisei. 4Dan a meki fensre nanga smara udu lati na den fesi gi a oso. 5Moro fara a bow ete wan pisi lontu a heri ososkin, lontu a bigi kamra nanga a baka kamra. A pisi dati ben abi difrenti pisi tapu makandra. 6A ondrosei pisi ben bradi tu nanga afu meter, a mindri pisi dri meter, nanga a tap'sei pisi dri nanga afu meter. A meki den bow en so taki a wan pisi ben bradi moro a trawan fu di a no ben wani taki den postu di ben e hori den ben mus fasi na a ososkin. 7Di a oso ben e meki, no wan babari fu ambra, noso tra isri wrokosani ben de fu yere. Bika a ben e meki soso nanga ston di ben marki èn koti na fesi kba pe den ben kapu den puru. 8A doro fu a ondrosei pisi ben de na let'sei fu a oso. A mindri pisi ben abi wan trapu-olo. Bika nanga trapu yu ben e go na a mindri pisi nanga a tap'sei pisi. 9Di a kba meki a skin fu a oso, a poti wan daki fu sedre-udu postu nanga sedre-udu planga na en tapu. 10Iniwan fu den pisi di a meki lontu a skin fu a oso ben hei sowan tu nanga afu meter, èn den ben fasi na a ososkin nanga sedre-udu postu.
11Dan MASRA taigi Salomo taki: 12“Efu yu du den sani di yu mus tan du, efu yu hori yusrefi na den sani na san yu mus tan hori yusrefi èn efu yu hori yu na ala den gebod fu Mi, Mi o du gi yu san Mi ben pramisi yu p'pa David: 13Taki Mi sa libi na mindri fu den Israelitisma èn Mi no sa gwe libi Mi pipel Israel.”
14Di Salomo kba meki a oso, 15a tapu a heri inisei fu en, fu gron go te na loktu, nanga sedre-udu planga. Tapu a gron a poti planga fu sipres-udu. 16Dan a marki tin meter kmoto fu a ososkin na bakasei kon na inisei, dan a skotu a pisi dati nanga sedre-udu planga, fu gron go te na loktu. A pisi dati tron a baka kamra: a moro santa presi. 17A tutenti meter di ben libi fesi a moro santa presi, tron a bigi kamra. 18A ososkin ben tapu na inisei nanga sedre-udu planga èn bigi lontu froktu nanga bromki ben tyerfi na den tapu. Alasei ben tapu nanga sedre-udu. No wan ston ben de fu si moro.
19Dan Salomo meki den seti a baka kamra fu a oso, fu ben kan poti a santa kisi fu a ferbontu fu MASRA drape. 20A baka kamra ben langa tin meter, a ben bradi tin meter èn a ben hei tin meter. Dan a meki den poti lala gowtu na a heri inisei fu a kamra. Srefi a sedre-udu altari fesi a kamra dati a meki den tapu nanga gowtu. 21Baka dati Salomo meki den tapu a heri inisei fu a oso nanga lala gowtu. Dan a meki den span gowtu keti poti fesi a baka kamra. 22Iya, a meki den tapu a heri inisei fu a oso nanga gowtu. Srefi a heri altari fu a baka kamra a meki den tapu nanga gowtu.
23A meki den meki tu kerub fu oleif-udu gi a baka kamra. Den kerub ben hei feifi meter. 24Ini wan fu den frei fu den ben langa tu nanga afu meter. Fu a bigin fu a wan frei go miti a bigin fu a tra frei ben de feifi meter. 25Den frei fu a tra kerub ben langa a srefi tu: feifi meter, fu a bigin fu a wan frei go miti a bigin fu a tra frei. Ala tu kerub ben bigi a srefi èn den ben meki a srefi fasi tu. 26Ala tu ben hei feifi meter. 27Dan a meki den poti den kerub so wan fasi ini a baka kamra, tak' fu ibri kerub wan frei ben e miti nanga den planga fu a ososkin èn a tra frei ben e miti nanga di fu a tra kerub leti na mindri fu a kamra. 28A meki den tapu den kerub nanga gowtu tu.
29Na a heri skin fu a oso na inisei, ini a baka kamra nanga ini a bigi kamra, a meki den tyerfi kerub, palmbon nanga bromki. 30Salomo meki den poti gowtu tu tapu a gron fu a oso, sobun, tapu a gron fu a baka kamra nanga tapu di fu a bigi kamra. 31A meki den meki doro fu oleif-udu gi a baka kamra. Den postu fu a doro-olo ben abi feifi uku. 32Tapu den tu pisi fu a doro di ben meki fu oleif-udu, a meki den tyerfi kerub, palmbon nanga bromki. Baka dati a meki den tapu den kerub nanga den palmbon nanga gowtu. 33Den postu fu a doro-olo fu a bigi kamra ben meki fu oleif-udu tu, ma den postu dati ben abi fo uku. 34A doro fu a bigi kamra ben meki fu sipres-udu èn a ben abi tu pisi. Iniwan fu den tu pisi dati ben prati baka na tu èn ibri pisi ben e drai. 35Dan a meki den tyerfi kerub, palmbon nanga bromki poti tapu den doro èn a meki den tapu ala sani nanga moi fini gowtu 36A meki den skotu a inisei pren tu. Den hari dri rij ston di ben marki èn koti na fesi, nanga wan rij sedre-udu postu na den tapu.
37Fo yari baka di Salomo tron kownu, ini a mun Siw, den bigin meki a fundamenti fu a oso fu MASRA. 38Ini a di fu erfu yari, ini a di fu aiti mun, a mun Bul, a heri oso ben kba, soleki fa a ben wani meki en. Salomo ben abi seibi yari fanowdu fu bow a oso.
