Salomo e meki en kownu-oso
1A teki Salomo tin-na-dri yari fu meki a kownu-oso fu en. Dati na a ten di a ben abi fanowdu fu meki en te leki a ben kba. 2A kownu-oso: Busi fu Libanon, ben langa feifitenti meter, a ben bradi tutenti-na-feifi meter, èn a ben hei tin-na-feifi meter. Na ala den fo sei den poti fo rij bigi sedre-udu postu nanga tra sedre-udu postu di ben didon na den tapu. 3Dan den tapu en nanga wan plata sedre-udu daki di ben rostu tapu den postu. Fotenti-na-feifi bigi postu, dri rij fu tin-na-feifi, ben kraka den postu fu a daki. 4Na a wan sei fu a oso yu ben abi dri rij fensre tapu makandra. Den ben tnapu abra dri tra rij fensre na a tra sei fu a kamra. 5Den postu fu den doro nanga den fensre ben abi fo uku, èn a wan fensre ben de wan meter fu a trawan. 6Dan a meki wan gadri di ben langa tutenti-na-feifi meter èn di ben bradi tin-na-feifi meter nanga bigi sedre-udu postu, ala tu sei fu en. Fesi a gadri a meki wan sortu tenti fu bigi postu nanga wan daki. 7A meki wan bigi kamra tu pe en leki kownu ben o sidon. Ini a kamra dati a ben o koti krutu tu. Dan a poti sedre-udu na a skin fu a heri kamra dati, fu gron go na loktu. 8A oso pe Salomo srefi ben o libi ben de baka a kamra dati tapu wan tra pisi fu a dyari, èn a ben meki a srefi fasi leki a kamra. A oso di a meki gi en wefi, a umapikin fu Farao, ben meki a srefi fasi tu leki a kamra. 9Ala den oso di meki tapu a dyari drape, fu fes'sei go na bakasei, ben meki nanga a moro bun ston, fu den fundamenti te kon miti den daki. Den bigi ston dati ben marki èn den ben koti na fesi kba fu den ben kan fiti wantron. 10Den fundamenti ben meki nanga bigi pisi fu a moro bun ston tu. Sowan fu den bigi ston dati ben langa feifi meter, trawan ben langa fo meter. 11Tapu den fundamenti dati den meki a skotu fu a moro bun ston di ben marki èn koti na fesi kba, nanga sedre-udu postu na den tapu. 12A bigi pren ben skotu nanga dri rij ston di ben marki èn koti na fesi kba, nanga wan rij sedre-udu postu na den tapu. A srefi fasi a skotu fu a inisei pren fu a oso fu MASRA nanga a gadri na fes'sei ben de.
A wroko fu Hiram
13Dan kownu Salomo seni teki Hiram, wan man fu Tyrus. 14En m'ma ben de fu a lo fu Naftali ma en p'pa ben de wan man fu Tyrus di ben e meki kopro sani. Hiram ben abi furu koni, sabi nanga ferstan fu ben kan meki ala sortu sani nanga kopro. A go wroko gi kownu Salomo èn a meki ala sani di kownu ben aksi fu du.
15A meki tu bigi kopro postu, di ben hei neigi meter èn di ben bradi siksi meter. 16Dan a meki tu kopro postu-ede fu poti tapu den postu. Den ben hei tu nanga afu meter. 17Dan a meki seibi brei keti gi iniwan fu den postu-ede. Den keti ben drai èn den ben e anga lontu den postu. 18A meki tu rij granaki-apra, di a fasi na den brei keti lontu den postu-ede. 19Den postu-ede di ben de na a fes'sei gadri tapu den postu, ben hei tu meter èn den ben gersi leilibromki. 20Na loktusei fu a lontu pisi pe den brei keti ben de, tu hondro granaki-apra ben anga ini rij lontu iniwan fu den postu-ede. 21Dan Hiram poti den tu bigi postu tnapu na a fes'sei gadri fu a bigi kamra. A postu di a poti tnapu na a let'sei, a kari Yakin. A postu di a poti na a kruktusei a kari Boas. 22Di den poti den postu-ede di ben meki leki leilibromki tapu den postu, a wroko ben kon na wan kba.
23Hiram meki wan bigi kopro beki tu. A beki ben bradi feifi meter fu a wan lantyi go na a trawan, a ben dipi tu nanga afu meter èn a ben lontu tin-na-feifi meter. 24Ondro a lantyi a meki lontu froktu poti lontu a heri beki. Ibri afu meter ben abi tin froktu di ben fasi na ini tu rij na a beki skin. 25A beki ben sidon tapu twarfu kaw: dri fu den ben e luku go na noordsei, dri fu den ben e luku go na zuidsei, dri fu den ben e luku go na oostsei èn dri fu den ben e luku go na westsei. A beki ben e sidon tapu den mindribaka èn den tere fu ala den kaw ben e sori go na inisei ondro a beki. 26A beki ben deki leki fa wan libisma anu bradi. A lantyi ben meki leki a lantyi fu wan kan, leki wan leilibromki. A beki ben man teki fo hondro dusun siksitenti liter watra.
27Baka dati a meki tin kopro baki. Iniwan fu den baki ben langa tu meter, den ben bradi tu meter, èn den ben hei wan nanga afu meter. 28A baki ben meki fu kopro plaat di ben fasi na ini kopro lati. 29Tapu den plaat nanga den lati den meki lew, kaw nanga kerub. Tap'sei nanga ondrosei fu den lew nanga den kaw den ben tyerfi bromki. 30Iniwan fu den baki ben abi fo kopro wiel nanga kopro as. Na den fo uku den meki anu tapu san den beki ben o sidon. Den anu ben ankra fasi sei den bromki. 31A baki ben abi wan lontu olo di ben hei sowan seibitenti-na-feifi centimeter kon na loktu. A olo dati meki fu a beki ben kan sidon. Den meki wan lantyi na a olo èn srefi tapu a lantyi den tyerfi sani poti. A lantyi no ben lontu, ma a ben fokanti. 32Den fo wiel ben de ondrosei fu den plaat èn den forku ben fasi na a baki. Iniwan fu den ben hei seibitenti-na-feifi centimeter. 33Den wiel ben de leki di fu den fetiwagi ma moro pikin. Den forku, den spaak, den velg nanga den olo fu den as, ben meki fu kopro. 34Iniwan fu den baki ben abi fo anu, wan ini ibri uku. Den ben de wan nanga a baki. 35Tap'sei fu a baki ben abi wan lontu lantyi di ben hei sowan tutenti-na-feifi centimeter. Den anu nanga den plaat ben fasi na a lantyi dati. 36Dan Hiram tyerfi kerub, lew nanga palm tapu den plata pisi fu den anu nanga tapu den plaat. Dan a tyerfi bromki lontu den. 37Na so a meki den tin baki. Den alamala ben de fu kopro, den ben bigi a wan èn den ben meki tapu a srefi fasi. 38Dan a meki tin kopro beki, wan gi iniwan fu den baki. Den beki ben langa tu meter, fu wan lantyi go na a trawan, èn den ben kan teki wan dusun aiti hondro liter watra. 39Dan a poti feifi fu den baki na a let'sei fu a oso èn den tra feifi a poti na a kruktusei. A bigi beki a poti na a let'sei fu a oso go na a zuidoostsei.
40Moro fara Hiram meki patu, bigi spun nanga beki. Na den sani disi a ben musu meki gi kownu gi a oso fu Masra: 41den tu bigi postu, den tu postu-ede, den tu keti di a brei poti na den postu-ede. 42den fo hondro granaki-apra na den tu brei keti, tu rij granaki-apra gi iniwan fu den brei keti fu ben poti na den postu-ede, 43den tin baki, den tin beki ini den baki, 44a bigi beki, den twarfu kaw ondro a beki, 45den patu, den bigi spun nanga beki. Ala den sani disi di Hiram meki gi kownu Salomo gi a oso fu MASRA, ben de fu brenki kopro. 46Ini a kontren fu a Yordanliba mindri Sukkot nanga Saretan, kownu ben meki den kanti a kopro ini tranga kleidoti pe den ben meki marki fu den sani. 47Salomo no wegi den sani di meki. Den ben furu sote tak' den no wegi luku omeni kopro ben de fanowdu fu meki den.
48Salomo meki ala den sani tu di ben mus de ini a oso fu MASRA, soleki: a gowtu altari, a gowtu tafra gi den santa brede, 49nanga den kandelaar di ben meki nanga lala gowtu. Feifi fu den ben tnapu na a let'sei nanga feifi ben tnapu na a kruktusei fesi a baka kamra. Den gowtu bromki, den gowtu lampu nanga den tanga, 50den skarki, nefi, beki, den skotriki, den embre fu lala gowtu gi a krofaya, sosrefi den gowtu greni fu den doro fu a baka kamra, a moro santa presi fu a tempel, nanga di fu den doro fu a bigi kamra.
51Di kownu Salomo kba du ala a wroko na a oso fu MASRA, a tyari ala den sani di en p'pa David ben poti aparti gi Gado, go poti na ini. A solfru, a gowtu nanga ala den tra sani a tyari go poti ini den kamra fu a oso fu MASRA pe den gudu ben e tan.
