Seba e tyari prati kon
1Now a ben de so tak' wan takru-ati man ben drape tu. A ben nen Seba, a manpikin fu Bikri, fu a lo fu Benyamin. A bro tapu a tutu dan a taki: “Man fu Israel, wi abi noti fu du nanga David, wi abi noti fu wini na a manpikin fu Isai. Meki wi go na wi oso!” 2Dan ala den Israelitisma di ben drape drai baka gi David fu go waka baka Seba, a manpikin fu Bikri. Ma den man fu Yuda tan na den kownu. Den waka go doro nanga en fu a Yordanliba go te na Yerusalem.
3Di kownu David doro baka ini en kownu-oso na Yerusalem, a komanderi tak' den ben mus tyari den tin uma fu en di a ben libi na baka fu luku a kownu-oso, go poti na wan aparti presi fu a oso. Drape waktiman ben e hori ai na den tapu. Kownu ben e tan sorgu gi den ma a no ben e sribi moro nanga den. Den uma disi tan libi so leki uma di masra dede kba, te leki den dede.
4Baka dati kownu komanderi Amasa taki: “Kari ala den fetiman fu Yuda kon na wan. Baka dri dei yu nanga den mus de dyaso na mi!” 5Dan Amasa hari gwe fu go kari den fetiman fu Yuda kon na wan, ma a no ben doro tapu a ten di David ben gi en. 6Dat' meki David taigi Abisai taki: “Seba, a manpikin fu Bikri, kan gi un moro problema leki Absalom. Teki den srudati fu mi dan yu go na en baka fosi a doro wan fu den tranga foto pe un no o man ori ai na en tapu.” 7So den srudati fu Yoab, den Keretitiman, den Peletitiman nanga ala den dyadya fetiman hari gwe ondro a tiri fu Abisai. Den kmoto fu Yerusalem fu go baka Seba, a manpikin fu Bikri. 8Di den doro na a bigi ston ini Gibeon, den miti drape nanga Amasa. Yoab ben weri en srudati krosi. A ben abi wan leribuba lontu en bere. Na a leribuba disi wan kokro ben anga di ben fasi na en seibowtu. Ini a kokro disi a ben abi wan deigri. Di Yoab e waka go na Amasa, a deigri grati kmoto na ini a kokro. 9Dan Yoab aksi Amasa taki: “Fa a e go nanga yu, mi mati.” Di Yoab e aksi Amasa a sani dati, a grabu a barba fu Amasa ori nanga en let'anu fu ben kan bosi en. 10Ma Amasa no ben e hori ai na tapu a deigri ini a tra anu fu Yoab. Ne Yoab sutu Amasa na en bere tapu sowan fasi, tak' Amasa en inibere kon na doro. Yoab no ben abi fu sutu a di fu tu leisi bika Amasa dede wantron. Baka dati Yoab nanga en brada Abisai hari go moro fara baka Seba. 11Wan fu den srudati fu Yoab tan tnapu na a dedeskin fu Amasa, dan a taki: “Den sma di de na a sei fu Yoab nanga David, kan hari gwe nanga Yoab!” 12Amasa ben didon ini en brudu leti mindri fu a pasi. Di a srudati fu Yoab si taki ala sma ben e tan tnapu, a hari a skin fu Amasa puru fu a pasi go poti ini a wei. A tapu a dedeskin nanga wan krosi tu fu di a ben e si tak' iniwan sma di ben e psa drape ben e tan tnapu fu luku. 13Baka di a puru a dedeskin fu a pasi, ala den srudati waka moro fara nanga Yoab, fu go baka Seba.
14A pisten dati Seba ben hari psa ala den kontren fu den lo fu Israel go na Abel-Bet-Maaka. Ala den Bikritisma ben kon na wan fu waka nanga Seba. 15Dan Yoab nanga a legre fu en kon doro na Abel-Bet-Maaka èn den tapu a foto fu ala sei. Den srudati ben poti bigi ipi santi nanga ston na a skotuskin, fu ben kan kren feti nanga den man ini a foto. Den ben e diki ondrosei fu a skotu tu fu a ben kan fadon. 16Ne wan koni uma fu a foto bari gi den taki: “Un arki, un arki! Un aksi Yoab efu a kan kon dyaso, mi wani taki nanga en.” 17Di Yoab go a uma aksi en taki: “Na yu na Yoab?” Yoab piki taki: “Iya na mi.” Dan a uma taigi en taki: “Mi e begi yu fu yu arki san mi abi fu taki.” Yoab piki en taki: “Mi e arki.” 18Ne a uma taigi en taki: “Den bigisma fu unu ben abi wan sani e taki: A sma di go suku rai na Abel sa feni yepi nomonomo. 19Wi na Israelitisma di no de nanga trobi èn di de fu fertrow. Ma now yu wani figi wan prenspari foto fu Israel puru na grontapu. Fu sanede yu wan broko a foto di na fu Gado srefi?” 20Yoab piki a uma taki: “Kwet'kweti! A no de so kwet'kweti tak' mi wani broko a foto noso figi en puru na grontapu. 21A no fu dati mi kon. Ma na wan man fu den bergi fu Efraim, di nen Seba, a manpikin fu Bikri, kaka en futu gi kownu David. Efu un gi en abra na mi, mi o hari gwe libi a foto.” A uma piki Yoab taki: “Yere, wi o fringi a ede fu en abra a skotu gi yu.” 22Baka dati, a uma prati a koni rai fu en nanga ala den sma fu a foto. Dan den kapu a ede fu Seba, a manpikin fu Bikri, puru èn fringi en gi Yoab. Ne Yoab bro tapu a tutu èn den srudati hari kmoto fu a foto. Ala srudati drai go baka na den oso èn Yoab drai go baka na kownu ini Yerusalem.
Den hei wrokoman fu David
23Yoab ben de edeman fu a heri legre fu Israel. Benaya, a manpikin fu Yoyada, ben e tiri den Keretitiman nanga den Peletitiman di ben de den waktiman fu kownu. 24Adoram ben e tiri den sma di ben ferplekti fu wroko gi kownu sondro fu kisi pai. Yosafat, a manpikin fu Akilud, ben de a takiman fu kownu. 25Seya ben de sekretarsi. Sadok nanga Abyatar ben de priester. 26Ira fu a foto Yair ben de wan fu den priester fu David tu.
