2 Samuel 19

A pisten dati, ala den srudati fu Israel ben lon, iniwan fu den go baka na en oso. ₉Ini a heri kondre, na ala den difrenti lo fu Israel, a pipel ben e kenki prakseri. Den ben e taki: “Na kownu David ferlusu wi puru na ini a makti fu den feyanti fu wi. Na en ferlusu wi fu a makti fu den Filistijnsma. Now a lowe kmoto ini a kondre fu Absalom ede. ₁₀Ma Absalom di wi ben salfu leki wi kownu, dede ini a strei. We dan, no meki wi draidrai moro, ma meki wi go teki kownu David baka.” ₁₁Di kownu kisi fu yere sortu besroiti den sma fu Israel teki, a seni a boskopu disi gi priester Sadok nanga Abyatar: “Un taigi den fesiman fu Yuda taki: ‘A lo fu unu ben mus de a fosiwan di ben mus meki wroko fu en fu tyari un kownu go baka na en kownu-oso. ₁₂Bika mi nanga unu na fu a srefi lo, wi na krosbei famiri. Un ben mus de a fosi lo di ben mus meki wroko fu en fu mi ben drai kon baka.’ ₁₃Amasa un mus gi a boskopu disi: ‘Yu na wan krosbei famiri fu mi. MASRA kan gi mi wan hebi strafu efu mi no poti yu fu yu heri libi langa leki edeman fu a legre, na a presi fu Yoab.’ ” ₁₄Na so David meki tak' ala den man fu a lo fu Yuda kon tnapu leki wan man na en baka. Dan den seni boskopu gi en tak' en nanga ala den sma di ben de nanga en ben kan drai kon baka.

₁₅Ne kownu bigin teki pasi fu drai go baka. Di a doro na a Yordanliba, den sma fu Yuda ben wakti en kba na Gilgal, fu gi en odi èn fu ben yepi en abra a Yordanliba. ₁₆Simi, a manpikin fu Gera, fu a foto Bakurim ini a kontren fu a lo fu Benyamin, ben de na den mindri tu. A ben e waka es'esi fu miti nanga kownu David. ₁₇Wan dusun tra sma fu a lo fu Benyamin ben de nanga en. Siba, a man di ben e wroko fosi gi Saul nanga den sma fu en, ben de tu, makandra nanga den tin-na-feifi manpikin nanga tutenti knekti fu en. Den ben doro na a Yordanliba fosi kownu ben bigin abra. ₁₈Dan den koti a liba abra èn den yepi a famiri fu kownu fu abra. Ala san kownu ben wani den du gi en. Di kownu ben de fu koti abra, Simi, a manpikin fu Gera, trowe ensrefi na gron fesi kownu, ₁₉dan a taigi kownu taki: “Mi masra, mi e begi pardon fu a ogri di mi du. No prakseri den fowtu di mi meki a dei di masra, mi kownu, ben e gwe fu Yerusalem. Mi e begi yu fu no prakseri den moro. ₂₀Mi masra, yu knekti sabi taki a sondu. Fu dat'ede mi na a fosiwan fu ala den famiri fu Yosef di kon taki kownu odi tide.” ₂₁Ma dan Abisai, a manpikin fu Seruya, piki taki: “Simi fluku a sma di MASRA srefi salfu leki kownu. Na kiri un mus kiri en!” ₂₂Ma David piki en taki: “Fu sanede yu nanga yu brada e bemui, un manpikin fu Seruya? Un e meki leki unu na mi feyanti tide. Bika mi sabi taki tide mi tron kownu fu Israel baka, èn no wan sma no e dede tapu sowan dei.” ₂₃Dan kownu pramisi Simi nanga wan sweri tak' a no o kiri en.

₂₄Mefiboset, a granpikin fu Saul, ben hari go miti kownu David. Sensi a dei di kownu ben gwe, te leki a dei di a drai kon bun baka, Mefiboset no ben wasi en futu, a no ben koti en barba, èn a no ben weri krin krosi. ₂₅Di Mefiboset miti nanga en na Yerusalem, kownu aksi en taki: “Fu sanede yu no ben gwe nanga mi Mefiboset?” ₂₆Mefiboset piki en taki: “Masra, mi kownu, mi knekti bedrigi mi. Fu di mi malengri mi ben aksi en fu meki mi buriki klari fu mi ben kan gwe nanga yu. ₂₇Ma na lei a lei gi mi na yu, masra, mi kownu. Ma masra, mi kownu, yu de leki wan engel fu Gado, du san yu si tak' bun. ₂₈Mi heri famiri ben de ini yu makti èn yu ben kan kiri wi alamala. Ma prefu dati, yu teki mi fu nyan na yu tafra. Masra, mi kownu, mi no abi no wan leti fu aksi ete wan sani fu yu.” ₂₉Ma kownu piki Mefiboset taki: “Meki wi no taki abra a sani disi moro. Mi teki a besroiti tak' yu nanga Siba mus prati a gron.” ₃₀Ma Mefiboset piki kownu taki: “Now di yu drai kon bun baka na oso, masra mi kownu, a kan abi ala sani.”

₃₁Barsilai fu a foto Rogelim, di de ini a kontren fu Gilead, ben waka go nanga kownu na a Yordanliba fu ben koti a Yordanliba abra nanga en tu. ₃₂Barsilai ben de wan owru man fu aititenti yari kba. A ben de wan gudu man. Di kownu ben tan ini a foto Makanaim, Barsilai ben sorgu tak' kownu ben abi ala san a ben abi fanowdu. ₃₃Dan kownu taigi en taki: “Hari kon nanga mi, dan mi sa sorgu gi yu na Yerusalem.” ₃₄Ma Barsilai piki kownu taki: “Mi kownu, mi no abi langa moro fu libi, dan fu sanede mi o hari go nanga yu na Yerusalem? ₃₅Mi abi aititenti yari kba, noti no e gi mi prisiri moro. Mi no e tesi bun moro san mi e nyan, mi no e tesi bun moro san mi e dringi, èn mi no e yere a sten fu singiman nanga singi-uma so bun moro. Nono masra, mi kownu, mi ben o de leki wan hebi gi yu drape. ₃₆Yu knekti o koti a Yordanliba abra nanga yu dan mi o waka wan syatu pisi nanga yu ete. A no de fanowdu fu yu pai mi a fasi dati. ₃₇Ma gi mi primisi fu mi drai gwe baka fu mi dede na ini mi eigi foto, pe mi p'pa nanga mi m'ma beri tu. Ma luku mi boi Kimham dyaso. Meki en go nanga yu, masra mi kownu, dan yu kan du gi en san bun na ini yu ai.” ₃₈Kownu piki taki: “A bun, dan Kimham kan kon nanga mi èn mi o du gi en san yu wani. Ala san yu wani mi o du gi yu.” ₃₉Dan a heri legre koti a Yordanliba abra. Baka di kownu koti abra tu, a bosi Barsilai, a blesi en dan Barsilai drai go na en oso baka. ₄₀Baka dati kownu hari go moro fara na Gilgal èn Kimham ben go nanga en. Heri Yuda nanga afu fu den lo fu Israel ben koti abra nanga kownu.

₄₁Ma den man fu Israel go na kownu dan den aksi en taki: “Fu sanede den kondreman fu wi, den man fu Yuda, teki yu gi densrefi èn yepi yu, den ososma fu yu nanga ala den tra sma di de nanga yu, fu abra a Yordanliba?” ₄₂Ne den man fu Yuda piki den di fu Israel taki: “Bika kownu na fu a lo fu wi! Un ati no kan bron fu a sani dati. Wi no e meki kownu sorgu gi wi. A no gi wi no wan spesrutu sani tu.” ₄₃Ma den man fu Israel piki den di fu Yuda taki: “Wi abi tin tron moro furu leti tapu kownu, tapu David, dan unu! Dan fu sanede un e si wi leki noti? Na wi ben de den fosiwan tu di ben teki a besroiti fu meki wi kownu drai kon baka!” Ma den man fu Yuda ben tnapu moro tranga leki den man fu Israel.