Amos 6

₁Un mus luku bun, sma fu Sion, unu di e libi sondro fu broko un ede nanga wan sani, unu di e denki taki noti no man miti unu tapu a bergi fu Samaria. Un mus luku bun, unu, fesiman fu a moro bun folku di de, pe a folku fu Israel e kon. ₂Un hari go na Kalne go luku. Fu drape un mus go na a bigi foto Hamat, dan baka dati un mus go na a foto Gat fu den Filistijnsma. Taigi Mi efu un tranga moro den kondre nanga den kownu dati. A kondre fu den bigi moro di fu unu. ₃Un mus luku bun! Un di denki taki a ogri dei de fara ete fu kon, ma dan unsrefi e meki a ogri rigeri na un mindri. ₄Un mus luku bun! Un di didon tapu un bedi di meki fu ivoor, un di e hari lesi fu unu tapu un sribipe, unu di e nyan den moro bun pikin skapu nanga den moro fatu pikin kaw. ₅Un e singi trangatranga te un e prei tapu den harp, dan e prakseri taki un e prei moro betre moro David srefi. ₆Un e dringi win ini bigi komki èn un e wrifi den moro bun oli gi un skin. Ma un no e span srefsrefi taki den bakapikin fu Yosef o dede gwe. ₇Fu dat'ede, un sa de den fosiwan di den o tyari gwe leki srafu na tra kondre. Un o kba meki prisiri èn hari lesi.

₈MASRA fu Masra sweri na Ensrefi. Na so MASRA, a Gado fu ala sani taki: Mi skin e gro fu a heimemre fu den bakapikin fu Yakob. Mi no lobi den oso fu den kownu fu den srefsrefi. Iya, Mi o meki den tyari a foto gwe nanga ala sani di de na ini. ₉Awinsi na tin sma nomo tan abra na ini wan oso, den no sa tan na libi tu. ₁₀Te wan famiri teki a dedeskin fu go bron en, a sa aksi a sma di de ini a oso ete taki: “Wan sma de nanga yu ini a oso ete?” Dan a sma ini a oso sa piki en taki: “Nono, ma tan tiri. No kari a nen fu MASRA.” ₁₁Bika taki wawan MASRA kan taki dan ala oso, bigiwan nanga pikinwan, sa naki broko te na gron.

₁₂Asi no e lon abra bergiston. Sma no e meki kaw drai gron fu den bergi tu, fu di a lai nanga ston. Ma un dati meki taki den tru sani tron sani di e kiri sma èn taki den bun sani e abi wan bita tesi na ini sma mofo. ₁₃Un e prisiri fu di un wini a feti nanga a foto Lo Debar èn un e taki tak' nanga un eigi krakti un teki Karnaim abra. ₁₄Fu tru, na so MASRA, a Gado fu ala sani taki: Israel, arki, Mi o seni wan folku kon na un tapu, di o pina unu fu Hamat go te na a Arabakriki.