Eksodus 18

₁Yetro, a p'pa fu Moses frow, ben de priester fu Midyan. A yere ala den sani di Gado ben du gi Moses nanga a folku fu Israel. A ben yere fa MASRA ben tyari Israel kmoto fu Egipte. ₂Dan Yetro, a p'pa fu Moses frow, teki sipora, a frow fu Moses, di Moses ben go baka na en p'pa, fu go nanga en. ₃A teki den tu boi fu Sipora tu. A wan boi ben nen Gersom fu di Moses ben taki: “Mi na wan doroseisma ini wan doroseikondre.” ₄A trawan ben nen Eliyeser, fu di Moses ben taki: “A Gado fu mi p'pa yepi mi. A kibri mi fu Farao no kiri mi.” ₅Di Yetro, Sipora nanga den boi fu en doro ini a sabana pe Moses ben meki en kampu na a bergi fu Gado, Yetro seni piki Moses taki: ₆“Mi, Yetro, a p'pa fu yu frow, kon luku yu. Mi kon nanga yu frow nanga den tu boi fu en.” ₇Ne Moses waka go miti Yetro. A boigi gi en dan a bosi en. Den aksi makandra fa sani e go, dan den go ini a tenti.

₈Dan Moses ferteri Yetro ala den sani di MASRA du nanga Farao nanga den sma fu Egipte, fu yepi den Israelitisma. A ferteri en tu fu ala den problema di ben miti den na pasi nanga fa MASRA ben yepi den. ₉Yetro ben prisiri fu yere ala den bun sani di MASRA du gi Israel èn taki A ben puru den ini a makti fu den sma fu Egipte. ₁₀A taki: “Mi e blesi MASRA, di puru un ini a makti fu Farao nanga den sma fu Egipte. ₁₁Now mi sabi taki MASRA bigi moro ala tra gado. A puru a folku ini a makti fu Egipte, fu di den sma fu Egipte ben e si densrefi moro hei moro den.” ₁₂Dan Yetro srakti meti leki ofrandi èn a bron den leki ofrandi gi Gado. Aaron nanga ala den fesiman fu a folku kon sidon nyan makandra nanga a p'pa fu Moses frow, na Gado fesi.

₁₃A tra dei fu en Moses ben o koti krutu gi a folku. Fu mamanten te kon miti neti sma ben de na en. ₁₄Di Yetro si omeni sani Moses ben abi fu du gi a folku a aksi en taki: “San yu e du? Fu sanede yu wawan e koti krutu? Fu mamanten te neti sma tnapu na yu tapu!” ₁₅Moses piki Yetro taki: “Den sma e kon na mi fu yere san Gado e taki. ₁₆Te den e krutu fu wan sani, den e kon nanga a sani na mi. Dan mi e taki sortu wan fu den abi leti. Mi e leri den den sani di den mus tan du, nanga den wèt fu Gado.” ₁₇Ma Yetro piki Moses taki: “San yu e du no bun. ₁₈Un e weri unsrefi, yu nanga den sma di e kon na yu. A hebi tumsi gi yu. Yu wawan no man du en. ₁₉Arki, mi o gi yu rai èn Gado sa de nanga yu. Yu mus taki nanga Gado gi a folku èn yu mus tyari den sani abra san den krutu gi En. ₂₀Yu mus meki den ferstan den wèt fu Gado bun, nanga den sani di den mus tan du. Leri den tu fa den mus libi nanga den sani di den o abi fu du. ₂₁Baka dati yu mus suku wantu bun wrokoman mindri a folku di e lespeki Gado. Den mus de fu fertrow èn den no mus e du sani fu moni ede. Dan yu mus poti den leki edeman fu dusun sma, fu wan hondro sma, fu feifitenti sma nanga fu tin sma. ₂₂Den man disi sa koti krutu ala dei gi a folku. Den moro prenspari sani den sa tyari kon gi yu. Ma den pikinpikin trobi densrefi sa koti. Tapu so wan fasi yu no e weri yusrefi so èn den e yepi yu fu tyari a lai. ₂₃Efu yu du soleki fa Gado wani, dan yu o man tan du disi go moro fara èn a folku o firi bun te den e drai go baka na den oso.”

₂₄Moses teki a rai fu Yetro èn a du ala sani di a ben taigi en. ₂₅A piki wantu bun wrokoman ondro den sma fu Israel, dan a poti den leki edeman fu a folku: edeman fu wan dusun sma, fu wan hondro sma, fu feifitenti nanga fu tin sma. ₂₆Den man disi ben e koti krutu ala dei gi a folku. Den moro prenspari sani den ben e tyari go gi Moses. Ma den pikinpikin trobi densrefi ben e koti.

₂₇Baka dati Moses taki Yetro odi dan Yetro drai go baka na en kondre.