1“Disi na den sani na san den mus hori densrefi.
2Te yu bai wan Hebrewsrafu, a sa wroko siksi yari gi yu. Ma a di fu seibi yari a kan gwe leki wan fri sma sondro fu a pai yu wan sani. 3Efu na en wawan ben kon, a sa gwe en wawan baka. Ma efu a ben trow, a sa gwe nanga en frow. 4Efu na en basi ben gi en wan frow èn a frow disi kisi pikin gi en, dan a frow nanga den pikin e tan fu a basi. En wawan sa gwe. 5Efu na a srafu srefi taki: Mi lobi mi basi, mi frow nanga mi pikin. Mi no wani gwe leki wan fri man, 6dan en basi sa tyari en go na fesi Gado. En basi sa poti en tnapu na a doro noso a postu fu a doro, dan a boro en yesi nanga wan fini sani. Dan a srafu sa tan dini en basi so langa a e libi.
7Efu wan sma seri en umapikin leki srafu, a umapikin dati no o man gwe leki wan fri uma leki den manwan. 8Efu en basi ben bai en leki frow gi ensrefi ma en basi no wani en moro, dan a mus meki den bai en puru baka. A no abi a leti fu seri en gi doroseisma fu di a no libi nanga a uma leki fa a ben musu. 9Efu na gi en manpikin a ben bai a uma, dan a mus gi en den srefi leti di en eigi umapikin ben o abi. 10Efu a basi teki ete wan tra uma, a sa tan sorgu gi nyanyan nanga krosi fu a fosiwan. A sa tan go nanga en na bedi tu leki fa den ben gwenti. 11Efu a no hori ensrefi na den dri sani disi, dan a uma kan gwe sondro fu wan sma pai wan sani gi en.
12A sma di naki wan trawan sowan fasi taki a trawan dede, mus dede tu. 13Efu a no ben poti na en ede fu kiri a trawan, ma na Mi meki a ongoloku miti en, dan Mi sa sori yu wan presi pe a kan lowe go. 14Ma efu na sidon a sma ben sidon prakseri na fesi fa a o kisi a trawan kiri, dan un kan puru en na Mi altari srefi tyari go kiri.
15A sma di naki en m'ma noso en p'pa mus dede.
16A sma di teki wan trawan tyari gwe sondro fu a trawan wani, mus dede. A no abi trobi efu a ben seri a trawan kba noso efu den kon feni a trawan na en ete.
17A sma di fluku en m'ma noso en p'pa mus dede.
18Efu tu man meki trobi, dan a wan naki a trawan sowan fasi nanga kofu noso nanga wan ston taki a trawan no dede ma a abi fu tan na bedi fu wan pisten, 19dan a wan di naki no sa kisi strafu efu a trawan man opo waka na dorosei baka nanga en wakatiki. A sa abi fu pai soso gi den dei di a trawan ben abi fu tan na bedi nanga gi a paiman di meki fu a trawan kon betre.
20Efu wan sma naki wan mansrafu noso wan umasrafu fu en sowan fasi nanga wan tiki taki a srafu kon dede, a basi dati mus kisi strafu. 21Ma efu a srafu tan libi wan noso tu dei ete, a basi dati no sa strafu moro fu di a lasi wan sani di ben de fu en.
22Efu tu man e feti, dan wan fu den pusu wan uma nanga bere taki a uma lasi a bere, ma noti no psa moro fara nanga a uma, dan a man di pusu a uma mus pai wan butu. A man fu a uma sa taki o hei a butu mus de èn krutubakra sa luku taki a butu pai. 23Efu a uma kisi tra mankeri tu taki a dede, dan a man di pusu a uma mus dede tu. 24Efu na broko a broko a uma en ai, den mus broko en ai tu. Efu na broko a broko a tifi fu a uma, den mus broko en tifi tu. Efu na wan anu a broko fu a uma, den mus broko en anu tu. Efu na wan futu fu a uma a broko, den mus broko en futu tu. 25Efu na wan koti a gi a uma, den mus gi en wan koti tu. Efu na wan soro a gi a uma, den mus gi en wan soro tu. Efu na wan marki a gi a uma na en skin, den mus gi en wan marki na en skin tu.
26Efu wan basi naki a ai broko fu wan mansrafu noso fu wan umasrafu fu en, dan a mus libi a srafu dati meki a gwe. 27Efu na wan tifi a naki broko fu wan mansrafu noso fu wan umasrafu fu en, dan a mus libi a srafu dati meki a gwe.
28Efu wan bulu buku wan man noso wan uma sowan fasi taki a sma dede, den mus fringi ston kiri a bulu dati èn den no mus nyan a meti fu en. A basi fu a bulu no abi fu pai noti. 29Efu a bulu ben gwenti e buku sma èn den ben warskow a basi fu en kba ma a no hori ai tapu a bulu fu en, dan den sa fringi ston kiri a bulu nanga en basi efu a bulu kiri wan man noso wan uma. 30Efu na pai a mus pai wan moni fu den no kiri en, dan a sa abi fu pai ala san den taigi en fu pai, fu kan tan na libi. 31Den srefi sani di mus du te a bulu buku wan man noso wan uma den mus du tu te a buku wan manpikin noso wan umapikin. 32Ma efu a bulu buku wan mansrafu noso wan umasrafu, den mus fringi ston kiri a bulu, èn a basi fu a bulu abi fu pai dritenti pisi solfrumoni na a basi fu a srafu.
33Efu wan sma opo wan peti noso a diki wan peti sondro fu a tapu a olo èn wan kaw noso wan buriki fadon go na ini, 34a sma di abi a peti o abi fu pai a sma di abi a meti. A dede meti a kan hori.
35Efu a bulu fu wan sma buku wan tra sma bulu kiri, den tu basi sa seri a libi bulu dan den prati a moni. A dede bulu den sa prati tu. 36Efu a basi fu a bulu ben sabi taki a bulu ben gwenti e buku ma a no hori ai tapu a bulu fu en, dan a sa abi fu gi wan libi bulu baka ma a dede bulu a kan hori.
