1Efu wan sma fufuru wan kaw, wan skapu noso wan krabita, dan a srakti en noso a seri en, a o abi fu pai gi en. Gi wan kaw a o abi fu gi feifi kaw baka. Gi wan skapu noso wan krabita a o abi fu gi fo skapu noso fo krabita baka. 2Efu wan sma kisi wan fufuruman fa a e broko kon ini en oso dan a naki en kiri, a sma dati no sa kisi strafu fu di a kiri wan libisma. 3Efu na deiten a sani disi psa, dan den sa strafu a sma di kiri a fufuruman fu di a kiri wan libisma. Wan fufuruman mus pai gi ala sani di a fufuru. Efu a no abi noti, den mus seri en leki srafu fu kan pai fu den sani di a fufuru. 4Efu na wan kaw, wan buriki, wan skapu noso wan krabita a ben fufuru èn den feni a meti libilibi na en, a mus gi tu tron so furu baka.5Efu wan sma libi den kaw fu en fu nyan grasi ini en wei noso ini en droifidyari, ma den kaw nyan a grasi tapu wan tra sma dyari tu, a sma di abi den kaw mus gi a moro bun pisi fu en wei noso a moro bun pisi fu en droifidyari leki paiman baka.
6Efu wan sma leti wan faya dan a faya waka na a grangran go bron wan tra sma karu di tai poti ini bosu, noso a bron wan sma karu di ben e gro ete noso a bron a heri wei fu wan tra sma, dan a sma di leti a faya o abi fu pai fu ala sani.
7Efu wan sma gi wan trawan moni, gowtu noso solfru sani fu hori gi en dan fufuruman fufuru den sani disi ini a trawan oso, a fufuruman o abi fu pai tu tron so furu efu den grabu en. 8Efu den no feni a fufuruman, dan a sma di ben mus hori den sani sa abi fu go sweri fesi den krutubakra taki a no en fufuru den sani fu a trawan. 9Efu tu sma e meki trobi fu wan kaw, wan buriki, wan skapu noso wan krabita, wan krosi noso awinsi fu sortu tra sani, fu di wan fu den e hori nomo taki a sani na fu en, a tori fu den tu sma disi mus go na den krutubakra. A sma di den krutubakra feni taki fowtu sa abi fu pai a trawan tu tron so furu.
10Efu wan sma gi wan trawan wan buriki, wan kaw, wan skapu noso wan krabita noso awinsi sortu tra meti fu hori gi en, èn a meti kon dede, a kisi wan mankeri noso den fufuru en sondro fu wan sma si, 11dan a sma di ben mus hori a meti o abi fu sweri ini a nen fu MASRA taki a no en fufuru a meti fu a trawan. A sma di ben abi a meti o abi fu teki san a trawan sweri. A trawan no abi fu pai gi a meti. 12Ma efu na fufuru a sma di ben mus hori a meti fufuru en, dan a o abi fu pai a basi fu a meti baka. 13Efu na priti wan krasi meti priti a meti di a ben mus hori, a sa tyari a dede meti kon sori a basi dan a no abi fu pai gi a dede meti.
14A sma di leni wan meti fu wan trawan o abi fu pai gi a meti efu a meti kisi wan mankeri noso a kon dede, èn a basi fu a meti no ben drape. 15Ma efu a basi fu a meti ben drape, dan a no abi fu pai gi a meti. Efu na yuru a ben yuru a meti, dan a ben pai kba gi a meti efu wan sani ben sa psa nanga a meti.
16Efu wan man kori wan yongu uma, di noiti no sribi nanga wan man ete, nanga moi wortu fu go nanga en na bedi, a sa abi fu teki a uma leki en frow èn pai ala sani di wan man mus pai te a wan teki wan uma leki frow. 17Ma efu a p'pa fu a uma no wan kwet'kweti fu a trow nanga en umapikin, dan a abi fu pai a moni di wan man mus pai fu trow nanga wan yongu uma na ini solfru moni.
A fasi fu tyari wan kba kon na takru sondu
18Wan uma di e du tofruwroko no mus tan na libi.
19A sma di go nanga wan meti na bedi, leki fa yu e go nanga wan libisma na bedi, no kan tan na libi srefsrefi.
20A sma di tyari ofrandi gi tra gado boiti gi MASRA wawan, un mus kiri puru na un mindri.
21Un no mus libi takru nanga wan doroseisma, no pina en bika unsrefi ben de doroseisma na ini Egipte. 22Un no mus pina wan uma di masra dede kba, noso wan pikin di no abi p'pa nanga m'ma moro. 23Bika Mi sa yere efu den bari kari Mi fu di un e pina den. 24Dan Mi ati sa bron trutru èn Mi sa meki den kiri un na ini feti, meki den frow fu unu tron uma tu di no abi masra moro èn den pikin fu unu tron pikin di no abi p'pa nanga m'ma moro.
25Te yu leni wan pôtisma fu Mi folku moni, yu no sa libi nanga en leki fa den sma e du di e leni trawan moni. Yu no sa teki moro moni na tapu a moni di yu leni en. 26Efu yu teki a dyakti fu wan trawan leki panti, yu sa gi en baka fosi neti tapu. 27Bika na dati wawan a abi fu tapu en skin. Nanga san a o tapu en skin dan te a e go sribi? Mi sa yere te a e bari kari Mi fu yepi. Bika Mi abi bun fasi.
28Yu no sa afrontu Gado. Yu no sa fluku wan tiriman fu yu folku fu wan sani miti en.
29Yu no sa draidrai fu tyari a fosi graan di yu koti ini yu gron nanga den fosi droifi di yu piki leki ofrandi. Ala fosi manpikin un sa gi Mi. 30Un sa du disi tu nanga den fosi pikin fu den kaw, den skapu nanga krabita fu unu. Seibi dei den sa tan na a m'ma. Ma tapu a di fu aiti dei un sa gi Mi den. 31Un sa de sma di poti aparti gi Mi. Un no sa nyan a meti di wan krasi meti priti. Un mus trowe en gi dagu.
