1No panya nyunsu di no tru. No lei fu yepi wan sma di du wan sani di no bun. 2No du sani di no bun awinsi furu trawan e du en. Yu no sa lei tu fesi krutubakra awinsi furu trawan du dati fu kenki a tru. 3Te yu de na wan krutu yu no mus de na wan sma sei fu di a pôti.
4Efu wan kaw noso wan buriki fu yu feyanti lasi dan yu feni en, yu sa tyari en go gi en.
5Te yu si taki a buriki fu yu feyanti no abi krakti fu tyari den lai moro fara, yu no sa luku dan yu libi en leki noti no psa. Yu sa yepi en fu saka den lai.
6Yu no sa lei fesi krutubakra fu di a trawan na wan pôti sma. 7No tyari kragi kon na fesi di no tru. Yu no sa meki wan bun sma di no du noti dede, bika Mi no sa libi a sma di du dati fu soso. 8Yu no sa teki tyuku tu. Bika a tyuku o meki yu tapu yu ai gi sani èn yu no o taki sani leki fa den de.
9No pina wan doroseisma, bika un sabi fa wan doroseisma e firi fu di unsrefi ben de doroseisma na ini Egipte.
10Siksi yari langa un sa prani un gron èn koti nyanyan. 11Ma a di fu seibi yari un sa libi a gron didon fu a rostu. Dan so den pôtiwan kan feni wan sani fu nyan tu. San den pôtiwan libi den meti sa nyan di e libi ini den wei. A srefi sani yu sa du nanga yu droifidyari èn nanga den oleifbon fu yu.
12Siksi dei de fu yu du yu wroko, ma tapu a di fu seibi dei yu sa rostu. Dan so yu kaw nanga yu buriki kan rostu tu èn a manpikin fu yu umasrafu nanga den doroseisma kan teki bro.
13Un hori unsrefi na ala sani di Mi taigi unu. Un no sa kari a nen fu tra gado. Den no sa kmoto ini un mofo.
14Dri leisi ini a yari un sa hori wan fesa gi Mi. 15Un mus hori a fesa pe un e nyan brede di meki sondro dyesi. Leki fa Mi taigi unu dan seibi dei langa un sa nyan brede di meki sondro dyesi. Disi musu psa ini a mun Abib tapu a ten di Mi taigi unu, bika na ini a mun dati un ben hari kmoto na ini Egipte. Ma den sma no sa kon na Mi fesi nanga leigi anu. 16Un mus hori a fesa tu te un koti den fosi nyanyan fu den sani di un ben sai na ini un gron. Na a kba fu a yari un mus hori a fesa te un e tyari a nyanyan fu un gron kon inisei. 17Dri leisi ini a yari ala mansma sa kon na fesi Masra fu MASRA.
18Te un srakti wan meti leki ofrandi gi Mi, un no sa poti a brudu fu en makandra nanga wan sani di meki nanga dyesi. Un no sa libi a fatu fu den meti di un srakti leki ofrandi gi Mi tapu den fesadei, te leki a tra dei.
19Te un koti den fosi nyanyan fu un gron un sa tyari den moro bun wan kon na a oso fu MASRA, un Gado.
Un no sa bori wan pikin bokoboko ini a merki fu a m'ma.
20Arki, Mi o seni wan engel go na un fesi fu kibri un na pasi èn fu tyari un go na a presi di Mi poti klari gi unu. 21Un arki san a e taigi unu. Un no tranga un yesi gi en bika a no sa gi un pardon te un no du san a taki, fu di a e du sani ini Mi nen. 22Efu un arki en, èn efu un e du ala sani san Mi taki, dan den feyanti fu unu sa de Mi feyanti èn Mi no sa lobi den wan di no lobi unu. 23A engel fu Mi sa go na un fesi. A sa tyari un go na a kondre fu den Amoritisma, den Hetitisma, den Perisitisma, den Kananitisma, den Hiwitisma nanga den Yebusitisma. Ma Mi sa puru den na pasi. 24Un no mus boigi gi den gado fu den èn un no mus dini den. No du den sani di den e du. Un mus broko den gado fu den trowe. Un mus broko den ston pis'pisi pe den e anbegi den gado. 25Un mus anbegi MASRA, un Gado. Dan A sa blesi a watra nanga a brede fu unu. Mi sa kibri unu gi siki tu. 26No wan umasma ini a kondre sa lasi bere. No wan no o de tu di no o man kisi pikin. Mi sa gi un langa libi.
27Mi sa meki den folku frede gi Mi fosi un doro drape. Mi sa meki ala den folku bruya nanga san un o miti. Mi sa meki den feyanti fu unu lon gi unu. 28Mi sa seni marbonsu go na un fesi fu yagi den Hiwitisma, den Kananitisma nanga den Hetitisma. 29Mi no o yagi den ini wan yari, soso fu a kondre no tron wan sabana èn fu den krasi meti no kon furu tumsi gi unu. 30Safrisafri Mi o yagi den gwe, te leki un kon so furu taki un kan teki a heri kondre. 31Mi sa gi unu a kontren kmoto fu a Riet Se go miti a Se fu den Filistijnsma èn fu a dreisabana go miti a Eufratliba. Bika Mi sa gi den sma fu a kondre abra ini un anu fu un yagi den. 32Un no sa meki ferbontu nanga den noso nanga den gado fu den. 33Den no mus tan libi ini a kondre fu unu, noso den o kisi unu meki un sondu fu dini den gado fu den. Na a sani dati o broko un neki.”
