Eksodus 25

₁MASRA taigi Moses taki: ₂“Taigi den Israelitisma taki den mus piki wan spesrutu ofrandi gi Mi. Ala sma di ati firi fu gi Mi wan sani mus tyari a ofrandi kon gi yu. ₃Disi na den sani di yu mus aksi den fu gi leki spesrutu ofrandi: gowtu, solfru, kopro, ₄blaw katun, dungruredi katun, fayaredi katun, diri linnen krosi, krosi di meki fu krabitawiwiri, ₅skapububa di ferfi redi, krabitabuba nanga acacia-udu. ₆Moro fara oli gi lampu, spesrei fu meki salfu-oli nanga a wierook di e smeri switi, ₇krisoprasston nanga tra diri ston gi a efod nanga gi a saka di e fasi na a efod. ₈A pipel mus meki wan santa presi gi Mi, dan Mi sa libi na de mindri. ₉Mi o sori yu wan eksempre fu a santa tenti nanga ala den wrokosani fu en. Na so yu mus meki en.

₁₀Den mus meki wan kisi fu acacia-udu. A mus langa wan nanga kwart meter èn a mus bradi èn a mus hei drikwart meter. ₁₁Un mus tapu a udu fu a kisi, fu inisei nanga dorosei, nanga lala gowtu. Un mus meki wan gowtu banti lontu a kisi. ₁₂Un mus meki fo gowtu linga di un mus fasi na den fo futu. Tu na ibrisei fu a kisi. ₁₃Un mus meki tiki fu acacia-udu fu syow a kisi. Den tiki disi mus tapu nanga gowtu. ₁₄Un mus sutu den tiki psa ini den linga di fasi na sei a kisi. Dan so un mus syow a kisi. ₁₅Den tiki nanga san un mus syow a kisi mus tan ini den linga. Un no mus puru den ini den linga.

₁₆Mi o gi yu den wortu di mus memre unu na san Mi ben taki. Dan yu mus poti den ini a kisi. ₁₇Un mus meki wan tapun fu lala gowtu gi a kisi. A mus langa wan nanga kwart meter èn a mus bradi drikwart meter. ₁₈Un mus meki tu gowtu kerub gi den lantyi fu a tapun. Den mus meki fu gowtu di un naki plata. ₁₉Wan kerub mus tnapu na a wan sei, a trawan na a tra sei. Den mus de wan pisi nanga a tapun. ₂₀Den kerub mus tnapu abra nanga abra fu densrefi. Den fesi mus luku go na gron, na a tapun fu a kisi. Den tu frei fu den mus bradi opo go na loktu fu kan tapu a tapun fu a kisi. ₂₁Un mus poti a tapun tapu a kisi. Ini a kisi un mus poti den wortu di mus memre un na san Mi ben taki. Mi o gi un den wortu dati. ₂₂Dati na a presi pe mi sa miti nanga yu. Fu a tapun, fu mindri den kerub di de tapu a kisi fu a ferbontu, drape Mi sa taki nanga yu abra ala sani di Mi wani taki den Israelitisma mus du.

₂₃Meki wan tafra fu acacia-udu. A mus langa wan meter, a mus bradi wan afu meter èn a mus hei drikwart meter. ₂₄Un mus tapu a udu fu a tafra nanga lala gowtu èn a mus abi wan gowtu banti lontu en. ₂₅Un mus meki wan lantyi na a tafra. A lantyi mus bradi sowan seibi nanga afu centimeter èn a mus abi wan gowtu banti lontu en. ₂₆Un mus meki fo gowtu linga gi en di mus fasi na den fo uku pe den futu de. ₂₇Den linga mus de krosbei fu a lantyi bika den tiki nanga san a mus syow a tafra mus psa na ini. ₂₈Yu mus meki den tiki dati fu acacia-udu èn a udu mus tapu nanga gowtu. ₂₉Un mus meki skotriki, skarki, kan nanga komki fu kanti sani. Den mus meki fu lala gowtu. ₃₀Tapu a tafra yu mus tan poti santa brede gi Mi.

₃₁Yu mus meki wan kandelaar. A mus meki fu lala gowtu di naki plata. A futu, a mindri pisi, den kopki di mus hori den lampu, den blad nanga den bromki mus de fu wan pisi. ₃₂Siksi anu mus kmoto na seisei fu a kandelaar. Dri na a wan sei nanga dri na a tra sei. ₃₃Ala den dri anu na a wan sei mus abi dri kopki, blad nanga bromki. A kopki mus meki leki wan amandrabromki. A srefi fasi ala den dri anu na a tra sei mus abi dri kopki di meki leki amandrabromki, blad nanga bromki. Na so den siksi anu mus meki di e kmoto na seisei fu a kandelaar. ₃₄A mindri pisi fu a kandelaar srefi, mus abi fo kopki fu amandrabromki, blad nanga bromki. ₃₅Pe den siksi anu fasi na a mindri pisi, drape wan blad mus de. Wan mus de ondro de tu fosi anu, wan mus de ondro den di fu tu anu, wan mus de ondro den di fu dri anu. Na so a sa de na ala siksi anu di fasi na a kandelaar. ₃₆A heri mindri pisi, den blad nanga den anu mus de fu wan pisi lala gowtu di naki plata. ₃₇Yu mus meki seibi lampu gi en. Den lampu mus poti sowan fasi taki a faya fu den e fadon kon na fesi. ₃₈Den tanga nanga den baki mus de fu lala gowtu tu. ₃₉A kandelaar nanga ala den sani di de fanowdu sa meki fu sowan dritenti-na-feifi kilo lala gowtu. ₄₀Sorgu taki yu meki ala sani leki fa yu si den dyaso tapu a bergi.