Aaron nanga den manpikin fu en e kisi a frantwortu leki priester
1Disi na san yu mus du fu santa Aaron nanga den manpikin fu en, fu den du a priesterwroko gi Mi. Teki wan yongu bulu nanga tu man skapu. Noti no mus du den man skapu. 2Yu mus teki brede nanga kuku di meki fu tarweblon, di no abi dyesi èn di masi nanga oli. Moro fara yu mus teki kuku di meki fu tarweblon, di no abi dyesi èn gi san den lobi oli di a kba baka. 3Poti den ini wan baskita, dan yu e tyari den kon makandra nanga a bulu nanga den tu man skapu.
4Meki Aaron nanga den manpikin fu en kon tu na mofodoro fu a tenti pe yu kan miti nanga Gado, dan yu e wasi den nanga watra. 5Baka dati yu mus teki den krosi, dan yu e weri den gi Aaron: A langa ondrokrosi, a langa empi, a efod nanga a saka di e kon tapu en borsu. Tai a banti fu a efod lontu en bere. 6Lontu en ede tu nanga a duku nanga san a mus lontu en ede, dan yu e fasi a santa bromki na en. 7Dan yu mus teki salfu-oli dan yu e kanti en tapu en ede fu salfu en. 8Baka dati yu mus meki den manpikin fu en kon dan yu e weri a langa ondrokrosi gi den. 9Tai a banti lontu a bere fu Aaron nanga den manpikin fu en, dan yu e tai a duku lontu den ede. Tapu a fasi disi yu e poti a frantwortu fu a wroko ini anu fu Aaron nanga den manpikin fu en. A priesterwroko na wan sani di den sa tan du gi Mi.
10Baka dati yu mus meki a bulu kon fesi a tenti pe yu kan miti nanga Gado. Dan Aaron nanga den manpikin fu en sa poti den anu tapu a ede fu a bulu. 11Kiri a bulu na MASRA fesi, na mofodoro fu a tenti pe yu kan miti nanga Gado. 12Teki pikinso fu a brudu fu a bulu dan yu e lobi en nanga yu finga na den tutu fu a altari. Ala a tra brudu yu sa kanti na a futu fu a altari. 13Teki ala a fatu san e de ini a inibere, a fatu fu a lever, den niri nanga a fatu fu den niri dan yu e bron den tapu a altari. 14A meti fu a bulu, a buba fu en nanga a inibere yu sa bron na dorosei fu a kampu. Na wan ofrandi fu kisi pardon fu sondu.
15Teki wan fu den man skapu dan yu e meki Aaron nanga den manpikin fu en poti den anu tapu a ede fu en. 16Baka dati yu sa srakti a man skapu dan yu e fringi a brudu fu en lontu a altari. 17Yu sa koti a man skapu pis'pisi. Wasi a inibere nanga den futu dan yu e poti den tapu den pis'pisi meti nanga a ede. 18Baka dati yu sa bron a heri man skapu tapu a altari. Na wan ofrandi di yu e bron gi MASRA, nanga wan switi smeri. Na wan ofrandi di bron nanga faya gi MASRA.
19Teki a tra man skapu dan yu meki Aaron nanga den manpikin fu en poti den anu tapu a ede fu en. 20Baka dati yu sa srakti a man skapu. Teki pikinso fu a brudu dan yu e lobi en na a let'sei yesibuba fu Aaron nanga den manpikin fu en. Moro fara yu mus lobi pikinso brudu gi a doi fu den let'anu nanga gi a bigidoi fu den let' futu. San tan abra fu a brudu yu mus fringi lontu a altari. 21Teki pikinso fu a brudu tapu a altari nanga fu a salfu-oli, dan yu e dropudropu en tapu Aaron, tapu en krosi, tapu den manpikin fu en nanga tapu a krosi fu den manpikin fu en. Dan Aaron nanga en krosi sa santa. Den manpikin fu en nanga den krosi fu den sa santa tu.
22Fu a man skapu disi yu mus teki a fatu, a tere, a fatu san de ini a inibere, a fatu fu a lever, den niri, a fatu fu den niri, nanga a let'sei bowtu. A man skapu disi sa de wan ofrandi fu gi Aaron a frantwortu fu a wroko. 23Ini a mantyi di un tyari kon na Mi fesi yu mus puru wan brede, wan kuku di masi nanga oleif-oli nanga wan kuku gi san den lobi oleif-oli di a kba baka. 24Poti ala den sani disi ini den anu fu Aaron nanga den manpikin fu en, dan yu e meki den opo den kon na loktu na Mi fesi leki wan ofrandi. 25Baka dati yu sa teki den sani baka, dan yu e bron den tapu a tra ofrandi di ben de tapu a altari kba. A sa de leki wan switi smeri na MASRA fesi. Na wan ofrandi di bron nanga faya gi MASRA. 26Teki a borsu fu a man skapu di yu ben tyari leki ofrandi fu gi Aaron a frantwortu fu a wroko, dan yu e opo en go na loktu leki wan ofrandi na Mi fesi. A pisi fu a ofrandi disi na fu yu. 27Yu mus hori a borsu nanga a baka bowtu aparti, fu a man skapu di yu ben tyari leki ofrandi fu gi Aaron nanga den manpikin fu en a frantwortu fu a wroko èn di yu ben opo kon na loktu gi Mi. 28Den sa de gi Aaron nanga den manpikin fu en. A sa de wan sani di den Israelitisma mus tan du. Den pisi disi fu den freide-ofrandi di den e tyari gi MASRA sa de gi Aaron nanga den manpikin fu en.
29Den santa krosi fu Aaron sa go na den bakapikin fu en te a no e du a priesterwroko moro. Na ini den krosi disi den sa salfu èn kisi a frantwortu fu a wroko. 30A manpikin fu en di teki en presi leki priester, sa weri den krosi disi seibi dei langa te a e kon ini a tenti pe yu kan miti nanga Gado, fu kon du en wroko na ini a santa presi.
31A meti fu a man skapu yu mus bori tapu wan aparti presi. 32Aaron nanga den manpikin fu en sa nyan a meti fu a man skapu nanga a brede di de ini a mantyi na mofodoro fu a tenti pe yu kan miti nanga Gado. 33Den sa nyan den sani di ben de fanowdu fu meki en bun nanga Mi, fu gi den a frantwortu fu a wroko èn fu poti den aparti. Wan tra sma di no abi a leti fu nyan fu den, no sa nyan den bika na wan santa sani. 34Efu meti nanga brede, di ben de fanowdu fu gi den a frantwortu fu a wroko, tan abra te a tra dei, yu mus bron den nanga faya. Den no sa nyan en moro bika na wan santa sani.
35Du ala sani gi Aaron nanga den manpikin fu en leki fa Mi taigi yu fu du. Yu mus teki seibi dei fu meki den klari fu gi den a frantwortu fu a wroko 36Ala dei yu sa tyari wan bulu leki ofrandi fu den kisi pardon fu den sondu, fu meki en bun nanga Mi èn fu krin a altari. Yu mus salfu a altari fu a kan santa. 37Seibi dei langa yu sa santa a altari. Baka dati a altari sa santa srefsrefi. Ala sma di fasi en sa kon santa tu.
Den aladei ofrandi
38Ala dei yu sa tyari tu yongu skapu fu wan yari leki ofrandi tapu a altari. 39Wan fu den yu sa tyari mamanten leki ofrandi, a trawan te neti e fadon. 40Makandra nanga a fosi skapu yu sa tyari tu kilo fu a moro bun blon. A blon disi mus moksi nanga wan liter fu a moro bun oleif-oli. Moro fara yu mus kanti wan liter win leki ofrandi tu. 41A tra skapu yu sa tyari leki ofrandi te neti e fadon. Yu mus tyari wan graan-ofrandi te neti tu leki fa yu e du te mamanten èn yu mus kanti win tu leki ofrandi. A sa de leki wan switi smeri. Na wan ofrandi di bron nanga faya gi MASRA. 42A mus de wan ofrandi di den bakapikin fu unu mus tyari aladei fesi Masra, na mofodoro fu a tenti pe yu kan miti nanga Gado. Drape Mi sa miti nanga unu fu taki nanga yu. 43Mi sa miti drape nanga den Israelitisma èn a glori fu Mi sa meki a presi kon santa. 44Mi sa meki a tenti pe yu kan miti nanga Gado nanga a altari kon santa, èn Mi sa poti Aaron nanga den manpikin fu en aparti fu du a priesterwroko gi Mi. 45Mi sa libi mindri den Israelitisma èn Mi sa de den Gado. 46Dan den sa kon sabi taki Mi MASRA, na den Gado, di puru den ini a kondre fu Egipte fu libi na den mindri. Mi na MASRA, den Gado.
