Eksodus 36

₂Dan Moses seni kari Besaleyel nanga Oholiab nanga ala tra man di ben sabi a wroko, di Gado ben gi koni fu du a wroko èn di ben firi fu kon du a wroko. ₃Den teki ala den ofrandi na Moses, di den Israelitisma ben gi leki spesrutu ofrandi gi a wroko di ben mus du ini a santa presi. Ala mamanten sondro dwengi den sma ben e tyari sani kon ete. ₄So den man di ben sabi a wroko libi a wroko di den ben e du ₅dan den go taigi Moses taki: “Den sma e tyari moro sani kon leki san de fanowdu fu du a wroko di MASRA taigi wi fu du.” ₆Ne Moses gi a komanderi fu den bari lontu ini a kampu taki: “No wan man noso uma no abi fu du wan sani moro gi a santa presi.” ₇Bika nofo sani ben de di ben de fanowdu fu du ala a wroko. A ben furu srefi.

₈Dan den man di ben sabi a wroko meki a santa tenti. Den meki en nanga tin duku fu diri linnen krosi, fu blaw katun, dungruredi katun nanga fayaredi katun èn den ben nai kerub na en tapu. ₉Ibri duku ben langa tin-na-fo meter èn den ben bradi tu meter. ₁₀Den fasi feifi duku kon na wan. A srefi sani den du nanga den feifi trawan. ₁₁Den meki ai tu fu blaw katun na a wan sei lantyi fu a tenti. A srefi sani den du na a tra sei lantyi. ₁₂Den meki feifitenti ai na a wan sei duku nanga feifitenti ai na a tra sei. Den du en so wan fasi taki den ai fu a wan duku nanga di fu a tra duku ben de abra nanga abra. ₁₃Den meki feifitenti gowtu aka, dan den aka den tu duku kon na wan fu a santa tenti tron wan pisi.

₁₄Den meki wan tenti tu fu erfu duku fu krabitawiwiri. A tenti disi ben o kon abra a santa tenti. ₁₅Ibriwan fu den duku ben langa tin-na-feifi meter èn den ben bradi tu meter. Ala den erfu duku ben langa èn den ben bradi a srefi. ₁₆Den fasi feifi fu den duku kon na wan. A srefi sani den du nanga den siksi trawan. ₁₇Baka di den fasi den feifi duku kon na wan, den meki feifitenti ai na a lantyi fu en. Di den fasi den siksi tra duku kon na wan den meki feifitenti ai na a lantyi fu en tu. ₁₈Dan den meki feifitenti kopro aka fu fasi a tenti kon na wan, fu a tron wan pisi. ₁₉Den meki wan duku tu fu tapu a tenti. A duku disi ben meki fu skapububa di ben ferfi redi. Tapu a duku fu skapububa den poti ete wan duku fu krabitabuba.

₂₀Den meki planga fu acacia-udu gi a santa tenti. Den poti den planga disi tnapu let'opu. ₂₁Ibri planga ben langa feifi meter èn den ben bradi drikwart meter. ₂₂Ibri planga ben abi tu pen fu ben kan fasi den kon na makandra. Ala planga fu a santa tenti ben de so. ₂₃Den meki tutenti planga gi a zuidsei fu a santa tenti. ₂₄Den meki fotenti futupisi di ben mus kon ondro den tutenti planga. Ibri planga ben e kisi tu futupisi. Ini den futupisi disi den tu pen fu de planga ben e kon fiti. ₂₅Den meki tutenti planga tapu a srefi fasi tu gi a noordsei fu a santa tenti ₂₆nanga fotenti futupisi. Ibri planga ben e kisi tu futupisi. ₂₇Gi a bakasei fu a santa tenti di ben de na a westsei den meki siksi planga. ₂₈Gi den uku na bakasei fu a santa tenti den meki tu planga. ₂₉Den tu planga disi o meki den uku. Fu ondrosei go na loktu te na a linga den ben de a srefi. ₃₀Ala nanga ala aiti planga ben de nanga tin-na-siksi futupisi. Tu futupisi gi ibri planga. ₃₁Den meki dwarsbalk fu acacia-udu. Feifi gi den planga gi a wan sei fu a santa tenti, ₃₂feifi gi den planga fu a tra sei fu a santa tenti nanga feifi gi den planga na bakasei fu a santa tenti di de na a westsei. ₃₃A di fu dri dwarsbalk ben didon leti na mindribere fu den planga èn a ben e waka fu a fosi planga go te na a laste wan. ₃₄Den tapu den planga nanga gowtu, den linga ini san den dwarsbalk ben mus kon fasi ben de fu gowtu èn den tapu den dwarsbalk nanga gowtu tu.

₃₅A garden ben meki fu blaw katun, dungruredi katun, fayaredi katun nanga diri linnen krosi. Kerub ben nai poti na en tapu. ₃₆Den meki fo postu fu acacia-udu gi a garden. Den postu ben tapu nanga gowtu. Den aka ben meki fu gowtu èn den ben meki fo solfru futupisi gi den postu.

₃₇Den meki wan garden di ben o anga mofodoro fu a tenti. A ben meki fu blaw katun, dungruredi katun, fayaredi katun nanga diri linnen krosi. Moimoi sani ben nai poti na en tapu. ₃₈Feifi postu fu acacia-udu ben meki gi a garden disi. A ede fu den postu ben de fu gowtu, den dwarslati ben tapu nanga gowtu tu èn den feifi futupisi ben de fu kopro.