1Di Rachel si taki a no ben man kisi pikin gi Yakob, a bigin dyarusu tapu en s'sa. Ne a taigi Yakob taki: “Meki pikin nanga mi noso mi o dede.” 2Ma Yakob kisi atibron gi Rachel dan a taigi en taki: “Mi a no Gado. Na En meki taki yu no man kisi pikin.” 3Ne Rachel taigi en taki: “Luku Bilha, a umasrafu fu mi dyaso. Sribi nanga en, dan a kan meki pikin na tapu mi kindi. Sofasi mi sa tron m'ma tu.” 4Dan a gi Yakob Bilha, en umasrafu leki frow èn Yakob sribi nanga en. 5Bilha hori bere dan a kisi wan manpikin gi Yakob. 6Ne Rachel taki: “Gado meki mi kisi leti. A yere mi èn A gi mi wan boi.” Dat' meki a kari a boi Dan. 7Dan Bilha, a umasrafu fu Rachel, hori bere baka dan a kisi a di fu tu boi gi Yakob. 8Ne Rachel taki: “Mi ben abi fu feti nanga mi s'sa fu Gado sori mi en sari-ati, èn mi wini.” So a kari a boi Naftali.
9Di Lea si taki a no ben e kisi pikin moro, a meki Yakob teki Silpa, a umasrafu fu en, leki frow. 10Dan Silpa kisi wan boi gi Yakob. 11Ne Lea taki: “Mi abi koloku baka.” So a kari a boi Gad. 12Dan Silpa kisi a di fu tu boi gi Yakob. 13Ne Lea taki: “Mi na wan koloku uma. Den tra uma sa taki tak' mi abi koloku trutru.” Dan a kari a boi Aser.
14Ini a ten pe tarwe e koti, Ruben ben go na gron, dan a feni lobi-apra. Ne a tyari den gi Lea, en m'ma. Dan Rachel aksi Lea taki: “Gi mi wantu fu den lobi-apra fu yu boi.” 15Lea piki en taki: “Yu teki mi masra kba dan now yu wan den lobi-apra fu mi boi tu.” Ma Rachel taigi en taki: “Efu yu gi mi den lobi-apra fu yu boi, yu kan sribi nanga Yakob tide neti.” 16Di Yakob kmoto neti fu gron e kon, Lea waka miti en dan a taigi en taki: “Yu mus sribi tide neti na mi, bika mi yuru yu nanga den lobi-apra fu mi boi.” A neti dati Yakob sribi nanga Lea. 17Gado ben yere a begi fu Lea. Lea hori bere dan a meki a di fu feifi boi gi Yakob. 18Ne Lea taki: “Gado gi mi san mi ben mus kisi. Bika mi ben meki mi umasrafu sribi nanga mi masra.” So a kari a boi: Isakar. 19Lea hori bere baka dan a meki a di fu siksi boi gi Yakob. Ne a taki: 20“Gado gi mi wan moi kado. Disi leisi mi masra sa tan na mi fu di mi meki siksi manpikin gi en.” Dan a kari a boi Sebulon. 21Baka dati Lea kisi wan umapikin di a kari Dina.
22Ma Gado no ben fergiti Rachel. A yere en begi èn A meki a kisi pikin. 23So Rachel hori bere dan a kisi wan boi. Ne a taki: “Gado puru a syen di ben de na mi tapu.” 24Rachel kari a boi Yosef, dan a taki: “Mi winsi taki MASRA sa gi mi ete wan manpikin.”
25Di Rachel kisi Yosef, Yakob taigi Laban taki: “Meki mi drai go baka na mi kondre pe mi e tan. 26Meki den frow nanga den pikin fu mi go nanga mi. Na fu den mi wroko gi yu èn yu sabi o bun mi wroko gi yu.” 27Ma Laban taigi en taki: “Sari mi. Bika mi kon si taki na fu yu ede MASRA e blesi mi.” 28A taigi Yakob tu taki: “Taigi mi omeni yu wani taki mi mus pai yu, dan mi sa gi yu dati.” 29Ma Yakob piki en taki: “Yu sabi bunbun o bun mi wroko gi yu èn o bun mi luku den meti gi yu. 30Fosi mi kon dyaso yu no ben abi furu. Ma now den furu fu di MASRA e blesi yu awinsi pe mi tyari den meti go. Now mi wan wroko gi misrefi tu.” 31Laban aksi baka taki: “San mi mus gi yu?” Ma Yakob piki en taki: “Yu no abi fu pai mi. Mi sa go wei den meti baka èn hori ai na den tapu, efu yu meki mi du a wan sani disi: 32Mi o waka psa ala den skapu nanga krabita fu yu tide, dan mi o puru ala den penipeni wan, den wan di abi flaka nanga den blaka wan poti na wan sei. Disi sa de mi paiman. 33Tamara, te yu kon luku san mi ben teki leki paiman, a sa de fu si taki mi no fufuru yu. Ala krabita di no penipeni noso flaka èn ala skapu di no blaka yu kan si leki na fufuru mi fufuru den.” 34Ne Laban piki taki: “A bun. A sa de leki fa yu taki.” 35Ma a srefi dei dati Laban puru ala den strepistrepi bokoboko nanga den wan di ben flaka poti na wan sei. Fu den krabita a puru alamala di ben penipeni noso di ben flaka. Alamala di ben abi wan weti flaka a puru. A puru ala den blaka skapu tu, dan a meki den boi fu en hori den gi en. 36Dan Laban gwe bun fara nanga den meti taki yu ben abi fu waka dri dei fu doro na den. Ma Yakob ben tan luku den tra meti fu Laban.
37Dan Yakob broko taki fu a populierbon, fu a amandrabon nanga a plataanbon. A piri a buba fu den taki sowan fasi taki a weti fu den taki ben de fu si leki strepi. 38A poti den taki disi leti fesi den meti ini den watrabaki pe den ben e kon dringi. Te den meti ben kon dringi den manwan ben wan dyompo den umawan. 39Efu den manwan ben dyompo den umawan leti pe den taki de, den ben e kisi pikinwan di ben strepistrepi, penipeni noso di ben abi flaka. 40Yakob ben poti den skapu aparti èn te den manwan ben e dyompo den umawan a ben sorgu taki den ben e luku go na den strepistrepi nanga den blaka meti fu Laban. So Yakob ben e kisi en eigi grupu skapu. 41Ala leisi te den moro bun meti ben wani dyompo den umawan, Yakob ben e poti den taki ini den watrabaki fu den ben dyompo den umawan leti pe den taki ben de. 42Te a ben de swakiswaki meti, Yakob no ben e poti den taki ini den watrabaki. So Laban ben e kisi soso den swaki meti, ma Yakob ben e kisi den moro tranga meti. 43Tapu a fasi disi Yakob ben e kon gudu moro nanga moro. A ben abi furu skapu nanga krabita, srafu, kameel nanga buriki.
