Genesis 43

₁Ma a angriten ben tranga na ini a kondre. ₂Dat' meki di a graan di den ben tyari kmoto fu Egipte kon kba, den p'pa taigi den taki: “Un go bai pikinso graan baka gi wi.” ₃Yuda piki en taki: “A man warskow wi taki: ‘Mi no sa meki un kon na mi, solanga un brada no de nanga unu.’ ₄Wi sa go bai graan kon, soso efu yu meki wi brada go nanga unu. ₅Ma efu yu no wani meki a go nanga wi, dan wi no o go tu bika a man taigi unu taki: ‘Mi no sa meki un kon na mi, solanga un brada no de nanga unu.’ ” ₆Ne Israel taki: “Fu sanede un du mi a ogri dati, fu taigi a man taki un abi ete wan brada?” ₇Den piki en taki: “A man aksi wi sani finifini fu wisrefi nanga fu wi famiri. A aksi: ‘Un p'pa e libi ete? Un abi ete wan brada?’ So un piki en leki fa den sani de. Fa un ben o sabi taki a ben o taki: ‘Un tyari un pikinbrada kon.’ ” ₈Yuda taigi en p'pa Israel taki: “Meki a boi go nanga mi. Dan wi sa meki wisrefi klari fu go. Sofasi wi no sa dede, ma wi, yu nanga den pikin fu wi sa tan na libi. ₉Mi sa tyari a frantwortu fu en. Mi sa sorgu taki yu kisi en baka. Efu mi no tyari en kon baka kon poti tnapu na yu fesi, dan a sa de so taki mi abi wan têgo paiman na yu. ₁₀Efu wi no ben draidrai, dan wi ben go kon tu leisi kba.” ₁₁Ne den p'pa Israel taigi den taki: “Efu a no man tra fasi un sa teki en so, ma dan un mus du disi: un mus poti den moro bun sani fu a kondre ini un saka tyari go leki kado gi a man. Pikinso balsem, pikinso oni, gom nanga hars, terpentijnnoto nanga amandra. ₁₂Un teki tu tron so furu moni tu. Un mus tyari a moni di ben de tapusei ini den saka fu unu go baka. Kande na wan fowtu den ben meki. ₁₃Un teki un brada dan un meki unsrefi klari fu drai go na a man. ₁₄Meki Gado di abi ala makti, meki taki a man sa sori unu sari-ati, fu meki a tra brada fu unu nanga Benyamin drai kon baka. Bika fu mi sei, efu mi mus lasi mi pikin, dan meki a de so.”

₁₅So den man teki den kado nanga tu tron so furu moni. Den teki Benyamin tu. Den meki densrefi klari, den hari go na Egipte, dan den go fu miti Yosef. ₁₆Di Yosef si den nanga Benyamin, a taigi a basi fu den wrokoman taki: “Tyari den man disi go na mi oso. Srakti meti fu bori. Bika den man disi o nyan tide bakadina nanga mi.” ₁₇A man du san Yosef taigi en. A tyari den go na Yosef oso. ₁₈Ma den brada ben kon frede di den e tyari den go na Yosef oso. Den taki: “Den tyari wi kon dyaso fu a moni ede di wi ben feni a fosi leisi baka na ini den saka fu wi. Den o grabu wi te wi no o ferwakti en, den o puru den buriki na wi anu dan den teki wi leki srafu.” ₁₉Den waka go na a edeman fu den wrokoman fu Yosef, dan den taigi en na mofodoro taki: ₂₀“No mandi na wi tapu, masra, wi ben kon wan leisi kba kon bai nyanyan. ₂₁Ma di wi opo un saka na a presi pe wi ben o psa a neti, wi si taki ala sma en moni ben de tap'sei ini en saka baka. Ibri koprosensi. Ma wi tyari en kon baka. ₂₂Un tyari tra moni fu bai nyanyan. Un no sabi suma poti a moni fu wi baka ini un saka.” ₂₃A man piki den taki: “No frede, a Gado fu unu nanga fu un p'pa poti wan gudu gi unu ini un saka sondro fu un sabi. Mi ben kisi a moni fu unu.” Dan a tyari Simeon kon na den. ₂₄A man tyari den go ini Yosef oso, a gi den watra fu den wasi den futu, dan a poti nyanyan gi den buriki fu den. ₂₅Di den yere taki bakadina den ben o nyan makandra nanga Yosef, den poti den kado klari fu te Yosef ben doro.

₂₆Di Yosef kon na inisei, den tyari den kado gi en di den ben tyari kon, dan den boigi gi en. ₂₇A aksi den fa a e go nanga den. A aksi den tu taki: “Ala sani e go bun nanga a owru p'pa fu unu fu san un ben ferteri mi? A de na libi ete?” ₂₈Den piki taki: “Un p'pa, a knekti fu yu, e meki en bun. A de na libi ete.” Dan den boigi gi en. ₂₉Yosef luku lontu, dan a si en brada Benyamin, a boi fu en m'ma. Ne a taki: “Na disi na a pikin brada fu unu fu san un ben ferteri mi? Meki Gado sori yu en bun-ati, mi boi.” ₃₀Dan Yosef waka gwe es'esi, bika a no ben man hori en watra-ai moro di a si en brada. A gwe go suku wan presi fu krei. A go ini wan kamra go krei. ₃₁Baka dati a wasi en fesi, dan a go na dorosei baka. A ben e hori ensrefi di a taki: “Meki den tyari a nyanyan kon.” ₃₂Di den tyari a nyanyan kon, den poti di fu Yosef aparti, di fu den brada aparti nanga di fu den sma fu Egipte aparti di ben e nyan makandra nanga kownu. Bika den sma fu Egipte no ben e sidon nyan makandra na tafra nanga Hebrewsma. Na wan sani di den no ben e du. ₃₃Den ben sidon nanga den fesi go na Yosef èn den ben ferwondru taki a fasi fa den ben seti den fu sidon ben de fu bigiwan go na pikinwan. ₃₄Den sma ben e tyari a nyanyan fu a tafra fu Yosef kon na den. A nyanyan fu Benyamin ben de feifi tron so furu leki di fu den trawan. Den dringi makandra nanga Yosef te leki den drungu.