1Samaria mus butu, fu di a kaka en futu gi en Gado. Feti owru o kiri den. Den o naki den pikin fu den kiri. Den o priti a bere opo fu den uma di de nanga bere.
2Drai kon baka Israel, drai kon na MASRA, yu Gado. Bika na den kruktudu fu yu meki yu fadon. 3Kon, dan yu e taki sortu sondu yu du. Drai kon na MASRA, dan yu e aksi En taki: “Gi wi pardon fu den kruktudu fu wi, sori wi Yu bun-ati. Teki den wortu di wi taki leki bulu di wi tyari kon leki ofrandi. 4Asur no o man ferlusu unu. Wi no sa bow moro tapu asi. Wi no sa taigi den sani moro di wi meki nanga wi eigi anu taki: yu na wi gado. Bika na Yu e sori den pikin di no abi papa nanga mama moro Yu bun-ati.”
5Mi o dresi den fu den no waka baka tra gado moro.
Mi sa sori den o tranga Mi lobi den.
Mi ati no sa bron moro na den tapu.
6Mi sa de leki wan dow gi Israel,
a sa gro moi leki wan leilibromki,
den rutu fu en sa gersi den bon fu Libanon.
7A sa gi pransun.
A sa moi leki wan oleifbon,
a sa smeri so switi leki den sedrebon fu Libanon.
8Den sa libi baka na ini kowrupe fu En,
den sa prani karu baka.
Den sa gro leki wan droifibon,
den o kisi bigi nen leki a win fu Libanon.
9Efraim, san Mi abi fu du nanga kruktu gado?
Na Mi e yere yu begi,
na Mi e sorgu gi yu.
Mi gersi wan sipresbon di noiti no e lasi en grun wiwiri.
Na Mi e sorgu taki yu man tyari froktu.
10Meki a sma di srapu, prakseri bun sa mi taki. Meki a sma di koni, taki efu a no so a de. Bika MASRA e du sani tapu wan leti fasi. Den sma di bun ini Gado ai e libi leki fa En wani, ma den sma di no wani libi leki fa En wani e stotu den futu fadon.
