Lees verschillende vertalingenLees verschillende vertalingen
Vergelijk verschillende vertalingenVergelijk verschillende vertalingen
Maak uw notitiesMaak uw notities
Kopieer en markeer BijbeltekstenKopieer en markeer Bijbelteksten
Uitproberen
Hosea 13
1Ala sma ben e frede, te Efraim ben e taki. Den ben abi bigi lespeki gi en na ini Israel. Ma a meki wan fowtu fu go dini Baal, dan a dede gwe. 2Te nanga now den e tan sondu. Den e safu a solfru dan den e meki popki fu en. Afkodreipopki, leki fa densrefi wani en. A wroko fu sma di sabi du den wroko disi. Na fu den sma e taki: Den sma di e tyari ofrandi e bosi den yongu kaw. 3Dat' meki den o gersi a dow di e de te mamanten, leki a dow di e gwe es'esi te fruku mamanten, leki buba di e wai gwe fu a presi pe den e masi a buba puru na a graan, leki smoko di e kmoto na ini wan fensre.
4Ma Mi na MASRA, un Gado, sensi na Egipte. Un no sa dini wan tra gado boiti Mi, èn boiti Mi no wan trawan de di e ferlusu unu. 5Mi ben sorgu gi unu di un ben de ini a dreisabana, ini wan drei kondre. 6Di den doro na bun gron, den nyan te den bere furu. Ma di den bere furu, den kisi bigi fasi dan den drai den baka gi Mi. 7Dat' meki Mi e du now leki wan lew, Mi e sidon luru sei a pasi leki wan tigri. 8Mi e lon kon na den tapu leki wan uma beer di lasi en pikin. Mi e priti den borsu opo, Mi e swari den leki wan uma lew. Krasi meti o priti den.
9Sani no o waka bun gi yu, Israel, fu di yu drai yu baka gi Mi, yu Yepiman. 10Pe a kownu fu yu de? A wan di bo ferlusu yu di bo luku den foto fu unu fu noti no miti den. Pe den tiriman fu unu de? Un di ben aksi taki: Gi un wan kownu, gi un tiriman. 11Nanga atibron Mi o gi un wan kownu, ma nanga atibron Mi o teki en baka.
12Den kruktudu fu Efraim kibri bun den sondu fu en poti bun gwe na wan sei. 13Tranga bere-ati ben e go na fesi fosi a kon gebore. Ma en na wan don pikin. Te a ten fu en doro, a no man feni a pasi fu kon na doro. 14Fu sanede Mi bo ferlusu den dan fu den no dede? Noso puru den na ini dedekondre? Dede, pe den takru siki fu yu de? Dedekondre, pe a pori fu yu de? Mi no sa abi sari-ati moro. 15Awinsi a e gro so moi na mindri den brada fu en. MASRA o meki a winti fu En, wan winti fu oostsei wai kmoto fu a dreisabana. A o meki ala den peti fu en kon drei no wan watrabron o abi watra moro. Dan den o kon fufuru ala den gudu fu en.
