Den gado fu Babel no man ferlusu
1A gado Bel fadon tapu en fesi,
a gado Nebo kanti fadon.
Den popki fu den gado disi di den ben e syow,
den lai now tapu kaw nanga buriki,
wan hebi gi den meti di weri kba.
2Den kanti fadon,
den fadon tapu den fesi.
Den no ben man yepi densrefi.
Den srefi feyanti srepi gwe leki srafu.
3Bakapikin fu Yakob, un arki Mi,
un alamala fu Israel di tan abra.
Mi ben tyari unu kba sensi un ben de ini un mama bere.
Mi ben opo un sensi un gebore.
4Mi e tan a srefi te leki un kon owru,
Mi o tan tyari unu awinsi un kisi weti wiwiri.
Na Mi ben du en, èn Mi o tan du en.
Mi o tyari unu èn Mi o ferlusu unu.
5Nanga suma un wan marki Mi?
Suma un wan poti na Mi sei di de leki Mi?
Suma de a srefi leki Mi?
6Yu abi sma di e seki gowtu puru fu den monisaka,
èn wegi solfru na ini wan wegi.
Den e yuru wan gowtusmeti fu meki wan gado fu en gi den,
dan den e kindi èn den e anbegi en.
7Den e poti en na tapu den skowru,
dan den e syow en go poti na en presi.
Pe a tnapu, a tnapu.
A no man kmopo fu en presi.
Awinsi wan sma e kari en fu a yepi en,
a no e piki.
A no man yepi a sma nanga en problema.
8Un memre den sani disi dan un teki dek'ati,
un di no wani du Mi wani.
Un tyari den kon baka ini un prakseri.
9Memre den sani di psa fos'fosi.
Mi na Gado, wan trawan no de.
Mi na Gado, no wan no de leki Mi.
10Fosi wan sani bigin, Mi e taki fa a o kba.
Mi e taki bun langa na fesi fu sani di no bigin srefsrefi ete.
Te Mi teki wan besroiti, a e psa!
Mi o du ala san Mi feni bun!
11Mi kari wan aka kmopo fu oostsei,
wan man fu wan farawe kondre di o du san Mi poti fu du.
Iya, Mi ben taki fu en, èn Mi o du en.
Mi poti en fu du, èn Mi o du en!
12Un arki Mi, trangayesi folku,
un di no e du sani srefsrefi tapu wan leti fasi.
13A wani fu Mi di fiti fu psa, de krosbei!
A no de farawe.
A ferlusu di Mi o tyari no o tan langa fosi a de fu si.
Mi tyari ferlusu gi Sion.
Mi o meki Israel teki prati ini a glori fu Mi.
