A strafu di Babel o kisi
1Saka fu yu kownusturu, Babel, go sidon na gron.
Go sidon na gron, Kaldea.
Den no o taki moro taki yu safu èn taki yu moi.
2Teki a ston, dan yu e mara karu tron blon.
Puru a duku nanga san yu e tapu yu fesi,
hari a koto fu yu go na loktu,
poti den bowtu fu yu na doro,
èn koti liba abra.
3Nanga sososkin yu o tnapu,
yu syenpresi o de fu si.
Mi e pai yu baka fu a ogri di yu du,
èn no wan sma o man tapu Mi.
4A Ferlusuman fu unu,
MASRA fu ala sani na En nen,
A Santa Wan fu Israel!
5Kaldea, go sidon tiri fu yu èn tan ini dungru.
Bika sma no o kari yu moro langa:
“Uma di e tiri den kondre.”
6Mi ati ben bron sote nanga Mi pipel.
Mi no ben si den moro leki Mi eigi pipel,
èn Mi gi den abra na yu.
Ma yu no ben abi no wan dropu sari-ati nanga den.
Srefi tapu den owru sma yu poti wan bun hebi lai.
7Yu ben taki: “Fu têgo mi o tan a uma di e tiri.”
Dat' meki yu no ben prakseri den sani disi bun,
èn yu no prakseri fa sani ben o waka.
8We yere dan, yu di ben gwenti libi yu bigi libi,
yu di ben e libi sondro wan broko-ede,
èn di ben e tak' na yusrefi taki:
Na mi na en, wan trawan no de.
Mi no o libi noiti leki wan uma di lasi en masra.
Mi no o lasi mi pikin tu.
9Ma den tu sani disi o miti yu,
wantronso, tapu a srefi dei,
yu lasi den pikin fu yu èn yu lasi yu masra.
Bun hebi den sani disi o kon na yu tapu.
Den furu tofruwroko fu yu
nanga den wortu di yu e taki di abi makti,
no o man yepi yu.
10Yu fertrow na tapu a ogri fu yu èn yu ben prakseri:
No wan sma no e si mi.
A koni nanga a sabi fu yu kori yu.
Den meki yu prakseri na yusrefi taki:
Na mi na en, wan trawan no de.
11Ma ogri o miti yu,
èn yu no o man taki wortu fu tapu en.
Bigi ongoloku o kon na yu pasi
èn yu no man tapu en fu a no kon.
Wantronso wan pori e teki yu,
di yu no ben ferwakti srefsrefi.
12Go doro fu yu nanga den wortu di yu e taki
fu sani psa noso fu sani fu den no psa.
Go doro nanga den furu tofruwroko fu yu,
den sani nanga san yu ben weri yusrefi
sensi di yu ben yongu.
Kande den kan du wan sani gi yu,
kande yu kan tapu skreki gi a ogri di o miti yu.
13Furu raiman gi yu rai te yusrefi kon weri.
Meki den di e ondrosuku den stari,
den di e luku den stari fu si san e kon,
den di e taigi yu ala mun fa san o waka gi yu,
meki den opo èn yepi yu now.
14Yere, den de leki drei grasi di a faya o bron.
Den no ben man yepi densrefi fu kmoto ini a faya.
Den no de wan faya fu yu sidon waran yusrefi,
wan faya pe yu kan go sidon na en sei.
15Na dati den sma disi de gi yu,
gi san yu ben haswa so,
den sma nanga san yu ben e bai nanga seri sani sensi di yu ben yongu!
Den gwe, ibriwan teki en eigi pasi.
No wan fu den man yepi yu.
