Leviticus 3

₁Efu wan sma wan tyari wan freide-ofrandi fu wan meti di a kweki, dan a kan tyari wan bulu noso wan kaw kon gi MASRA. Ma noti no mus mankeri a meti. ₂A sma di tyari a meti kon leki ofrandi, sa poti en anu tapu a ede fu a meti, dan a srakti en na mofodoro fu a tenti pe yu kan miti nanga Gado. Dan den priester, sobun den manpikin fu Aaron, sa fringi a brudu lontu na a skin fu a altari. ₃A sma di tyari a meti kon leki freide-ofrandi, sa tyari ala a fatu fu a inibere fu a meti kon fu bron nanga faya leki ofrandi gi MASRA. ₄A sa du disi tu nanga den niri èn nanga a fatu fu den niri na a lebriki. Makandra nanga den niri a sa puru a moro bun pisi fu a lever tu. ₅Dan den manpikin fu Aaron sa bron den tapu a altari makandra nanga den tra ofrandi di mus bron. A sa de wan ofrandi di bron nanga faya leki wan switi smeri di e gi MASRA prisiri.

₆Efu na wan skapu noso wan krabita a sma tyari kon leki freide-ofrandi gi MASRA, dan a no sa abi trobi efu na wan manwan noso wan umawan. Ma noti no mus mankeri a meti. ₇Efu na wan skapu a sma tyari kon leki ofrandi gi MASRA, ₈a sa poti en anu tapu a ede fu a meti, dan a srakti en fesi a tenti pe yu kan miti nanga Gado. Dan den manpikin fu Aaron sa fringi a brudu lontu na a skin fu a altari. ₉A sa tyari den fatu pisi fu a meti kon, di a tyari leki freide-ofrandi, fu den bron en leki wan ofrandi nanga faya gi MASRA. Dati na: a tere nanga a fatu fu en di a koti puru na a bakabonyo, nanga ala a fatu fu a inibere. ₁₀Moro fara den niri nanga a fatu fu den na a lebriki. Makandra nanga a niri a mus puru a moro bun pisi fu a lever tu. ₁₁A priester sa bron den tapu a altari. A sa de nyanyan di bron nanga faya leki wan ofrandi gi MASRA. ₁₂Efu na wan krabita a sma tyari kon leki ofrandi gi MASRA, ₁₃a sma sa poti en anu tapu a ede fu a meti, dan a srakti en fesi a tenti pe yu kan miti nanga Gado. Dan den manpikin fu Aaron sa fringi a brudu lontu na a skin fu a altari. ₁₄A sma sa tyari ala a fatu fu a inibere fu a meti kon fu bron nanga faya leki ofrandi gi MASRA. ₁₅A sma sa du disi tu nanga den niri èn nanga a fatu fu den niri na a lebriki. Makandra nanga den niri a sa puru a moro bun pisi fu a lever tu. ₁₆Dan a priester sa bron en tapu a altari. A sa de nyanyan di bron nanga faya leki ofrandi nanga wan switi smeri di e gi MASRA prisiri. ₁₇Disi na wan sani di ala den pikin fu unu di e kon na baka mus tan du fu têgo, awinsi pe den e tan. Un no sa nyan fatu nanga brudu srefsrefi.’ ”