Leviticus 2

₁Efu wan sma wan gi MASRA wan graan-ofrandi, a ofrandi dati mus meki fu a moro bun blon. A sma sa kanti oli tapu a ofrandi èn a sa poti wierook tu di e smeri switi. ₂A sma sa tyari en go na den manpikin fu Aaron, sobun den priester. A priester sa teki wan anu fu a blon dati tapu san a oli ben kanti, nanga ala a wierook, dan a bron en tapu a altari. Dan a sa de leki na a heri ofrandi bron. A ofrandi disi na wan ofrandi di bron nanga faya leki wan switi smeri di e gi MASRA prisiri. ₃San tan abra fu a graan-ofrandi, na fu Aaron nanga den manpikin fu en. Na wan tumsi santa sani, fu di a de wan pisi fu a ofrandi di bron nanga faya gi MASRA.

₄Efu na losi a graan-ofrandi losi ini wan onfu, dan a mus losi nanga a moro bun blon. A mus de kuku di meki nanga oli, ma sondro dyesi, noso plata buskutu gi san den lobi oli, ma di meki sondro dyesi tu. ₅Efu na baka a graan-ofrandi baka tapu wan plaat, dan a mus baka nanga a moro bun blon. A mus meki nanga oli èn a no mus abi dyesi. ₆A mus brokobroko ini pisi èn oli mus kanti na en tapu. Dan a fiti fu den tyari en leki graan-ofrandi. ₇Efu na bori a graan-ofrandi ben bori ini wan pan, dan a mus bori nanga a moro bun blon èn nanga oli. ₈Soso te a graan-ofrandi meki nanga den sani disi, yu kan tyari en kon gi MASRA. Den sa tyari en kon gi a priester, di sa tyari en go na a altari. ₉A priester sa teki wan pisi fu a graan-ofrandi, dan a bron en tapu a altari. Dan a sa de leki na a heri ofrandi bron. Na wan ofrandi di bron nanga faya leki wan switi smeri di e gi MASRA prisiri. ₁₀San tan abra fu a ofrandi, na fu Aaron nanga den manpikin fu en. Na wan tumsi santa sani, fu di a de wan pisi fu a ofrandi di bron nanga faya gi MASRA.

₁₁No wan graan-ofrandi, di yu e tyari kon gi MASRA, sa meki nanga dyesi. Bika no wan sani di meki nanga dyesi noso oni, yu sa bron nanga faya leki ofrandi gi MASRA. ₁₂Yu kan tyari den kon gi MASRA, te yu e tyari den fosi nyanyan fu a gron kon. Ma den no sa bron tapu a altari leki wan switi smeri. ₁₃Yu sa poti sowtu gi ibri graan-ofrandi, leki wan marki fu a ferbontu fu unu nanga Gado. Un sa poti sowtu gi ala ofrandi.

₁₄Efu yu wan gi MASRA wan graan-ofrandi fu den fosi nyanyan fu yu gron, dan a mus de fu karu di losi tapu faya. Den ai fu a karu mus masi finifini. ₁₅Yu sa kanti oli na en tapu èn yu sa poti wierook di e smeri switi na en tapu tu. Na so yu mus du te yu wani tyari en kon leki graan-ofrandi. ₁₆A priester sa teki pikinso fu a karu di masi fin'fini, pikinso oli nanga ala a wierook, dan a bron en tapu a altari. Dan a sa de leki na a heri ofrandi bron. Na wan ofrandi di bron nanga faya gi MASRA.