Dag 29 van 365- Exodus 21-22 en Matteüs 19

₁“Disi na den sani na san den mus hori densrefi.

₂Te yu bai wan Hebrewsrafu, a sa wroko siksi yari gi yu. Ma a di fu seibi yari a kan gwe leki wan fri sma sondro fu a pai yu wan sani. ₃Efu na en wawan ben kon, a sa gwe en wawan baka. Ma efu a ben trow, a sa gwe nanga en frow. ₄Efu na en basi ben gi en wan frow èn a frow disi kisi pikin gi en, dan a frow nanga den pikin e tan fu a basi. En wawan sa gwe. ₅Efu na a srafu srefi taki: Mi lobi mi basi, mi frow nanga mi pikin. Mi no wani gwe leki wan fri man, ₆dan en basi sa tyari en go na fesi Gado. En basi sa poti en tnapu na a doro noso a postu fu a doro, dan a boro en yesi nanga wan fini sani. Dan a srafu sa tan dini en basi so langa a e libi.

₇Efu wan sma seri en umapikin leki srafu, a umapikin dati no o man gwe leki wan fri uma leki den manwan. ₈Efu en basi ben bai en leki frow gi ensrefi ma en basi no wani en moro, dan a mus meki den bai en puru baka. A no abi a leti fu seri en gi doroseisma fu di a no libi nanga a uma leki fa a ben musu. ₉Efu na gi en manpikin a ben bai a uma, dan a mus gi en den srefi leti di en eigi umapikin ben o abi. ₁₀Efu a basi teki ete wan tra uma, a sa tan sorgu gi nyanyan nanga krosi fu a fosiwan. A sa tan go nanga en na bedi tu leki fa den ben gwenti. ₁₁Efu a no hori ensrefi na den dri sani disi, dan a uma kan gwe sondro fu wan sma pai wan sani gi en.

₁₂A sma di naki wan trawan sowan fasi taki a trawan dede, mus dede tu. ₁₃Efu a no ben poti na en ede fu kiri a trawan, ma na Mi meki a ongoloku miti en, dan Mi sa sori yu wan presi pe a kan lowe go. ₁₄Ma efu na sidon a sma ben sidon prakseri na fesi fa a o kisi a trawan kiri, dan un kan puru en na Mi altari srefi tyari go kiri.

₁₅A sma di naki en m'ma noso en p'pa mus dede.

₁₆A sma di teki wan trawan tyari gwe sondro fu a trawan wani, mus dede. A no abi trobi efu a ben seri a trawan kba noso efu den kon feni a trawan na en ete.

₁₇A sma di fluku en m'ma noso en p'pa mus dede.

₁₈Efu tu man meki trobi, dan a wan naki a trawan sowan fasi nanga kofu noso nanga wan ston taki a trawan no dede ma a abi fu tan na bedi fu wan pisten, ₁₉dan a wan di naki no sa kisi strafu efu a trawan man opo waka na dorosei baka nanga en wakatiki. A sa abi fu pai soso gi den dei di a trawan ben abi fu tan na bedi nanga gi a paiman di meki fu a trawan kon betre.

₂₀Efu wan sma naki wan mansrafu noso wan umasrafu fu en sowan fasi nanga wan tiki taki a srafu kon dede, a basi dati mus kisi strafu. ₂₁Ma efu a srafu tan libi wan noso tu dei ete, a basi dati no sa strafu moro fu di a lasi wan sani di ben de fu en.

₂₂Efu tu man e feti, dan wan fu den pusu wan uma nanga bere taki a uma lasi a bere, ma noti no psa moro fara nanga a uma, dan a man di pusu a uma mus pai wan butu. A man fu a uma sa taki o hei a butu mus de èn krutubakra sa luku taki a butu pai. ₂₃Efu a uma kisi tra mankeri tu taki a dede, dan a man di pusu a uma mus dede tu. ₂₄Efu na broko a broko a uma en ai, den mus broko en ai tu. Efu na broko a broko a tifi fu a uma, den mus broko en tifi tu. Efu na wan anu a broko fu a uma, den mus broko en anu tu. Efu na wan futu fu a uma a broko, den mus broko en futu tu. ₂₅Efu na wan koti a gi a uma, den mus gi en wan koti tu. Efu na wan soro a gi a uma, den mus gi en wan soro tu. Efu na wan marki a gi a uma na en skin, den mus gi en wan marki na en skin tu.

₂₆Efu wan basi naki a ai broko fu wan mansrafu noso fu wan umasrafu fu en, dan a mus libi a srafu dati meki a gwe. ₂₇Efu na wan tifi a naki broko fu wan mansrafu noso fu wan umasrafu fu en, dan a mus libi a srafu dati meki a gwe.

₂₈Efu wan bulu buku wan man noso wan uma sowan fasi taki a sma dede, den mus fringi ston kiri a bulu dati èn den no mus nyan a meti fu en. A basi fu a bulu no abi fu pai noti. ₂₉Efu a bulu ben gwenti e buku sma èn den ben warskow a basi fu en kba ma a no hori ai tapu a bulu fu en, dan den sa fringi ston kiri a bulu nanga en basi efu a bulu kiri wan man noso wan uma. ₃₀Efu na pai a mus pai wan moni fu den no kiri en, dan a sa abi fu pai ala san den taigi en fu pai, fu kan tan na libi. ₃₁Den srefi sani di mus du te a bulu buku wan man noso wan uma den mus du tu te a buku wan manpikin noso wan umapikin. ₃₂Ma efu a bulu buku wan mansrafu noso wan umasrafu, den mus fringi ston kiri a bulu, èn a basi fu a bulu abi fu pai dritenti pisi solfrumoni na a basi fu a srafu.

₃₃Efu wan sma opo wan peti noso a diki wan peti sondro fu a tapu a olo èn wan kaw noso wan buriki fadon go na ini, ₃₄a sma di abi a peti o abi fu pai a sma di abi a meti. A dede meti a kan hori.

₃₅Efu a bulu fu wan sma buku wan tra sma bulu kiri, den tu basi sa seri a libi bulu dan den prati a moni. A dede bulu den sa prati tu. ₃₆Efu a basi fu a bulu ben sabi taki a bulu ben gwenti e buku ma a no hori ai tapu a bulu fu en, dan a sa abi fu gi wan libi bulu baka ma a dede bulu a kan hori.

₅Efu wan sma libi den kaw fu en fu nyan grasi ini en wei noso ini en droifidyari, ma den kaw nyan a grasi tapu wan tra sma dyari tu, a sma di abi den kaw mus gi a moro bun pisi fu en wei noso a moro bun pisi fu en droifidyari leki paiman baka.

₆Efu wan sma leti wan faya dan a faya waka na a grangran go bron wan tra sma karu di tai poti ini bosu, noso a bron wan sma karu di ben e gro ete noso a bron a heri wei fu wan tra sma, dan a sma di leti a faya o abi fu pai fu ala sani.

₇Efu wan sma gi wan trawan moni, gowtu noso solfru sani fu hori gi en dan fufuruman fufuru den sani disi ini a trawan oso, a fufuruman o abi fu pai tu tron so furu efu den grabu en. ₈Efu den no feni a fufuruman, dan a sma di ben mus hori den sani sa abi fu go sweri fesi den krutubakra taki a no en fufuru den sani fu a trawan. ₉Efu tu sma e meki trobi fu wan kaw, wan buriki, wan skapu noso wan krabita, wan krosi noso awinsi fu sortu tra sani, fu di wan fu den e hori nomo taki a sani na fu en, a tori fu den tu sma disi mus go na den krutubakra. A sma di den krutubakra feni taki fowtu sa abi fu pai a trawan tu tron so furu.

₁₀Efu wan sma gi wan trawan wan buriki, wan kaw, wan skapu noso wan krabita noso awinsi sortu tra meti fu hori gi en, èn a meti kon dede, a kisi wan mankeri noso den fufuru en sondro fu wan sma si, ₁₁dan a sma di ben mus hori a meti o abi fu sweri ini a nen fu MASRA taki a no en fufuru a meti fu a trawan. A sma di ben abi a meti o abi fu teki san a trawan sweri. A trawan no abi fu pai gi a meti. ₁₂Ma efu na fufuru a sma di ben mus hori a meti fufuru en, dan a o abi fu pai a basi fu a meti baka. ₁₃Efu na priti wan krasi meti priti a meti di a ben mus hori, a sa tyari a dede meti kon sori a basi dan a no abi fu pai gi a dede meti.

₁₄A sma di leni wan meti fu wan trawan o abi fu pai gi a meti efu a meti kisi wan mankeri noso a kon dede, èn a basi fu a meti no ben drape. ₁₅Ma efu a basi fu a meti ben drape, dan a no abi fu pai gi a meti. Efu na yuru a ben yuru a meti, dan a ben pai kba gi a meti efu wan sani ben sa psa nanga a meti.

₁₆Efu wan man kori wan yongu uma, di noiti no sribi nanga wan man ete, nanga moi wortu fu go nanga en na bedi, a sa abi fu teki a uma leki en frow èn pai ala sani di wan man mus pai te a wan teki wan uma leki frow. ₁₇Ma efu a p'pa fu a uma no wan kwet'kweti fu a trow nanga en umapikin, dan a abi fu pai a moni di wan man mus pai fu trow nanga wan yongu uma na ini solfru moni.

₁₈Wan uma di e du tofruwroko no mus tan na libi.

₁₉A sma di go nanga wan meti na bedi, leki fa yu e go nanga wan libisma na bedi, no kan tan na libi srefsrefi.

₂₀A sma di tyari ofrandi gi tra gado boiti gi MASRA wawan, un mus kiri puru na un mindri.

₂₁Un no mus libi takru nanga wan doroseisma, no pina en bika unsrefi ben de doroseisma na ini Egipte. ₂₂Un no mus pina wan uma di masra dede kba, noso wan pikin di no abi p'pa nanga m'ma moro. ₂₃Bika Mi sa yere efu den bari kari Mi fu di un e pina den. ₂₄Dan Mi ati sa bron trutru èn Mi sa meki den kiri un na ini feti, meki den frow fu unu tron uma tu di no abi masra moro èn den pikin fu unu tron pikin di no abi p'pa nanga m'ma moro.

₂₅Te yu leni wan pôtisma fu Mi folku moni, yu no sa libi nanga en leki fa den sma e du di e leni trawan moni. Yu no sa teki moro moni na tapu a moni di yu leni en. ₂₆Efu yu teki a dyakti fu wan trawan leki panti, yu sa gi en baka fosi neti tapu. ₂₇Bika na dati wawan a abi fu tapu en skin. Nanga san a o tapu en skin dan te a e go sribi? Mi sa yere te a e bari kari Mi fu yepi. Bika Mi abi bun fasi.

₂₈Yu no sa afrontu Gado. Yu no sa fluku wan tiriman fu yu folku fu wan sani miti en.

₂₉Yu no sa draidrai fu tyari a fosi graan di yu koti ini yu gron nanga den fosi droifi di yu piki leki ofrandi. Ala fosi manpikin un sa gi Mi. ₃₀Un sa du disi tu nanga den fosi pikin fu den kaw, den skapu nanga krabita fu unu. Seibi dei den sa tan na a m'ma. Ma tapu a di fu aiti dei un sa gi Mi den. ₃₁Un sa de sma di poti aparti gi Mi. Un no sa nyan a meti di wan krasi meti priti. Un mus trowe en gi dagu.

₁Di Yesus kba taki den sani disi, A kmoto ini Galilea, dan A koti a Yordanliba abra go na Yudea. ₂Drape bun furu sma ben waka na En baka, èn A dresi ala den sikiwan na den mindri. ₃Dan wantu Fariseiman kon na Yesus fu tesi En. Den aksi En taki: “Wan man kan broko trow nanga en uma fu ala sortu sani ede?” ₄Yesus piki den taki: “Un no leisi san skrifi ini Gadobuku? A skrifi taki sensi di Gado ben meki libisma, A meki den leki man nanga uma. ₅A skrifi moro fara taki: ‘Fu dat'ede wan man sa gwe libi en m'ma nanga en p'pa fu go libi nanga en uma. Dan den tu sma disi sa de leki wan enkri sma.’ ₆So den no de tu sma moro, ma den de leki wan. Èn san Gado tyari kon na wan, libisma no mus prati.” ₇Dan den Fariseiman aksi En taki: “Ma fu sanede Moses skrifi taki efu un e broko trow nanga un uma, dan un mus gi en wan brifi taki a trow broko?” ₈Yesus piki den taki: “A no ben de so ini a bigin. Ma fu di unu no wani du san Gado taki, meki Moses gi un pasi fu broko trow. ₉Ma Mi e taigi un taki: A man di broko trow sondro taki en uma huru gi en, e libi wan huru libi efu a trow baka.”

₁₀Dan den man di ben e teki leri fu Yesus taigi En taki: “Efu na so a trow tori de, dan a moro betre fu no trow.” ₁₁Ma Yesus taigi den taki: “A no ala sma kan ferstan a sani disi, ma soso den sma di Gado wani. ₁₂Son sma gebore na sowan fasi taki den no man trow. Trawan de di na sma meki taki den no man trow. Trawan de baka di no wani trow fu den kan wroko gi Gado di e tiri den leki Kownu. Suma man ferstan, meki a ferstan a sani disi.”

₁₃Den sma ben tyari den pikin kon na Yesus fu A poti En anu na den tapu èn begi gi den. Ma den man di ben e teki leri fu Yesus bari den sma fu no du dati. ₁₄Ne Yesus taigi den taki: “Meki den pikin kon na Mi. No tapu den, bika na sma leki den pikin disi, Gado e tiri.” ₁₅Baka di Yesus poti En anu na den tapu, A gwe fu drape.

₁₆Wan man kon na Yesus, dan a aksi En taki: “Meister, sortu bun mi mus du fu kan kisi a libi fu têgo?” ₁₇Yesus piki en taki: “Fu sanede yu e aksi Mi san bun? Na Gado wawan bun. Ma efu yu wani kisi a libi fu têgo, dan yu mus hori den wèt fu Gado.” ₁₈A man aksi Yesus: “Sortu wan fu den?”

Yesus piki en taki: “Yu no mus kiri trawan, yu no mus huru, yu no mus fufuru, yu no mus lei gi trawan, ₁₉yu mus lespeki yu m'ma nanga yu p'pa, èn yu mus lobi tra sma soleki fa yu lobi yusrefi.” ₂₀A yonkuman piki Yesus taki: “Ala den wèt disi mi e hori. San e mankeri mi ete?” ₂₁Ne Yesus piki en taki: “Efu yu wani de bun sondro fowtu, go seri san yu abi, dan yu e prati a moni gi den pôtisma. So yu o abi wan gudu na heimel. Baka dati yu e kon waka na Mi baka.” ₂₂Di a yonkuman yere san Yesus taki, a gwe nanga sari, bika a ben abi furu gudu.

₂₃Dan Yesus taigi den man di ben e teki leri fu En taki: “Fu tru Mi e taigi un taki: A sa tranga gi wan guduman fu a poti ensrefi ondro a tiri fu Gado. ₂₄Mi e taigi unu ete wan leisi taki: A moro makriki gi wan asaw fu psa ini wan nanai-olo, dan fu wan guduman poti ensrefi ondro a tiri fu Gado.” ₂₅Di den man di ben e teki leri fu Yesus yere a sani dati, den ferwondru srefsrefi. Den aksi En taki: “Suma Gado o man ferlusu dan?” ₂₆Yesus luku den man di ben e teki leri fu En, dan A taigi den taki: “Libisma no man du en, ma Gado kan du ala sani.” ₂₇Dan Petrus taki: “Ma luku, wi libi ala sani san wi ben abi fu waka na Yu baka. Sortu pai Gado o gi wi dan?” ₂₈Yesus piki den taki: “Fu tru Mi e taigi un taki: Te a Manpikin fu Libisma o meki ala sani kon nyun baka, dan A sa sidon tapu En kownusturu san e sori taki A abi ala makti. Dan unu di waka na Mi baka sa sidon tapu twarfu kownusturu fu tiri den twarfu lo fu Israel. ₂₉Èn ibri sma di libi en oso, en brada nanga en s'sa, en m'ma nanga en p'pa, en pikin nanga en gron fu Mi ede, sa kisi hondro tron so moro leki san a ben libi. Èn a sa kisi a libi fu têgo. ₃₀Ma furu fosiwan o tron lastewan, èn furu lastewan o tron fosiwan.”