Dag 30 van 365- Exodus 23-24 en Matteüs 20:1-16

₁No panya nyunsu di no tru. No lei fu yepi wan sma di du wan sani di no bun. ₂No du sani di no bun awinsi furu trawan e du en. Yu no sa lei tu fesi krutubakra awinsi furu trawan du dati fu kenki a tru. ₃Te yu de na wan krutu yu no mus de na wan sma sei fu di a pôti.

₄Efu wan kaw noso wan buriki fu yu feyanti lasi dan yu feni en, yu sa tyari en go gi en.

₅Te yu si taki a buriki fu yu feyanti no abi krakti fu tyari den lai moro fara, yu no sa luku dan yu libi en leki noti no psa. Yu sa yepi en fu saka den lai.

₆Yu no sa lei fesi krutubakra fu di a trawan na wan pôti sma. ₇No tyari kragi kon na fesi di no tru. Yu no sa meki wan bun sma di no du noti dede, bika Mi no sa libi a sma di du dati fu soso. ₈Yu no sa teki tyuku tu. Bika a tyuku o meki yu tapu yu ai gi sani èn yu no o taki sani leki fa den de.

₉No pina wan doroseisma, bika un sabi fa wan doroseisma e firi fu di unsrefi ben de doroseisma na ini Egipte.

₁₀Siksi yari langa un sa prani un gron èn koti nyanyan. ₁₁Ma a di fu seibi yari un sa libi a gron didon fu a rostu. Dan so den pôtiwan kan feni wan sani fu nyan tu. San den pôtiwan libi den meti sa nyan di e libi ini den wei. A srefi sani yu sa du nanga yu droifidyari èn nanga den oleifbon fu yu.

₁₂Siksi dei de fu yu du yu wroko, ma tapu a di fu seibi dei yu sa rostu. Dan so yu kaw nanga yu buriki kan rostu tu èn a manpikin fu yu umasrafu nanga den doroseisma kan teki bro.

₁₃Un hori unsrefi na ala sani di Mi taigi unu. Un no sa kari a nen fu tra gado. Den no sa kmoto ini un mofo.

₁₄Dri leisi ini a yari un sa hori wan fesa gi Mi. ₁₅Un mus hori a fesa pe un e nyan brede di meki sondro dyesi. Leki fa Mi taigi unu dan seibi dei langa un sa nyan brede di meki sondro dyesi. Disi musu psa ini a mun Abib tapu a ten di Mi taigi unu, bika na ini a mun dati un ben hari kmoto na ini Egipte. Ma den sma no sa kon na Mi fesi nanga leigi anu. ₁₆Un mus hori a fesa tu te un koti den fosi nyanyan fu den sani di un ben sai na ini un gron. Na a kba fu a yari un mus hori a fesa te un e tyari a nyanyan fu un gron kon inisei. ₁₇Dri leisi ini a yari ala mansma sa kon na fesi Masra fu MASRA.

₁₈Te un srakti wan meti leki ofrandi gi Mi, un no sa poti a brudu fu en makandra nanga wan sani di meki nanga dyesi. Un no sa libi a fatu fu den meti di un srakti leki ofrandi gi Mi tapu den fesadei, te leki a tra dei.

₁₉Te un koti den fosi nyanyan fu un gron un sa tyari den moro bun wan kon na a oso fu MASRA, un Gado.

Un no sa bori wan pikin bokoboko ini a merki fu a m'ma.

₂₀Arki, Mi o seni wan engel go na un fesi fu kibri un na pasi èn fu tyari un go na a presi di Mi poti klari gi unu. ₂₁Un arki san a e taigi unu. Un no tranga un yesi gi en bika a no sa gi un pardon te un no du san a taki, fu di a e du sani ini Mi nen. ₂₂Efu un arki en, èn efu un e du ala sani san Mi taki, dan den feyanti fu unu sa de Mi feyanti èn Mi no sa lobi den wan di no lobi unu. ₂₃A engel fu Mi sa go na un fesi. A sa tyari un go na a kondre fu den Amoritisma, den Hetitisma, den Perisitisma, den Kananitisma, den Hiwitisma nanga den Yebusitisma. Ma Mi sa puru den na pasi. ₂₄Un no mus boigi gi den gado fu den èn un no mus dini den. No du den sani di den e du. Un mus broko den gado fu den trowe. Un mus broko den ston pis'pisi pe den e anbegi den gado. ₂₅Un mus anbegi MASRA, un Gado. Dan A sa blesi a watra nanga a brede fu unu. Mi sa kibri unu gi siki tu. ₂₆No wan umasma ini a kondre sa lasi bere. No wan no o de tu di no o man kisi pikin. Mi sa gi un langa libi.

₂₇Mi sa meki den folku frede gi Mi fosi un doro drape. Mi sa meki ala den folku bruya nanga san un o miti. Mi sa meki den feyanti fu unu lon gi unu. ₂₈Mi sa seni marbonsu go na un fesi fu yagi den Hiwitisma, den Kananitisma nanga den Hetitisma. ₂₉Mi no o yagi den ini wan yari, soso fu a kondre no tron wan sabana èn fu den krasi meti no kon furu tumsi gi unu. ₃₀Safrisafri Mi o yagi den gwe, te leki un kon so furu taki un kan teki a heri kondre. ₃₁Mi sa gi unu a kontren kmoto fu a Riet Se go miti a Se fu den Filistijnsma èn fu a dreisabana go miti a Eufratliba. Bika Mi sa gi den sma fu a kondre abra ini un anu fu un yagi den. ₃₂Un no sa meki ferbontu nanga den noso nanga den gado fu den. ₃₃Den no mus tan libi ini a kondre fu unu, noso den o kisi unu meki un sondu fu dini den gado fu den. Na a sani dati o broko un neki.”

₁Baka dati MASRA taigi Moses taki: “Kren kon miti MASRA. Yu, Aaron, Nadab, Abihu nanga seibitenti fu den fesiman fu Israel. Ma un no mus kon tumsi krosbei fu boigi gi Mi. ₂Yu wawan sa kon moro krosbei fu MASRA. Den trawan no sa kon krosbei. A folku no sa kren kon nanga den tu.”

₃Moses go taigi a folku ala den sani di MASRA taigi en, nanga ala den sani na san den ben mus hori densrefi. Ne a heri folku piki taki: “Wi sa du ala den sani di MASRA taigi unu fu du.” ₄Moses skrifi ala den sani di MASRA taki. Fruku mamanten a bow wan altari na a futu fu a bergi nanga twarfu ston di a ben poti tnapu let'opu. Ibri ston ben de gi wan fu den twarfu lo fu Israel. ₅Moses seni wantu yonkuman tu fu go teki meti kon fu bron leki ofrandi. Dan den srakti bulu leki freide-ofrandi gi MASRA. ₆Baka dati Moses poti afu fu a brudu ini beki. A tra afu a fringi tapu a altari. ₇Dan Moses teki a buku fu a ferbontu. A leisi en meki a heri folku yere dan den piki taki: “Wi yere san MASRA taki èn wi sa du ala den sani di A taigi unu fu du.” ₈Ne Moses teki a brudu, a fringi en tapu a folku dan a taki: “Luku, a brudu disi e stampu a ferbontu di MASRA e sroto nanga unu, baka di A taki ala den sani disi.”

₉Dan Moses, Aaron, Nadab nanga Abihu makandra nanga seibitenti fu den fesiman fu Israel kren go tapu a bergi. ₁₀Ne den si a Gado fu Israel. A ben gersi leki a ben tnapu tapu Lazuurston di ben blaw leki a heimel. ₁₁Ma Gado no du den prenspari man disi fu Israel noti. Den si Gado èn den nyan èn den dringi.

₁₂Dan MASRA taigi Moses taki: “Kren a bergi kon na Mi, dan yu mus wakti drape. Dan Mi sa gi yu den plata ston nanga a wèt nanga den gebod di Mi skrifi, fu yu leri a folku.” ₁₃So Moses nanga en knekti Yosua opo, dan Moses kren go tapu a bergi. ₁₄A taigi den fesiman taki: “Un tan wakti dyaso na wi tapu te leki wi drai kon baka. Aaron nanga Hur de nanga unu. Efu wan tak'taki de den sma kan go na den.”

₁₅Baka dati Moses kren go tapu a bergi fu Gado, dan a wolku tapu a bergi. ₁₆A glori fu MASRA ben tapu a bergi Sinai. Siksi dei langa a wolku ben tapu a bergi. Tapu a di fu seibi dei Masra kari Moses fu ini a wolku. ₁₇Den Israelitisma ben man si a glori fu MASRA tapusei fu a bergi. A ben de leki wan faya di e bron ala sani. ₁₈Moses go ini a wolku dan a kren a bergi go moro fara. Fotenti dei nanga fotenti neti a tan na tapu a bergi.

₁“Un kan si a fasi fa Gado e tiri libisma leki wan man di abi wan gron. Fruku mamanten a go suku wrokoman fu kon wroko gi en ini en droifidyari. ₂A meki mofo nanga den wrokoman fu pai den wan deimoni, dan a seni den go ini en droifidyari. ₃Neigi yuru mamanten a man go na strati, dan a si tra wrokoman e tnapu na wowoyo di no ben feni wroko ete. ₄Ne a man taigi den taki: ‘Un go wroko na ini mi droifidyari tu. Mi sa pai un san fiti.’ ₅So den man go. Twarfu yuru nanga dri yuru bakadina a man go na strati baka, dan a du a srefi sani. ₆Di a go feifi yuru bakadina na strati, a miti tra wrokoman di ben tnapu drape ete. Dan a aksi den taki: ‘Fu sanede un tnapu heri dei dya sondro fu wroko?’ ₇Den man piki en taki: ‘Bika no wan sma kon aksi unu fu go wroko gi en.’ Ne a man taigi den taki: ‘Un go wroko tu na ini mi droifidyari.’ ₈Di neti tapu, a basi fu a droifidyari taigi en fesiman taki: ‘Kari den wrokoman, dan yu pai den. Bigin na den lastewan di kon wroko, go na den fosiwan.’ ₉Di den man kon di ben bigin wroko feifi yuru, den kisi a moni fu wan heri dei. ₁₀So den man di ben bigin wroko fruku mamanten prakseri taki den ben o kisi moro furu. Ma ibriwan fu den kisi soso a moni fu wan dei. ₁₁Di den kisi a moni, den bigin krutukrutu nanga a basi. ₁₂Den taki: ‘Den man di kon leki laste, wroko wan yuru nomo. Ma unu ben wroko tranga heri dei ini a faya son. Dan fa yu kan gi den a srefi moni leki unu?’ ₁₃Ma a man piki wan fu den taki: ‘Mi mati, mi no bedrigi yu. Un ben meki mofo taki mi ben o pai yu wan deimoni. ₁₄So yu kan teki yu moni, dan yu gwe. Na mi wani gi den lastewan a srefi leki yu. ₁₅Mi kan du nanga mi moni san mi wani. Na dyarusu yu e dyarusu fu di mi e du trawan bun?’ ” ₁₆Dan Yesus taigi den sma taki: “Den lastewan sa tron den fosiwan, èn den fosiwan sa tron den lastewan.”