Dag 33 van 365- Exodus 29-30 en Matteüs 21:23-46

₁Disi na san yu mus du fu santa Aaron nanga den manpikin fu en, fu den du a priesterwroko gi Mi. Teki wan yongu bulu nanga tu man skapu. Noti no mus du den man skapu. ₂Yu mus teki brede nanga kuku di meki fu tarweblon, di no abi dyesi èn di masi nanga oli. Moro fara yu mus teki kuku di meki fu tarweblon, di no abi dyesi èn gi san den lobi oli di a kba baka. ₃Poti den ini wan baskita, dan yu e tyari den kon makandra nanga a bulu nanga den tu man skapu.

₄Meki Aaron nanga den manpikin fu en kon tu na mofodoro fu a tenti pe yu kan miti nanga Gado, dan yu e wasi den nanga watra. ₅Baka dati yu mus teki den krosi, dan yu e weri den gi Aaron: A langa ondrokrosi, a langa empi, a efod nanga a saka di e kon tapu en borsu. Tai a banti fu a efod lontu en bere. ₆Lontu en ede tu nanga a duku nanga san a mus lontu en ede, dan yu e fasi a santa bromki na en. ₇Dan yu mus teki salfu-oli dan yu e kanti en tapu en ede fu salfu en. ₈Baka dati yu mus meki den manpikin fu en kon dan yu e weri a langa ondrokrosi gi den. ₉Tai a banti lontu a bere fu Aaron nanga den manpikin fu en, dan yu e tai a duku lontu den ede. Tapu a fasi disi yu e poti a frantwortu fu a wroko ini anu fu Aaron nanga den manpikin fu en. A priesterwroko na wan sani di den sa tan du gi Mi.

₁₀Baka dati yu mus meki a bulu kon fesi a tenti pe yu kan miti nanga Gado. Dan Aaron nanga den manpikin fu en sa poti den anu tapu a ede fu a bulu. ₁₁Kiri a bulu na MASRA fesi, na mofodoro fu a tenti pe yu kan miti nanga Gado. ₁₂Teki pikinso fu a brudu fu a bulu dan yu e lobi en nanga yu finga na den tutu fu a altari. Ala a tra brudu yu sa kanti na a futu fu a altari. ₁₃Teki ala a fatu san e de ini a inibere, a fatu fu a lever, den niri nanga a fatu fu den niri dan yu e bron den tapu a altari. ₁₄A meti fu a bulu, a buba fu en nanga a inibere yu sa bron na dorosei fu a kampu. Na wan ofrandi fu kisi pardon fu sondu.

₁₅Teki wan fu den man skapu dan yu e meki Aaron nanga den manpikin fu en poti den anu tapu a ede fu en. ₁₆Baka dati yu sa srakti a man skapu dan yu e fringi a brudu fu en lontu a altari. ₁₇Yu sa koti a man skapu pis'pisi. Wasi a inibere nanga den futu dan yu e poti den tapu den pis'pisi meti nanga a ede. ₁₈Baka dati yu sa bron a heri man skapu tapu a altari. Na wan ofrandi di yu e bron gi MASRA, nanga wan switi smeri. Na wan ofrandi di bron nanga faya gi MASRA.

₁₉Teki a tra man skapu dan yu meki Aaron nanga den manpikin fu en poti den anu tapu a ede fu en. ₂₀Baka dati yu sa srakti a man skapu. Teki pikinso fu a brudu dan yu e lobi en na a let'sei yesibuba fu Aaron nanga den manpikin fu en. Moro fara yu mus lobi pikinso brudu gi a doi fu den let'anu nanga gi a bigidoi fu den let' futu. San tan abra fu a brudu yu mus fringi lontu a altari. ₂₁Teki pikinso fu a brudu tapu a altari nanga fu a salfu-oli, dan yu e dropudropu en tapu Aaron, tapu en krosi, tapu den manpikin fu en nanga tapu a krosi fu den manpikin fu en. Dan Aaron nanga en krosi sa santa. Den manpikin fu en nanga den krosi fu den sa santa tu.

₂₂Fu a man skapu disi yu mus teki a fatu, a tere, a fatu san de ini a inibere, a fatu fu a lever, den niri, a fatu fu den niri, nanga a let'sei bowtu. A man skapu disi sa de wan ofrandi fu gi Aaron a frantwortu fu a wroko. ₂₃Ini a mantyi di un tyari kon na Mi fesi yu mus puru wan brede, wan kuku di masi nanga oleif-oli nanga wan kuku gi san den lobi oleif-oli di a kba baka. ₂₄Poti ala den sani disi ini den anu fu Aaron nanga den manpikin fu en, dan yu e meki den opo den kon na loktu na Mi fesi leki wan ofrandi. ₂₅Baka dati yu sa teki den sani baka, dan yu e bron den tapu a tra ofrandi di ben de tapu a altari kba. A sa de leki wan switi smeri na MASRA fesi. Na wan ofrandi di bron nanga faya gi MASRA. ₂₆Teki a borsu fu a man skapu di yu ben tyari leki ofrandi fu gi Aaron a frantwortu fu a wroko, dan yu e opo en go na loktu leki wan ofrandi na Mi fesi. A pisi fu a ofrandi disi na fu yu. ₂₇Yu mus hori a borsu nanga a baka bowtu aparti, fu a man skapu di yu ben tyari leki ofrandi fu gi Aaron nanga den manpikin fu en a frantwortu fu a wroko èn di yu ben opo kon na loktu gi Mi. ₂₈Den sa de gi Aaron nanga den manpikin fu en. A sa de wan sani di den Israelitisma mus tan du. Den pisi disi fu den freide-ofrandi di den e tyari gi MASRA sa de gi Aaron nanga den manpikin fu en.

₂₉Den santa krosi fu Aaron sa go na den bakapikin fu en te a no e du a priesterwroko moro. Na ini den krosi disi den sa salfu èn kisi a frantwortu fu a wroko. ₃₀A manpikin fu en di teki en presi leki priester, sa weri den krosi disi seibi dei langa te a e kon ini a tenti pe yu kan miti nanga Gado, fu kon du en wroko na ini a santa presi.

₃₁A meti fu a man skapu yu mus bori tapu wan aparti presi. ₃₂Aaron nanga den manpikin fu en sa nyan a meti fu a man skapu nanga a brede di de ini a mantyi na mofodoro fu a tenti pe yu kan miti nanga Gado. ₃₃Den sa nyan den sani di ben de fanowdu fu meki en bun nanga Mi, fu gi den a frantwortu fu a wroko èn fu poti den aparti. Wan tra sma di no abi a leti fu nyan fu den, no sa nyan den bika na wan santa sani. ₃₄Efu meti nanga brede, di ben de fanowdu fu gi den a frantwortu fu a wroko, tan abra te a tra dei, yu mus bron den nanga faya. Den no sa nyan en moro bika na wan santa sani.

₃₅Du ala sani gi Aaron nanga den manpikin fu en leki fa Mi taigi yu fu du. Yu mus teki seibi dei fu meki den klari fu gi den a frantwortu fu a wroko ₃₆Ala dei yu sa tyari wan bulu leki ofrandi fu den kisi pardon fu den sondu, fu meki en bun nanga Mi èn fu krin a altari. Yu mus salfu a altari fu a kan santa. ₃₇Seibi dei langa yu sa santa a altari. Baka dati a altari sa santa srefsrefi. Ala sma di fasi en sa kon santa tu.

₃₈Ala dei yu sa tyari tu yongu skapu fu wan yari leki ofrandi tapu a altari. ₃₉Wan fu den yu sa tyari mamanten leki ofrandi, a trawan te neti e fadon. ₄₀Makandra nanga a fosi skapu yu sa tyari tu kilo fu a moro bun blon. A blon disi mus moksi nanga wan liter fu a moro bun oleif-oli. Moro fara yu mus kanti wan liter win leki ofrandi tu. ₄₁A tra skapu yu sa tyari leki ofrandi te neti e fadon. Yu mus tyari wan graan-ofrandi te neti tu leki fa yu e du te mamanten èn yu mus kanti win tu leki ofrandi. A sa de leki wan switi smeri. Na wan ofrandi di bron nanga faya gi MASRA. ₄₂A mus de wan ofrandi di den bakapikin fu unu mus tyari aladei fesi Masra, na mofodoro fu a tenti pe yu kan miti nanga Gado. Drape Mi sa miti nanga unu fu taki nanga yu. ₄₃Mi sa miti drape nanga den Israelitisma èn a glori fu Mi sa meki a presi kon santa. ₄₄Mi sa meki a tenti pe yu kan miti nanga Gado nanga a altari kon santa, èn Mi sa poti Aaron nanga den manpikin fu en aparti fu du a priesterwroko gi Mi. ₄₅Mi sa libi mindri den Israelitisma èn Mi sa de den Gado. ₄₆Dan den sa kon sabi taki Mi MASRA, na den Gado, di puru den ini a kondre fu Egipte fu libi na den mindri. Mi na MASRA, den Gado.

₁Meki wan altari fu bron wierook. A altari sa meki fu acacia-udu. ₂A mus fokanti. A mus langa èn a mus bradi wan afu meter. A mus hei wan meter. Den tutu sa de wan nanga a altari. ₃Yu sa tapu en nanga lala gowtu fu tapusei nanga fu seisei. Den tutu fu en mus tapu nanga gowtu tu. Meki wan gowtu banti lontu en. ₄Yu mus meki tu gowtu linga gi en na ala tu sei ondro a banti. Den linga disi na fu hori den tiki nanga san den mus syow a altari. ₅Den syowtiki mus meki fu acacia-udu èn yu mus tapu den nanga gowtu.

₆Poti a altari fesi a garden di anga fesi a kisi fu a ferbontu, fesi a tapun pe Mi nanga yu o miti. ₇Ala mamanten te Aaron e sorgu gi den lampu, a sa bron wierook di e smeri switi na en tapu. ₈Aaron sa du disi tu te a e leti den lampu te neti e fadon. A sa bron wierook di e smeri switi na MASRA fesi. Disi na wan sani di den bakapikin fu den Israelitisma mus tan du. ₉No wan tra sortu wierook di e smeri switi noso ofrandi di e bron nanga faya sa bron tapu a altari. A graan-ofrandi nanga a win di un e kanti leki ofrandi gi Mi no sa kon na en tapu tu. ₁₀Wan leisi wan yari Aaron sa teki pikinso fu a brudu fu a ofrandi di mus meki un kisi pardon fu un sondu. A mus lobi en gi den tutu fu a altari fu santa a altari. Na wan sani di mus du wan leisi ala yari èn di den bakapikin fu un mus tan du. A altari na wan tumsi santa sani gi MASRA.”

₁₁MASRA taigi Moses taki: ₁₂“Te yu e teri den Israelitisma, ibrisma sa pai MASRA wan moni gi en libi, fu wan strafu no kon na den tapu te yu e teri den. ₁₃Ibrisma di teri sa gi wan afu sikkel solfru. A mus wegi leki fa un e wegi den sani di de fanowdu gi a santa presi. Drape wan sikkel na tutenti gera. Den sa gi wan afu sikkel leki wan spesrutu ofrandi na MASRA. ₁₄Ibri sma di den teri, fu tutenti yari nanga moro owru, sa gi a spesrutu ofrandi disi na MASRA. ₁₅A guduman nanga a pôtiman sa gi a srefi. Den sa gi wan afu sikkel leki spesrutu ofrandi gi den libi fu meki en bun nanga MASRA. ₁₆A moni di den Israelitisma gi fu meki en bun nanga Mi, yu mus teki gi a wroko ini a tenti pe yu kan miti nanga Gado. A sa tan memre MASRA taki den Israelitisma meki en bun nanga en.”

₁₇MASRA taigi Moses taki: ₁₈“Meki wan kopro beki nanga wan futupisi fu kopro. Poti en na mindri fu a tenti pe yu kan miti nanga Gado nanga a altari, dan yu e furu en nanga watra. ₁₉Nanga a watra disi Aaron nanga den manpikin fu en sa wasi den anu nanga den futu. ₂₀Den mus du en te den e kon ini a tenti pe yu kan miti nanga Gado nanga te den e kon fu du den wroko na a altari fu bron wan ofrandi gi MASRA. ₂₁Den mus fu wasi den anu nanga den futu noso den o dede. Disi sa de wan sani di en nanga den bakapikin fu en mus tan du fu têgo.”

₂₂MASRA taigi Moses taki: ₂₃“Teki den moro fini spesrei: feifi hondro sikkel fu a moro bun mirre. Tu hondro nanga feifitenti sikkel kaneri di e smeri switi, dati na afu so furu leki a mirre. Nanga tu hondro nanga feifitenti sikkel kalmoes. ₂₄Moro fara yu mus teki feifi hondro sikkel kasie nanga fo liter oleif-oli. Den mus wegi leki fa un e wegi den sani di de fanowdu gi a santa presi. ₂₅Meki wan santa salfu-oli nanga den sani disi, leki fa wan man di e meki switi smeri ben o meki en. A sa de wan santa salfu-oli. ₂₆Salfu a tenti pe yu kan miti nanga Gado, nanga a kisi fu a ferbontu. ₂₇Salfu a tafra nanga ala en wrokosani, a kandelaar nanga ala en wrokosani nanga a altari fu bron wierook. ₂₈Salfu a altari pe a ofrandi mus bron nanga ala den wrokosani fu en, a beki pe anu nanga futu mus wasi, nanga a futupisi fu a beki. ₂₉Salfu den sani disi meki den de trutru santa sani. Ala sani di miti nanga den sa kon santa tu. ₃₀Salfu Aaron nanga den manpikin fu en tu èn poti den aparti fu den du a wroko leki priester. ₃₁Yu sa taigi den Israelitisma taki: ‘Fu têgo disi na wan santa salfu-oli gi MASRA. ₃₂A no sa kanti tapu a skin fu wan libisma èn noiti den sa meki wan sani tapu a srefi fasi disi. Na wan santa sani. A sa de wan santa sani gi unu. ₃₃A sma di meki sowan salfu noso poti en gi wan sma di no fiti fu kisi en, den mus yagi fu têgo kmoto na mindri fu den Israelitisma.’ ”

₃₄MASRA taigi Moses taki: “Yu mus teki spesrei nanga switi smeri leki hars, onyx nanga galbanum. Na spesrei nanga switi smeri. Teki soifri wierook tu dan yu e moksi ala sani. Someni leki yu poti fu a wan yu mus poti fu ala trawan tu. ₃₅Meki wan switismeri fu den. Moksi den leki fa wan man di e meki switismeri e du. Poti sowtu gi en tu. A mus soifri èn a mus santa. ₃₆Masi pikinso fu en finifini dan yu e poti en fesi a kisi fu a ferbontu, ini a tenti pe yu kan miti nanga Gado. ₃₇Yu no sa meki switismeri gi yusrefi leki fa yu meki a disi. A disi sa de wan santa wan gi MASRA wawan. ₃₈A sma di meki switismeri leki a disi fu prisiri nanga a smeri fu en, den mus yagi fu têgo kmoto na mindri fu den Israelitisma.”

₂₃Di Yesus doro na a tempel, A bigin gi den sma leri. Dan den prenspari priester nanga den fesiman fu a folku, kon aksi En taki: “Pe Yu feni a leti fu du den sani san Yu e du? Suma gi Yu a makti fu du den sani disi?” ₂₄Yesus piki den taki: “Mi wani aksi un wan sani tu. Efu un piki Mi, dan Mi sa taigi unu suma gi Mi a makti fu du den sani san Mi e du.” ₂₅Dan A aksi den taki: “Suma ben gi Yohanes a makti fu dopu sma? Gado noso libisma?” Den man taki a tori nanga makandra. Den taki: “Efu un taki: ‘Na Gado,’ dan A o aksi unu: ‘Fu sanede un no ben bribi en dan?’ ₂₆Ma efu un taki: ‘Na libisma,’ dan den sma ati o bron na un tapu, bika den e si Yohanes leki wan profeiti.” ₂₇So den piki Yesus taki: “Un no sabi.” Ne Yesus taigi den taki: “We, dan Mi srefi no o taigi unu pe Mi feni a leti fu du den sani disi.”

₂₈Dan Yesus taigi den taki: “San un e prakseri fu a tori disi? Wan man ben abi tu boi. A go na a fosiwan, dan a taigi en taki: ‘Mi boi, go wroko tide ini a droifidyari.’ ₂₉A boi piki taki: ‘Mi no wani.’ Ma bakaten en konsensi fon en, dan a go. ₃₀Dan a p'pa go na a trawan, dan a taigi en a srefi sani. A dati piki en p'pa taki: ‘A bun, p'pa.’ Ma a no go.” ₃₁Dan Yesus aksi den man taki: “Sortu wan fu den tu boi du a wani fu den p'pa?” Den piki taki: “A fosi wan.” Ne Yesus taigi den taki: “Fu tru Mi e taigi un taki: Den man di e piki lantimoni nanga den uma di e huru, sa kon fosi unu ondro a tiri fu Gado. ₃₂Bika Yohanes ben sori un fa un kan kon bun ini Gado ai, ma un no bribi en. Ma den man di e piki lantimoni nanga den uma di e huru, bribi en. Un si dati, ma toku un no kenki un prakseri bakaten fu bribi en tu.”

₃₃Yesus taigi den man moro fara taki: “Un yere wan tra agersitori. Wan man ben prani droifibon ini en gron. A skotu en lontu, dan a mesre wan baki pe den ben kan masi den droifi te den lepi. Dan a meki wan wakti-oso san ben bow go na loktu. Baka dati a yuru a droifidyari gi tra sma, dan a go na wan tra kondre. ₃₄Di a ten doro fu piki den droifi, a seni wantu knekti fu en go teki den droifi san a ben mus kisi na den man di ben yuru a droifidyari. ₃₅Ma den man grabu den knekti. Den fon wan fu den, den kiri wan trawan èn den fringi ston na tapu a di fu dri. ₃₆Baka dati a man seni tra knekti go, moro furu leki a fosi leisi. Ma den man du den srefi sani nanga den tu. ₃₇Te fu kba, a man seni en manpikin go na den. A prakseri taki: ‘Den no sa du den sani dati nanga mi manpikin.’ ₃₈Ma di den man di ben yuru a gron si a manpikin, den taigi makandra taki: ‘Na a boi disi o kisi a gron te en p'pa dede. Kon meki un kiri en, dan unu o kisi a gron.’ ₃₉So den grabu a boi, den srepi en go na dorosei fu a droifidyari, dan den kiri en.” ₄₀Ne Yesus aksi den man taki: “San un e prakseri taki a man di abi a droifidyari o du nanga den man te en srefi kon?” ₄₁Den man piki Yesus taki: “A o meki den takru-ati man disi dede wan moro hati dede. Dan a o yuru a droifidyari gi tra sma di sa gi en den droifi te a mus kisi den.” ₄₂Ne Yesus taigi den taki: “Un srefi leisi ini a Santa Buku taki:

₄₅Di den prenspari priester nanga den Fariseiman yere den agersitori fu Yesus, den kon ferstan taki na den A e taki. ₄₆Dat' meki den ben wani grabu En, ma den ben frede fu ala den sma, bika den ben e si Yesus leki wan profeiti.