1Besaleyel sa meki ala den sani di de fanowdu gi a wroko ini a santa presi, leki fa MASRA taki tak' a mus du. A sa du en makandra nanga Oholiab nanga ala tra man di sabi a wroko èn di Gado gi a koni fu du a wroko.”
2Dan Moses seni kari Besaleyel nanga Oholiab nanga ala tra man di ben sabi a wroko, di Gado ben gi koni fu du a wroko èn di ben firi fu kon du a wroko. 3Den teki ala den ofrandi na Moses, di den Israelitisma ben gi leki spesrutu ofrandi gi a wroko di ben mus du ini a santa presi. Ala mamanten sondro dwengi den sma ben e tyari sani kon ete. 4So den man di ben sabi a wroko libi a wroko di den ben e du 5dan den go taigi Moses taki: “Den sma e tyari moro sani kon leki san de fanowdu fu du a wroko di MASRA taigi wi fu du.” 6Ne Moses gi a komanderi fu den bari lontu ini a kampu taki: “No wan man noso uma no abi fu du wan sani moro gi a santa presi.” 7Bika nofo sani ben de di ben de fanowdu fu du ala a wroko. A ben furu srefi.
A santa tenti e meki
8Dan den man di ben sabi a wroko meki a santa tenti. Den meki en nanga tin duku fu diri linnen krosi, fu blaw katun, dungruredi katun nanga fayaredi katun èn den ben nai kerub na en tapu. 9Ibri duku ben langa tin-na-fo meter èn den ben bradi tu meter. 10Den fasi feifi duku kon na wan. A srefi sani den du nanga den feifi trawan. 11Den meki ai tu fu blaw katun na a wan sei lantyi fu a tenti. A srefi sani den du na a tra sei lantyi. 12Den meki feifitenti ai na a wan sei duku nanga feifitenti ai na a tra sei. Den du en so wan fasi taki den ai fu a wan duku nanga di fu a tra duku ben de abra nanga abra. 13Den meki feifitenti gowtu aka, dan den aka den tu duku kon na wan fu a santa tenti tron wan pisi.
14Den meki wan tenti tu fu erfu duku fu krabitawiwiri. A tenti disi ben o kon abra a santa tenti. 15Ibriwan fu den duku ben langa tin-na-feifi meter èn den ben bradi tu meter. Ala den erfu duku ben langa èn den ben bradi a srefi. 16Den fasi feifi fu den duku kon na wan. A srefi sani den du nanga den siksi trawan. 17Baka di den fasi den feifi duku kon na wan, den meki feifitenti ai na a lantyi fu en. Di den fasi den siksi tra duku kon na wan den meki feifitenti ai na a lantyi fu en tu. 18Dan den meki feifitenti kopro aka fu fasi a tenti kon na wan, fu a tron wan pisi. 19Den meki wan duku tu fu tapu a tenti. A duku disi ben meki fu skapububa di ben ferfi redi. Tapu a duku fu skapububa den poti ete wan duku fu krabitabuba.
20Den meki planga fu acacia-udu gi a santa tenti. Den poti den planga disi tnapu let'opu. 21Ibri planga ben langa feifi meter èn den ben bradi drikwart meter. 22Ibri planga ben abi tu pen fu ben kan fasi den kon na makandra. Ala planga fu a santa tenti ben de so. 23Den meki tutenti planga gi a zuidsei fu a santa tenti. 24Den meki fotenti futupisi di ben mus kon ondro den tutenti planga. Ibri planga ben e kisi tu futupisi. Ini den futupisi disi den tu pen fu de planga ben e kon fiti. 25Den meki tutenti planga tapu a srefi fasi tu gi a noordsei fu a santa tenti 26nanga fotenti futupisi. Ibri planga ben e kisi tu futupisi. 27Gi a bakasei fu a santa tenti di ben de na a westsei den meki siksi planga. 28Gi den uku na bakasei fu a santa tenti den meki tu planga. 29Den tu planga disi o meki den uku. Fu ondrosei go na loktu te na a linga den ben de a srefi. 30Ala nanga ala aiti planga ben de nanga tin-na-siksi futupisi. Tu futupisi gi ibri planga. 31Den meki dwarsbalk fu acacia-udu. Feifi gi den planga gi a wan sei fu a santa tenti, 32feifi gi den planga fu a tra sei fu a santa tenti nanga feifi gi den planga na bakasei fu a santa tenti di de na a westsei. 33A di fu dri dwarsbalk ben didon leti na mindribere fu den planga èn a ben e waka fu a fosi planga go te na a laste wan. 34Den tapu den planga nanga gowtu, den linga ini san den dwarsbalk ben mus kon fasi ben de fu gowtu èn den tapu den dwarsbalk nanga gowtu tu.
35A garden ben meki fu blaw katun, dungruredi katun, fayaredi katun nanga diri linnen krosi. Kerub ben nai poti na en tapu. 36Den meki fo postu fu acacia-udu gi a garden. Den postu ben tapu nanga gowtu. Den aka ben meki fu gowtu èn den ben meki fo solfru futupisi gi den postu.
37Den meki wan garden di ben o anga mofodoro fu a tenti. A ben meki fu blaw katun, dungruredi katun, fayaredi katun nanga diri linnen krosi. Moimoi sani ben nai poti na en tapu. 38Feifi postu fu acacia-udu ben meki gi a garden disi. A ede fu den postu ben de fu gowtu, den dwarslati ben tapu nanga gowtu tu èn den feifi futupisi ben de fu kopro.
Eksodus 37
1Besaleyel meki a kisi fu a ferbontu fu acacia-udu. A ben langa wan nanga kwart meter, a ben bradi èn a ben hei drikwart meter. 2A tapu a udu fu a kisi, fu inisei nanga dorosei, nanga lala gowtu. A meki wan gowtu banti lontu a kisi tu. 3A meki fo gowtu linga gi en di ben fasi na den fo futu. Tu na a wan sei, nanga tu na a tra sei fu a kisi. 4A meki tiki fu acacia-udu fu syow a kisi. Den tiki disi a ben tapu nanga gowtu tu. 5A sutu den tiki psa ini den linga di ben fasi na sei a kisi fu a kisi ben kan syow.
6A meki wan tapun fu lala gowtu gi a kisi. A ben langa wan nanga kwart meter èn a ben bradi drikwart meter. 7A meki tu gowtu kerub gi den lantyi fu a tapun. Den ben meki fu gowtu di a ben naki plata. 8Wan kerub ben tnapu na a wan sei, a trawan na a tra sei. Den ben de wan pisi nanga a tapun. 9Den kerub ben tnapu abra nanga abra fu densrefi. Den fesi ben e luku go na gron na a tapun fu a kisi. Den ben bradi tu frei opo go na loktu nanga san den ben e tapu a tapun fu a kisi.
10Besaleyel meki wan tafra fu acacia-udu. A ben langa wan meter, a ben bradi wan afu meter èn a ben hei drikwart meter. 11A tapu a udu fu a tafra nanga lala gowtu dan a meki wan gowtu banti lontu en. 12A meki wan lantyi na a tafra. A lantyi ben bradi seibi nanga afu centimeter èn a ben abi wan gowtu banti lontu en. 13A meki fo gowtu linga gi en di ben fasi na den fo uku pe den futu de. 14Den linga ben de krosbei fu den lantyi. Ini den linga disi den tiki ben mus kon fu syow a tafra. 15A meki tiki fu acacia-udu fu syow a tafra. A tapu den tiki disi nanga gowtu. 16A meki ala den wrokosani di ben mus de tapu a tafra soleki skotriki, skarki, komki nanga kan, fu kanti sani. Den ben meki fu lala gowtu.
17Besaleyel meki wan kandelaar fu lala gowtu di a ben naki plata. A futu, a mindri pisi, den kopki di mus hori den lampu, den blad nanga den bromki ben de fu wan pisi. 18Siksi anu ben kmoto na seisei fu a kandelaar. Dri na a wan sei nanga dri na a tra sei. 19Ala den dri anu na a wan sei ben abi dri kopki, blad nanga bromki. Den kopki ben meki leki amandrabromki. A srefi fasi ala den dri anu na a tra sei ben abi dri kopki di meki leki amandrabromki, blad nanga bromki. Na so den siksi anu ben meki di ben e kmoto na seisei fu a kandelaar. 20A mindri pisi fu a kandelaar srefi ben abi fo kopki leki amandrabromki, blad nanga bromki. 21Wan blad ben de pe den siksi anu ben fasi na a mindri pisi. Wan ben de ondro de tu fosi anu, wan ben de ondro den di fu tu anu, wan ben de ondro den di fu dri anu. Na so a sa de na ala siksi anu di fasi na a kandelaar. 22A heri mindri pisi, den blad nanga den anu ben de fu wan pisi lala gowtu di naki plata. 23Besaleyel meki seibi lampu gi a kandelaar nanga tanga nanga baki fu lala gowtu. 24A kandelaar nanga ala den sani di ben de fanowdu a meki fu sowan dritenti nanga feifi kilo lala gowtu.
Besaleyel e meki a altari fu bron wierook
25Besaleyel meki a altari fu bron wierook. A meki en fu acacia-udu. A ben fokanti. A ben langa èn a ben bradi wan afu meter èn a ben hei wan meter. Den tutu ben de wan nanga a altari. 26A tapu a altari nanga lala gowtu fu tapusei nanga fu seisei. Den tutu fu en a tapu nanga gowtu tu. A meki wan gowtu banti lontu en tu. 27A meki tu gowtu linga gi en na ala tu sei ondro a banti. Den linga disi ben de fu hori den tiki nanga san den ben mus syow a altari. 28A meki syowtiki fu acacia-udu, dan a tapu den nanga gowtu. 29Besaleyel meki a salfu-oli nanga a soifri wierook di e smeri switi. A meki den leki fa wan man e du di e meki switismeri.
Eksodus 38
1Besaleyel meki a altari fu bron ofrandi. A meki en fu acacia-udu. A altari ben langa èn a ben bradi tu meter nanga afu èn a ben hei wan meter nanga afu. 2A meki tutu na den fo uku. Den tutu disi ben de wan nanga a altari. Dan a tapu a altari nanga den tutu nanga kopro. 3A meki ala den wrokosani di ben de fanowdu na a altari soleki den patu, den bigi spun, den beki, den forku nanga den embre gi a krofaya. Ala den wrokosani a meki fu kopro. 4A meki wan net gi a altari. A ben de fu kopro, a ben frekti èn a ben e bigin ondro a lantyi fu a altari te go miti afu fu a altari. 5A meki fo linga tu gi den fo uku fu a kopro net. Ini den linga disi den tiki ben mus kon fu syow a altari. 6Den tiki fu syow a altari a meki fu acacia-udu, dan a tapu den nanga kopro. 7Baka dati a sutu den tiki ini den linga na ala tu sei fu a altari, fu syow en. A altari ben meki fu planga èn fu inisei a ben leigi èn a ben opo.
8Besaleyel meki a kopro beki nanga wan kopro futupisi. Fu du dati a teki den kopro spikri ini san den umasma ben e luku den fesi, di ben e wroko na mofodoro fu a tenti pe yu kan miti nanga Gado.
9Dan Besaleyel meki a pren fesi a santa tenti. Na a zuidsei, wan pisi fu feifitenti meter langa, a anga garden fu diri linnen krosi. 10Gi den garden disi a meki tutenti postu nanga tutenti kopro futupisi. Gi den postu a meki solfru aka nanga solfru dwarslati. 11Na a noordsei a anga garden fu diri linnen krosi tu abra wan pisi fu feifitenti meter langa. A meki tutenti postu gi den garden disi tu nanga tutenti kopro futupisi. Gi den postu a meki solfru aka nanga solfru dwarslati tu. 12Na a westsei, wan pisi fu tutenti-na-feifi meter langa, a anga garden. A meki tin postu gi den garden disi nanga tin futupisi. Gi den postu a meki solfru aka nanga dwarslati. 13Na a oostsei a anga garden tu abra wan pisi fu tutenti-na-feifi meter. 14Garden fu seibi nanga afu meter ben anga na a wan sei. Den garden disi ben anga na dri postu di ben abi dri futupisi. 15Na a tra sei, garden ben anga tu fu seibi nanga afu meter. Den ben anga na ala tu sei na a bigin fu a pren èn den ben anga na dri postu di ben abi dri futupisi 16Ala den garden fu a pren fesi a santa tenti ben meki fu diri linnen krosi. 17Den futupisi fu den postu ben de fu kopro. Den aka nanga den dwarslati gi den postu ben de fu solfru èn a ede fu den postu ben de fu solfru tu. Ala den postu fu a pren ben fasi na makandra nanga solfru dwarslati. 18A garden di ben anga na a bigin fu a pren ben de fu blaw katun, dungruredi katun, fayaredi katun, diri linnen krosi èn moimoi sani ben nai na en tapu. A ben langa èn a ben bradi tin meter èn a ben hei sowan tu nanga afu meter leki den tra garden fu a pren. 19Den fo postu na san a garden disi ben e anga nanga den fo futupisi fu den postu ben de fu kopro. Den aka, a ede fu den postu nanga den dwarslati ben de fu solfru. 20Ala den pen fu a santa tenti nanga di fu a pren lontu a santa tenti ben de fu kopro.
Den sani di ben de fanowdu fu meki a santa tenti
21Disi na den sani di ben de fanowdu di a santa tenti, a tenti fu a ferbontu, meki. Moses ben komanderi den Lefitisma fu teri ala sani. Den Lefitisma ben du en, èn Itamar, a manpikin fu priester Aaron, ben de den basi. 22Besaleyel fu a lo fu Yuda meki ala den sani di MASRA ben taigi Moses fu meki. Besaleyel ben de a manpikin fu Uri nanga a granpikin fu Hur. 23Oholiab, a manpikin fu Akisamak ben yepi Besaleyel meki den sani. A ben de fu a lo fu Dan. A ben de wan man di sabi bow, di ben man sidon denki nyun sani èn di ben sabi meki moimoi sani tapu blaw katun, dungruredi katun, fayaredi katun nanga diri linnen krosi. 24Ala a gowtu di ben de fanowdu fu du ala a wroko ini a santa presi, ben de wan dusun wan hondro neigitenti-na-feifi kilo. Na a gowtu di den ben opo go na loktu leki wan ofrandi. A ben wegi leki fa den sani e wegi di de fanowdu gi a santa presi. 25A solfru di ala den Israelitisma di ben teri tyari kon, ben de tin-na-fo dusun, wan hondro nanga feifitenti kilo. A ben wegi leki fa den sani e wegi di de fanowdu gi a santa presi. 26Ala sma di ben teri, fu tutenti yari nanga moro owru, ben de siksi hondro nanga dri dusun, feifi hondro nanga feifitenti man. Ibriwan ben mus gi wan beka solfru. A solfru disi ben wegi leki fa den sani e wegi di de fanowdu gi a santa presi. 27Sowan dri dusun nanga feifi hondro kilo solfru ben de fanowdu fu meki futupisi fu a santa presi nanga di fu a garden. Den ben meki wan hondro futupisi. Ibri futupisi ben meki fu dritenti-na-feifi kilo solfru. 28Fu a tra tin dusun, siksi hondro nanga feifitenti kilo solfru a meki aka gi den postu, a tapu den ede fu den postu èn a meki dwarslati nanga den. 29A kopro di den ben opo go na loktu leki wan ofrandi ben de tin-na-siksi dusun, aiti hondro nanga feifitenti kilo. 30Nanga a kopro disi a meki den futupisi na mofodoro fu a tenti pe yu kan miti nanga Gado, a kopro altari, a kopro net fu a altari nanga ala den wrokosani fu a altari, 31den futupisi fu a pren, den futupisi na a bigin fu a pren, ala den pen fu a santa tenti nanga ala den pen fu a pren.
1Dan Yesus taigi den man di ben e teki leri fu En, nanga a bigi grupu sma di ben e waka na En baka, taki: 2“Den sabiman fu Gado wèt nanga den Fariseiman abi a wroko fu leri unu a wèt fu Moses. 3Dat' meki un mus du èn un mus hori unsrefi na ala sani san den e taigi unu fu du. Ma un no mus du den sani san den e du. Bika den e leri sma a wèt, ma den srefi no e du san a wèt e taki. 4Den e dwengi sma fu hori den moro hebi pisi fu a wèt, ma den srefi no e broko den ede nanga den. 5Na soso sma ai sani den e du. Luku o bradi den e meki den banti san den e weri nanga den wortu fu Gado na en tapu! Luku o langa den e meki den franya na den krosi! 6Den lobi fu sidon na den moro prenspari presi te den go nyan na sma oso. So tu den e sidon na den moro bun presi ini den kerki. 7Den lobi te sma e gi den lespeki odi na wowoyo, èn te sma e kari den ‘leriman.’ 8Ma un no mus meki sma kari un ‘leriman’, bika un alamala na brada èn un abi wan enkri Leriman nomo. 9Un no mus kari no wan sma dya na grontapu un ‘p'pa’, bika un abi wan enkri P'pa nomo èn dati na Gado di de na heimel. 10Un no mus meki sma kari un ‘fesiman’, bika un abi wan enkri Fesiman nomo èn dati na a Mesias. 11A moro prenspari sma na un mindri, mus dini den trawan. 12Bika a sma di e opo ensrefi, Gado o broko en saka. Èn a sma di e saka ensrefi, Gado o opo en.”
Yesus krutu den hoigriman
13“Un sabiman fu Gado wèt nanga Fariseiman, un mus luku bun! Un hoigriman unu! Un no wani kon ondro a tiri fu Gado, ma dan un e tapu pasi gi den sma di wani kon. 14Un sabiman fu Gado wèt nanga Fariseiman, un mus luku bun! Un hoigriman unu! Unu e puru den oso na a anu fu den uma di masra dede kba, dan un e begi langabere begi fu sma denki taki un bun. Fu dat'ede unu o kisi moro hebi strafu.
15Un sabiman fu Gado wèt nanga Fariseiman, un mus luku bun! Un hoigriman unu! Bika un e waka heri grontapu lontu fu feni wan sma di wani teki a bribi fu unu. Ma te un feni en, un e meki taki a kon tu tron moro ogri leki unsrefi, fu a kan go na hel pe unsrefi o go.
16Un mus luku bun! Un de leki breniman di wani tyari trawan waka! Bika un e leri den sma taki: ‘A no abi trobi efu wan sma sweri na a santa presi, ma efu a sweri tapu a gowtu di de ini a santa presi, dan a mus du san a taki.’ 17Un don èn un breni! San moro prenspari? A gowtu, noso a santa presi di e meki a gowtu kon santa? 18Un e leri den sma tu taki: ‘A no abi trobi efu wan sma sweri tapu a altari, ma efu a sweri tapu a ofrandi di de tapu a altari, dan a mus du san a taki.’ 19Un breniman unu! San moro prenspari? A ofrandi noso a altari di e meki a ofrandi kon santa? 20So efu wan sma e teki a altari sweri, a e sweri tu na a sani san de na en tapu. 21Efu wan sma e teki a santa presi sweri, a e sweri tu na a Wan di e libi ini a santa presi. 22Sosrefi efu wan sma e teki heimel sweri, a e sweri na a kownusturu fu Gado nanga a Wan di e sidon na en tapu.
