Dag 82 van 365- Jozua 13-15 en Lucas 1:57-80

₁Di Yosua ben kon grani srefsrefi kba, MASRA taigi en taki: “Yu kon grani, ma furu presi de ete di un mus teki abra. ₂Disi na den kontren di un mus teki abra ete: a heri kontren fu den Filistijnsma nanga den Gesuritisma. ₃Dati na a kontren fu a kriki Sikor na a oostsei fu Egipte, go te na a kontren fu Ekron na noordsei. A heri pisi dati na fu Kanaan tu. Na feifi kownu fu den Filistijnsma e tiri a kontren drape: a di fu a foto Gasa, a di fu a foto Asdod, a di fu a foto Askelon, a di fu a foto Gat nanga a di fu a foto Ekron. A kontren fu den Awitisma, ₄na zuidsei fu den Filistijnsma un mus teki abra ete. Sosrefi a heri kontren fu den Kananitisma nanga Meara, wan foto fu den sma fu Sidon, go te na a foto Afek pe a kontren fu den Amoritisma e bigin. ₅Moro fara a kondre fu den Giblitisma nanga a heri kontren fu a Libanonbergi na oostsei, fu Baal-Gad na a futu fu a Hermonbergi go te na a pasi fu Hamat. ₆Ala den sma di e libi ini a bergikontren fu a Libanonbergi go te na Misrefot-Maim, ala den Sidonisisma, Mi sa yagi gwe gi den Israelitisma. Sorgu wawan taki yu fringi a lot fu prati en gi Israel, leki fa Mi komanderi yu. ₇Yu mus prati en gi den neigi lo di tan abra nanga a tra afu lo fu Manase.”

₈A lo fu Ruben, a di fu Gad nanga a afu lo fu Manase ben kisi wan kontren fu densrefi. Moses, a knekti fu MASRA, ben gi den a kontren dati na a oostsei fu a Yordanliba. ₉Dati ben de a kontren fu a foto Arower na sei a Arnonliba, a ben e waka mindrisei fu a Arnonliba, a heri hei kontren fu Medeba go miti Dibon, ₁₀ala den foto fu Sikon, a kownu fu den Amoritisma, di ben e libi na Hesbon, te go miti a kontren fu den Amonitisma. ₁₁Moro fara Gilead, a kontren fu den Gesuritisma nanga den Maakatitisma, a heri Hermonbergi nanga heri Basan, go te na Salka. ₁₂Sosrefi a heri kondre fu kownu Og fu Basan, di ben e tiri Astarot nanga Edrei. Og ben de a laste fu den Refaitisma. Moses ben wini a folku dati èn yagi den gwe. ₁₃Ma den Israelitisma no ben man yagi den Gesuritisma nanga den Maakatitisma gwe fu den tanpresi. Dat' meki den folku dati e libi mindri den Israelitisma te tide.

₁₄Moses no ben gi a lo fu Lefi wan pisi gron gi densrefi. Gado ben pramisi den taki wan pisi fu den ofrandi di den ben o bron nanga faya gi MASRA, a Gado fu Israel, ben o de fu den.

₁₅Moses ben gi den famiri fu a lo fu Ruben a kontren disi: ₁₆A ben e bigin na a foto Arower na sei a Arnonliba, a ben e waka na mindrisei fu a Arnonliba nanga a heri hei kontren na Medeba. ₁₇Ini a kontren disi yu ben abi Hesbon nanga ala den foto ini a birti fu en di ben de ini a hei kontren. Dati ben de den foto: Dibon, Bamot-Baal, Bet-Baal-Meon, ₁₈Yasa, Kedemot, Mefaat, ₁₉Kiryataim, Sibma, Seret-Hasakar di de tapu a pikinbergi ini a dal, ₂₀Bet-Peor, a futu fu Pisgabergi, Bet-Hayesimot, ₂₁ala den foto fu a hei kontren, nanga a heri kondre fu kownu Sikon fu den Amoritisma di ben e tan na Hesbon. Moses ben wini a kownu dati makandra nanga den edeman fu den Midyanitisma, di ben de knekti fu Sikon. Den edeman dati ben de: Ewi, Rekem, Sur, Hur nanga Reba. ₂₂A lukuman Bileam, a manpikin fu Beor, ben de mindri den sma tu di den Israelitisma ben kiri.

₂₃A kontren fu a lo fu Ruben ben e kba na a Yordanliba nanga a syoro fu en. Disi ben de den foto nanga den dorpu di den famiri fu a lo fu Ruben ben kisi taki na fu den.

₂₄Moses ben gi a lo fu Gad wan kontren tu. Disi na a kontren di den famiri fu a lo fu Gad ben kisi. ₂₅Den ben kisi a kontren fu Yaser, ala den foto fu Gilead, afu fu a kondre fu den Amonitisma go te na a foto Arower na a oostsei fu Raba. ₂₆A kontren disi ben waka fu Hesbon go te na Ramat-Hamispe nanga Betonim èn moro fara fu Makanaim go te na a kontren fu Lo-Debar. ₂₇Den kisi wan pisi oostsei fu a Yordanliba tu ini a Yordandal nanga den foto Bet-Haram, Bet-Nimra, Sukot nanga Safon. A pisi dati ben de san ben libi fu a kondre fu kownu Sikon fu Hesbon. A kontren fu Gad ben e kba na a Yordanliba te go miti a zuidsei fu a meer fu Kineret.

₂₈Disi ben de den foto nanga den dorpu di den famiri fu a lo fu Gad ben kisi taki na fu den.

₂₉Moses ben gi afu fu a lo fu Manase wan kontren tu. Disi na a kontren di den famiri fu a afu lo fu Manase ben kisi: ₃₀A kontren fu den ben e bigin na Makanaim, heri Basan, a heri kondre fu kownu Og fu Basan, nanga ala den dorpu fu Yair di ben de ini Basan. Dati ben de siksitenti dorpu. ₃₁Moro fara afu fu Gilead nanga den foto Astarot nanga Edrei, den tu foto pe kownu Og ben e libi ini Basan.

Disi na a kontren di den famiri fu a afu lo fu Manase kisi. Den ben de bakapikin fu Makir, a manpikin fu Manase.

₃₂Disi na a kontren ini den bigi opo wei fu Moab na oostsei fu a Yordanliba nanga Yeriko, di Moses ben gi den Israelitisma taki na fu den. ₃₃Ma Moses no ben gi a lo fu Lefi wan pisi gron gi densrefi. MASRA, a Gado fu Israel, ben de san den kisi gi densrefi. Na a pramisi dati den ben kisi.

₁Disi na den kontren di den Israelitisma kisi ini Kanaan taki na fu den. Priester Eleasar, Yosua, a manpikin fu Nun, nanga den famiri-edeman fu den lo fu Israel, ben prati a kondre gi den Israelitisma. ₂MASRA ben komanderi Moses dati na a lot ben mus sori fa a kondre ben mus prati gi den neigi nanga afu lo di no ben kisi kontren gi densrefi ete. ₃Tu nanga afu lo ben kisi kontren fu Moses gi densrefi kba na a tra sei fu a Yordanliba. Ma a no ben gi a lo fu Lefi wan pisi gron gi densrefi drape. ₄Den bakapikin fu Yosef ben prati na ini tu lo: a lo fu Manase nanga a lo fu Efraim. A lo fu Lefi no kisi wan pisi gron gi densrefi ini a kondre. Den kisi foto fu libi nanga weigron lontu den foto gi den meti fu den. ₅Den Israelitisma prati a kondre neleki fa MASRA ben komanderi Moses.

₆Wantu man fu a lo fu Yuda ben kon na Yosua na Gilgal. Dan a Kenisitiman Kaleb, a manpikin fu Yefune, taigi en taki: “Yu sabi san MASRA ben taigi Moses, a man fu Gado, fu mi nanga yu na Kades-Barnea. ₇Mi ben abi fotenti yari di Moses, a knekti fu MASRA, ben seni mi fu Kades-Barnea kon na a kondre disi, fu kon luku kibrikibri fa sani de dyaso. Di mi drai kon, mi ferteri en finifini san mi si. ₈Ma den man di ben go nanga mi ben meki a folku kon frede nanga san den taki. Ma mi ben tan fertrow MASRA, a Gado fu mi, nanga mi heri ati. ₉Na dat' meki Moses sweri a srefi dei dati gi mi taki: ‘Fu di yu tan fertrow MASRA, a Gado fu mi, nanga yu heri ati, A e gi yu a kontren pe yu waka psa. Fu têgo a sa de fu yu nanga den bakapikin fu yu.’ ₁₀We luku, MASRA ori mi na libi soleki fa A ben pramisi. Na fotenti-na-feifi yari di psa A ben taigi Moses a sani dati. A ten dati Israel ben e waka ini a bigi dreisabana ete. Now mi abi aititenti nanga feifi yari. ₁₁Ma mi abi a srefi krakti leki di Moses ben seni mi fu go luku a kondre. A krakti di mi abi now na a srefi krakti di mi ben abi a ten dati: krakti fu hari go na feti èn fu du ala sortu tra sani. ₁₂Dat' meki mi e aksi yu fu yu gi mi a bergikontren disi, soleki fa MASRA ben taki a ten dati. Yu srefi ben yere a ten dati tak' na Enakitisma e libi drape ini bigi foto di tranga fu teki abra. Efu MASRA de nanga mi, mi o man yagi den gwe, soleki fa MASRA ben taki.” ₁₃Dan Yosua blesi Kaleb, a manpikin fu Yefune, èn a gi en a foto Hebron taki na fu en. ₁₄Na fu di a Kenisitiman Kaleb, a manpikin fu Yefune, ben tan fertrow MASRA, a Gado fu Israel, nanga en heri ati, meki Hebron na fu en te tide. ₁₅Fosi a ten dati Hebron ben nen Kiryat-Arba. Arba ben de a moro bigi Enakitiman. Nanga a sani dati a feti tapu ini a kondre.

₁A lot ben sori taki den famiri fu a lo fu Yuda ben mus kisi a moro fara pisi fu a kondre na zuidsei. A ben e waka go te na a bigi dreisabana Sin, pe a sabana e miti nanga a kontren fu Edom.

₂Na a zuidsei a kontren ben e bigin na a moro fara zuidsei pisi fu a Sowtuse. ₃Fu drape a ben waka na zuidsei fu a bergipasi di den e kari a Kruktuterepasi, go na a dreisabana Sin èn fu drape moro fara na loktu na zuidsei fu Kades-Barnea. A ben e waka moro fara go na Hesron èn a ben go na loktu na Adar. Fu drape a ben beni go na Karka, ₄dan a ben go na Asmon. Drape a ben e doro na a kriki di ben e prati a kontren nanga Egipte. Fu drape a ben e waka langalanga go na se. Disi na fa a kondre fu heri Israel mus waka na a zuidsei.

₅Na a oostsei a kontren ben e waka fu a Sowtuse te go miti a mofo fu a Yordanliba.

Na noordsei a kontren ben e bigin na noordsei fu a Sowtuse, na a mofo fu a Yordanliba. ₆Fu drape a ben e go na Bet-Hogla, a ben psa na noordsei fu Bet-Araba, dan a ben e go na loktu na a bergiston fu Bohan. Bohan ben de wan bakapikin fu Ruben. ₇Moro fara a kontren ben e psa ini a Akordal go na loktu na Debir. Drape a ben beni go na noordsei go na Gilgal, di de abrasei fu a bergipasi Adumim, na zuidsei fu a kriki. A ben psa moro fara go na a bron fu En-Semes go fadon na En-Rogel. ₈Fu drape a kontren ben go na loktu na a Ben-Hinomdal èn fu drape a ben e go na zuidsei fu a bergi fu den Yebusitisma, dati na Yerusalem. Fu drape a ben e go na loktusei fu a bergi di ben de westsei fu a Ben-Hinomdal nanga noordsei fu a dal fu den Refaitisma. ₉Baka dati a ben beni na loktu fu a bergi go na a watrabron Me-Neftoak, fu kon fadon na den foto ini den bergi fu Efron. Fu drape a ben beni go na Baala, a foto di den e kari Kiryat-Yearim tide. ₁₀Na Baala a kontren ben e beni go na westsei na a bergi Seir èn a ben psa go na noordsei tapu a bergi Yearim, pe a foto Kesalon de. Fu drape a ben saka go na a foto Bet-Semes dan a ben go moro fara na a foto Timna. ₁₁A kontren ben e waka moro fara go na noordsei tapu a pikin bergi pe a foto Ekron ben de. Dan a ben beni go na a foto Sikaron, fu Sikaron a ben e go na a bergi Baala èn fu Baala a ben e waka go langalanga na Se.

₁₂Na a westsei a kontren ben e kon na wan kba na a Bigi Se nanga a syoro fu en.

Dati ben de fa a kontren fu den famiri fu a lo fu Yuda ben e waka.

₁₃Soleki fa MASRA ben komanderi Yosua, a gi Kaleb, a manpikin fu Yefune, wan pisi fu a kontren fu a lo fu Yuda. A kisi Hebron, a foto di ben nen Kiryat-Arba fosi. Arba ben de a p'pa fu Enak. ₁₄Kaleb yagi den famiri fu Sesai, Akiman nanga Talmai kmoto fu Hebron. Den famiri disi ben de Enakitisma, bakapikin fu Enak. ₁₅Fu drape Kaleb hari go fu feti nanga den sma fu a foto Debir, di ben nen Kiryat-Sefer fosi. ₁₆Kaleb ben taigi den man fu en drape taki: “A sma di teki Kiryat-Sefer abra kan trow nanga mi umapikin Aksa.” ₁₇Dan Otniyel, a manpikin fu Kenas, teki a foto abra. Kenas ben de wan brada fu Kaleb. So Kaleb gi Otniyel en umapikin Aksa leki frow. ₁₈Di a doro, Aksa taigi en taki a ben o de wan bun sani fu aksi en p'pa wan pisi pranigron. Di a saka fu en buriki, Kaleb aksi en san a ben wani. ₁₉Aksa piki en taki: “Mi e begi yu, gi mi wan kado fu di mi trow. Fu di a gron di yu gi mi drei srefsrefi, meki mi e aksi yu fu gi mi wantu watrabron tu.” Dan Kaleb gi en den watrabron di ben de hei nanga den watrabron di ben de lagi.

₂₀Dati ben de a kontren di den famiri fu a lo fu Yuda kisi taki na fu den.

₂₁Disi na den foto di ben de ini a kontren fu a lo fu Yuda.

Ini a moro fara pisi na zuidsei ini a Negebsabana, pe a kontren fu Yuda ben e miti nanga di fu Edom, yu ben abi den foto: Kabsiyel, Eder, Yagur, ₂₂Kina, Dimona, Adada, ₂₃Kedes, Hasor, Yitnan, ₂₄Sif, Telem, Bealot, ₂₅Hasor-Hadata, Keriot-Hesron di den e kari Hasor tu, ₂₆Amam, Sema, Molada, ₂₇Hasar-Gada, Hesmon, Bet-Pelet, ₂₈Hasar-Sual, Berseba nanga den dorpu ini a birti fu en, ₂₉Baala, Iyim, Esem, ₃₀Eltolad, Kesil, Horma, ₃₁Siklag, Madmana, Sansana, ₃₂Lebaot, Silkim, Ain nanga Rimon. Dati ben de tutenti-na-neigi foto makandra nanga dorpu ini a birti fu den.

₃₃Disi na den foto di ben didon ini a kontren na den bergifutu: Estaol, Sora, Asna, ₃₄Sanoak, En-Ganim, Tapua, Enam, ₃₅Yarmut, Adulam, Soko, Aseka, ₃₆Saaraim, Aditaim, Gedera nanga Gederotaim. Dati ben de tin-na-fo foto makandra nanga den dorpu ini a birti fu den.

₃₇Moro fara: Senan, Hadasa, Migdal-Gad, ₃₈Dilan, Mispe, Yokteel, ₃₉Lakis, Boskat, Eglon, ₄₀Kabon, Lakmas, Kitlis, ₄₁Gederot, Bet-Dagon, Naama nanga Makeda. Dati na tin-na-siksi foto makandra nanga den dorpu ini a birti fu den.

₄₂Dan yu ben abi ete: Libna, Eter, Asan, ₄₃Yiftak, Asna, Nesib, ₄₄Keila, Aksib nanga Maresa. Dati na neigi foto makandra nanga den dorpu ini a birti fu den.

₄₅Ekron nanga ala den dorpu nanga den tra pikinpikin tanpresi ini a birti fu en. ₄₆Moro fara ala den foto di ben de mindri Ekron nanga a Se, den pikinpikin tanpresi nanga den dorpu ini a birti fu Asdod. ₄₇Asdod nanga Gasa makandra nanga den dorpu nanga tra tanpresi ini a birti fu den te go miti a kriki di e prati a kontren nanga Egipte èn moro fara go miti a Bigi Se nanga a syoro fu en.

₄₈Disi na den foto ini a bergikontren: Samir, Yatir, Soko, ₄₉Dana, Kiryat-Sana di den e kari Debir tu, ₅₀Anab, Estemo, Anim, ₅₁Gosen, Holon nanga Gilo. Dati ben de erfu foto makandra nanga den dorpu ini a birti fu den.

₅₂Moro fara: Arab, Duma, Esan, ₅₃Yanum, Bet-Tapuak, Afeka, ₅₄Humta, Kiryat-Arba di den e kari Hebron tu, nanga Sior. Dati ben de neigi foto makandra nanga den dorpu ini a birti fu den.

₅₅Dan yu ben abi ete: Maon, Karmel, Sif, Yuta, ₅₆Yisreel, Yokdeam, Sanoak, ₅₇Kain, Gibea nanga Timna: Dati na tin foto makandra nanga den dorpu ini a birti fu den.

₅₈Halkul, Bet-Sur, Gedor, ₅₉Maarat, Bet-Anot nanga Eltekon: Dati na siksi foto nanga den dorpu ini a birti fu den.

₆₀Kiryat-Baal di den e kari Kiryat-Yearim tu nanga Raba. Tu foto nanga den dorpu ini a birti fu den.

₆₁Den foto di den kisi ini a bigi dreisabana ben de: Bet-Araba, Midin, Sekaka, ₆₂Nibsan, Ir-Hamelak nanga Engedi: Dati na siksi foto makandra nanga den dorpu ini a birti fu den.

₆₃Ma den sma fu a lo fu Yuda no ben man yagi den Yebusitisma puru ini a foto Yerusalem. Na dat' meki den Yebusitisma tan libi mindri den sma fu Yuda ini Yerusalem te tide.

₅₇Di a yuru doro fu Elisabet meki a pikin, a kisi wan boi. ₅₈Den birtisma nanga den famiri fu en, ben yere fa Masra ben sori bigi sari-ati na Elisabet. So den ben prisiri nanga en. ₅₉Di a boi tapu aiti dei, den sma kon fu besnei a boi. Dan den ben wani gi a boi a nen fu en p'pa Sakarias. ₆₀Ma en m'ma taki: “Nono. Un mus kari en Yohanes.” ₆₁Ma den taigi Elisabet taki: “No wan sma de ini yu famiri di abi a nen dati.” ₆₂Dan den sma meki wantu beweigi nanga den anu fu aksi Sakarias fa a wani taki a pikin mus nen. ₆₃Ne Sakarias aksi den sma wan sani fu skrifi na tapu. A skrifi taki: “A mus nen Yohanes.” Ala den sma ben ferwondru. ₆₄Dan wantron so Sakarias ben man taki baka èn a bigin fu opo Gado nen. ₆₅Ala den sma di ben libi ini a birti fu den, ben kisi bigi lespeki gi Gado. Èn ini a heri bergi presi fu Yudea den sma ben taki fu den sani disi. ₆₆Ala sma di yere ben teki den sani disi na prakseri. Den ben aksi densrefi taki: “San a pikin disi o tron?” Bika a ben de krin fu si taki a krakti fu Gado ben de na en tapu.

₆₇Sakarias kon furu nanga a Santa Yeye, dan a bigin taki san Gado gi en fu taki. A taki: