Dag 86 van 365- Rechters 1-3 en Lucas 4:1-30

₁Baka di Yosua dede, den Israelitisma aksi MASRA taki: “Suma fu unu sa go feti fosi nanga den Kananitisma?” ₂MASRA piki taki: “Yuda sa hari go fosi. Luku, Mi e gi a kondre abra na en.” ₃Baka dati den man fu a lo fu Yuda taigi den famiri fu den fu a lo fu Simeon taki: “Un hari go nanga wi fu go feti nanga den Kananitisma di e libi ini a kontren di wi kisi taki na fu wi. Dan wi sa hari go nanga unu tu na a kontren di unu kisi.” Dan a lo fu Simeon go nanga den.

₄Di Yuda hari go feti, MASRA gi den Kananitisma nanga den Perisitisma abra na den. Den kiri tin dusun man na Besek. ₅Bika drape den ben kon miti nanga kownu Adonibesek. Den feti nanga en, èn den wini den Kananitisma nanga den Perisitisma. ₆Adonibesek ben lowe gwe. Ma den gwe na en baka, den grabu en dan den kapu den doi fu en anu nanga en futu puru. ₇Ne Adonibesek taki: “Mi abi sowan seibitenti kownu na a kownu-oso fu mi. Mi ben kapu den doi fu den puru èn den e libi fu a sakasaka di e fadon kmoto fu mi tafra. Gado e pai mi now fu den sani di mi du.” Dan den tyari Adonibesek go na Yerusalem, èn drape a dede.

₈Baka dati den man fu Yuda go feti nanga Yerusalem. Den teki a foto abra, den kiri den sma drape nanga deigri, dan den sutu faya gi a foto. ₉Dan den saka go feti nanga den Kananitisma di ben e libi ini a bergikontren, ini a Negebsabana, nanga na den bergifutu. ₁₀Baka dati den hari go feti nanga den Kananitisma di ben e libi na Hebron. A foto disi ben nen Kiryat-Arba fosi. Drape den wini Sesai, Akiman, nanga Talmai. ₁₁Fu drape den hari go feti nanga den sma fu Debir. A foto disi ben nen Kiryat-Sefer fosi. ₁₂Kaleb ben taki: “A sma di wini den sma fu Kiryat-Sefer èn teki a foto abra, mi e gi mi umapikin Aksa leki frow.” ₁₃Dan Otniyel, a manpikin fu Kenas, a pikin brada fu Kaleb, teki a foto abra. So Kaleb gi Otniyel en umapikin Aksa leki frow. ₁₄Di a doro, Aksa taigi en taki a ben o de wan bun sani fu aksi en p'pa wan pisi pranigron. Di a saka fu en buriki, Kaleb aksi en san a ben wani. ₁₅Aksa piki en taki: “Mi e begi yu, gi mi wan kado fu di mi trow. Fu di a gron di yu gi mi drei srefsrefi, meki mi e aksi yu fu gi mi wantu watrabron tu.” Dan Kaleb gi en den watrabron di ben de hei nanga watrabron di ben de lagi.

₁₆Den bakapikin fu Kenit, a p'pa fu Moses en frow, ben hari go makandra nanga den sma fu Yuda fu a Palmfoto go na a dreisabana fu Yuda, di ben didon ini a Negebsabana na Arad. Den go libi makandra nanga den sma di ben libi ini a kontren fu Arad. ₁₇Dan Yuda hari go na feti baka makandra nanga a lo fu Simeon. Den wini den Kananitisma di ben e libi na Sefat. Den kiri ala sma drape. Dat' meki den e kari a foto dati Horma. ₁₈Baka dati den man fu Yuda teki den foto Gasa, Askelon nanga Ekron abra tu, makandra nanga a heri kontren fu den.

₁₉MASRA ben de nanga Yuda, dat' meki den ben man teki a bergikondre abra. Ma den no ben man yagi den sma ini a Yordandal gwe, bika den disi ben abi isri fetiwagi. ₂₀Kaleb ben kisi Hebron, soleki fa Moses ben taki. A ben yagi den dri bakapikin fu Enak puru fu a foto dati. ₂₁A lo fu Benyamin no ben man yagi den Yebusitisma, di ben e libi ini Yerusalem, puru drape. Den Yebusitisma tan libi mindri den Benyaminitisma ini Yerusalem te tide.

₂₂Den bakapikin fu Yosef hari go feti tu nanga den sma fu Betel èn MASRA ben de nanga den. ₂₃Den sma fu a lo fu Yosef ben seni wantu man fu go luku kibrikibri fa sani ben e waka ini a foto dati, di ben nen Lus fosi. ₂₄Dan den si wan man e kmoto ini a foto. Den taigi a man taki: “Sori unu fa un kan go ini a foto, dan un o du yu wan bun baka.” ₂₅Ne a man sori den fa den ben kan go ini a foto. Den teki a foto abra èn den kiri ala den sma drape nanga deigri. Ma den meki a man nanga en heri famiri gwe sondro fu du den wan sani. ₂₆A man go na a kondre fu den Hetitisma. A bow wan foto drape di a kari Lus. A foto dati nen so te tide.

₂₇A lo fu Manase no ben man yagi den sma fu a foto Bet-Sean nanga den dorpu ini a birtu fu en. Den no ben man yagi den sma fu Tanak tu nanga den dorpu ini a birtu fu en. Moro fara den no ben man yagi den sma gwe tu fu Dor, Yibleam nanga Megido, nanga den dorpu ini a birtu fu den. Den Kananitisma tan libi ini den kontren drape. ₂₈Di den Israelitisma ben kon moro tranga, den ferplekti den Kananitisma fu wroko leki srafu gi den, man den no ben man yagi den gwe. ₂₉A lo fu Efraim no ben man yagi den Kananitisma di ben e libi ini Geser gwe tu. Den Kananitisma tan libi nanga den na Geser. ₃₀A lo fu Sebulon no ben man yagi den sma gwe tu di ben e libi ini Kitron nanga Nahalol. Den ben ferplekti den fu wroko leki srafu gi den, ma den Kananitisma tan libi drape nanga den. ₃₁A lo fu Aser no ben man yagi den sma fu den foto Ako, Sidon, Aklab, Aksib, Helba nanga Rekob gwe tu. ₃₂Den sma fu Aser ben e libi drape makandra nanga den Kananitisma, di ben e libi drape kba, fu di den no ben man yagi den. ₃₃A lo fu Naftali no ben man yagi den sma fu den foto Bet-Semes nanga Bet-Anat gwe tu. Den ben e libi drape makandra nanga den Kananitisma, di ben libi drape kba. Ma den ben ferplekti den fu wroko leki srafu gi den. ₃₄Den Amoritisma ben meki den sma fu a lo fu Dan hari go nanga baka go te tapu den bergi. Den no ben e gi den a okasi fu saka a bergi fu kon ini a Yordandal. ₃₅Den Amoritisma ben man tan libi ini Har-Heres, ini Ayalon nanga Saalbim, ma den bakapikin fu Yosef ben e kisi moro nanga moro makti abra den, te leki den ben ferplekti den fu wroko leki srafu gi den. ₃₆A kontren fu den Amoritisma ben e bigin na a Kruktuterepasi èn a ben e waka fu Sela go moro fara na loktu.

₁A Engel fu MASRA ben kmoto fu Gilgal go na Bokin. Drape a taigi den Israelitisma taki: “Na Mi ben meki un hari kmopo ini Egipte èn tyari un kon ini a kondre di Mi ben pramisi den afo fu unu. Mi ben sweri srefi taki Mi o du san Mi pramisi. Mi ben taigi den taki: Noiti Mi o broko a ferbontu di Mi meki nanga unu, ₂ma unu no mus meki ferbontu nanga den sma fu a kondre disi. Un mus broko den altari fu den. Ma un no arki san Mi ben taki. Fa un ben kan du a sani dati? ₃Mi ben taigi unu tu taki: Mi no sa yagi den sma fu a kondre disi gwe gi un moro. Den sa tan de wan problema gi unu, èn den gado fu den o meki un broko un neki.” ₄Di a Engel fu MASRA taigi den Israelitisma ala den sani disi, den bari krei. ₅Na dat' meki den kari a presi dati Bokim Dan den tyari wan ofrandi drape gi MASRA.

₆Di Yosua meki a pipel gwe, den alamala hari gwe na a kontren di den kisi, fu teki a kondre abra. ₇Solanga Yosua ben de na libi, den sma ben e tan dini MASRA. Baka dati den du dati tu solanga den fesiman ben de na libi ete di ben de fu a ten fu Yosua, èn di ben si ala den bigi sani di MASRA ben du gi Israel. ₈Dan Yosua, a knekti fu Gado, a manpikin fu Nun, dede tapu a libimarki fu wan hondro nanga tin yari. ₉Den beri en ini a kontren di a ben kisi na Timnat-Keres, ini a bergikontren fu Efraim, noordsei fu a bergi Gaas. ₁₀Di ala den sma fu a ten fu Yosua dede, tra sma kon na den baka di no ben sabi MASRA noso den sani di A ben du gi Israel.

₁₁Dan den Israelitisma bigin du sani di no ben bun ini MASRA ai. Den bigin dini den Baal. ₁₂Den tapu fu dini MASRA, a Gado fu den afo fu den, di ben puru den ini Egipte. Den go waka baka tra gado, gado fu den folku di ben e libi lontu den, den boigi gi den èn so den ben e wiki a atibron fu MASRA. ₁₃Den ben tapu fu dini MASRA, èn den ben e dini Baal nanga Astarte. ₁₄Dan MASRA ati bron na tapu Israel. A gi den abra na grupu fufuruman, di ben e fufuru ala den sani fu den tyari gwe. A ben e gi den abra na den feyanti fu den, di ben e libi lontu den èn den no ben man hori feti nanga den. ₁₅Ala leisi te den ben e hari go feti nanga den feyanti, MASRA ben e meki taki sani no ben e waka bun gi den, soleki fa A ben sweri gi den na fesi kba. Dan a pipel ben e kon ini bigi benawtu. ₁₆Ma te dati ben e psa, MASRA ben e meki wan krutubakra opo fu ferlusu den fu den grupu fufuruman. ₁₇Ma a pipel no ben e arki den krutubakra tu. Den ben e tan waka nomo baka tra gado, leki fa wan man e huru gi en uma, èn den ben e boigi gi den. Es'esi den ben kmoto fu a pasi di den afo fu den ben waka. Den afo fu den ben hori densrefi na den gebod fu MASRA. Ma den no ben e du dati. ₁₈Ala leisi te MASRA ben poti wan krutubakra, A ben de nanga a krutubakra dati. A ben e ferlusu a pipel puru ini a anu fu den feyanti, solanga a krutubakra dati ben de na libi. Bika MASRA ben e firi sari te a pipel ben e dyeme, te den feyanti ben e libi takru nanga den èn pina den. ₁₉Ma te a krutubakra ben dede, a pipel ben e bigin baka nanga a owru libi fu den. Den ben e du moro ogri leki dan afo fu den. Den ben e waka baka tra gado, den ben e dini den èn den ben e boigi gi den. Den no ben wani tapu srefsrefi nanga den sani di den ben e du.

₂₀Dan MASRA ati ben e bron tapu Israel èn A ben taigi den taki: “A pipel broko a ferbontu, di Mi meki nanga den afo fu den èn den no e arki san Mi e taki. ₂₁Dat' meki Mi no o yagi no wan fu den folku gwe gi den moro, di ben de ete ini a kondre di Yosua dede. ₂₂Nanga den folku dati Mi o tesi den Israelitisma, fu luku efu den o tan waka a pasi di MASRA sori den, èn efu den o hori densrefi na den sani fu En, leki fa den afo fu den ben du.” ₂₃Na dat' meki MASRA ben libi den folku dati. A no ben yagi den gwe wantron, èn A no ben gi den abra na Yosua.

₁MASRA ben meki wantu folku tan na baka fu tesi den Israelitisma di no ben sabi no wan fu den feti di den Israelitisma ben feti ini Kanaan. ₂A du dati soso fu den Israelitisma, di no ben sabi noti fu feti, ben kan leri feti. ₃Disi na den folku di ben tan libi ini a kondre: den feifi kownu fu den Filistijnsma, ala den Kananitisma, Sidonisisma, nanga den Hiwitisma di ben e libi tapu a Libanonbergi, bigin fu a bergi Baal-Hermon go te na a pasi di e go na Hamat. ₄Den folku disi ben drape fu tesi den Israelitisma, fu MASRA ben kan sabi efu den ben o hori densrefi na den gebod, di A ben meki Moses gi den afo fu den. ₅Ma den Israelitisma ben e libi mindri den Kananitisma, den Hetitisma, den Amoritisma, den Perisitisma, den Hiwitisma nanga den Yebusitisma, ₆èn den ben e teki umapikin fu den trow èn den ben e gi den eigi umapikin fu trow nanga den manpikin fu den folku dati. Den ben e dini den gado fu den tu.

₇Den Israelitisma ben e du sani di no bun ini MASRA ai. Den ben fergiti MASRA, a Gado fu den, èn den ben e dini den Baal nanga den Asyera. ₈Ne MASRA ati bron tapu Israel. A gi den abra ini a makti fu kownu Kusan-Risataim fu Mesopotamia. Aiti yari langa den Israelitisma ben abi fu dini Kusan-Risataim. ₉Ne den Israelitisma bari suku MASRA, dan MASRA meki wan ferlusuman opo fu ferlusu den. Dati ben de Otniyel, a manpikin fu Kenas, a pikin brada fu Kaleb. ₁₀A Yeye fu Gado ben kon na en tapu, dan a teki a wroko fu krutubakra fu Israel na en tapu. A hari go feti nanga kownu Kusan-Risataim fu Aram èn MASRA gi a kownu dati abra na en. A teki wan bigi wini na en tapu. ₁₁Baka dati a ben tiri fotenti yari langa ini a kondre. Dan Otniyel, a manpikin fu Kenas, dede.

₁₂Dan den Israelitisma bigin du sani baka di no ben bun ini MASRA ai. Dat' meki MASRA gi kownu Eglon fu Moab makti fu go feti nanga Israel, bika den ben e du sani di no bun ini MASRA ai. ₁₃Eglon meki wan ferbontu nanga den Amonitisma èn nanga den Amalekitisma. Dan makandra den hari go feti nanga Israel. Den wini den èn den teki a Palmfoto abra. ₁₄Tin-na-aiti yari langa den Israelitisma ben abi fu dini kownu Eglon fu Moab. ₁₅Ne den Israelitisma bari suku MASRA, dan MASRA meki wan ferlusuman opo fu ferlusu den. Dati ben de Ehud, a manpikin fu Gera. A ben de fu a lo fu Benyamin, èn a ben e wroko nanga en krutu anu. Na en den Israelitisma ben gwenti fu seni go na kownu Eglon fu Moab, nanga a moni di den ben mus pai en. ₁₆Dan Ehud seni meki wan syatu deigri di ben mus srapu na ala tu sei, dan a fasi en ondro en krosi, na en let'sei bowtu. ₁₇Na so Ehud tyari a moni gi kownu Eglon fu Moab, di ben de wan bun fatu man. ₁₈Di Ehud gi en a moni, a drai gwe nanga den man di ben syow a moni. ₁₉Ma di den doro na den stonpopki na Gilgal, a meki den man go moro fara dan ensrefi drai go baka. Di a doro a taigi kownu taki: “Mi kownu, mi abi wan boskopu gi yu, di yu wawan mus yere.” Ne kownu taki: “Un tan tiri.” Ala den sma di ben de na kownu go na dorosei. ₂₀Dan Ehud go na inisei na kownu, di ben de en wawan ini wan moi kowru kamra na loktusei. Drape Ehud taigi en taki: “Mi abi wan boskopu fu Gado gi yu.” Di a kownu e opo fu en sturu, ₂₁Ehud hari a deigri nanga en kruktu anu puru na en let'sei bowtu dan a dyuku en go ini a bere fu kownu. ₂₂A sutu a deigri go so tranga, taki a srapu pisi nanga a pisi pe yu e hori psa go ini a bere. A fatu tapu a srapu pisi, bika Ehud no hari a deigri puru. Dan Ehud waka na a bakadoro gwe. ₂₃Ehud ben sroto a doro fu a kamra na loktu, dan a waka na a gadri gwe. ₂₄A no ben de wan bun fasi na dorosei, di den wrokoman fu kownu go na a kamra. Ma a doro fu a kamra ben sroto. Ne den taki: “A mus de taki kownu wan de en wawan fu du san a wani du.” ₂₅So den wakti te den ferferi, ma kownu no ben e opo a doro fu a kamra. Ne den go teki wan sroto fu opo a doro fu dorosei. Dan den si den masra didon dededede na gron.

₂₆Ma a ten di den ben e wakti, Ehud ben feni a okasi fu lowe gwe. A ben psa den stonpopki èn a ben lowe go na Seira. ₂₇Di a doro drape, ini a bergikontren fu Efraim, a bro tapu wan tutu. Dan en nanga den Israelitisma saka fu den bergi pe den ben de. Ensrefi ben de na fesi. ₂₈A taigi den taki: “Un kon nanga mi! Bika MASRA gi den Moabitisma, den feyanti fu wi, abra na wi.” Dan den saka go na Ehud baka. Den poti sma na ala den presi pe yu ben man koti a Yordanliba abra go na Moab, fu no wan sma no abra moro. ₂₉Den Israelitisma kiri sowan tin dusun man fu Moab, tranga èn bun fetiman, ma no wan fu den ben man lowe. ₃₀A dei dati den Israelitisma broko den sma fu Moab saka. Baka dati a ben tiri aititenti yari langa ini a kondre.

₃₁Baka Ehud yu ben kisi Samgar, a manpikin fu Anat. En kiri siksi hondro Filistijnman nanga a srapu tiki nanga san a ben e dyuku den kaw fu waka. Na so en ferlusu Israel tu.

₁Di Yesus kmopo fu a Yordanliba, A ben furu nanga a Santa Yeye. Dan a Yeye tyari En go na ini a dreisabana, ₂pe didibri tesi En fotenti dei langa. A heri pisten dati Yesus no ben nyan noti, so baka den fotenti dei angri bigin kiri En. ₃Ne didibri taigi En taki: “Efu Yu na a Manpikin fu Gado, taigi a ston disi fu a tron brede.” ₄Ma Yesus piki en taki: “A skrifi taki: Wan sma no sa libi fu brede wawan.” ₅Dan didibri tyari Yesus go na wan hei presi. Ini a pingi fu wan ai a sori En ala den kondre fu grontapu. ₆Didibri taigi En taki: “Mi o gi Yu ala a makti fu den kondre disi nanga a gudu di den abi. Na mi kisi a makti disi, èn mi e gi en na suma mi wani. ₇Mi o gi Yu ala den sani disi, efu Yu anbegi mi.” ₈Ma Yesus piki en taki: “A skrifi taki: ‘Yu mus anbegi Masra yu Gado èn na En wawan yu mus dini.’ ” ₉Baka dati didibri tyari Yesus go na Yerusalem, dan a poti En tnapu na a lantyi fu a daki fu a tempel. A taigi En taki: “Efu Yu na a Manpikin fu Gado, trowe Yusrefi go na gron. ₁₀Bika a skrifi taki: ‘Gado sa seni den engel fu En fu kibri Yu.’ ₁₁Moro fara: ‘Den sa tyari Yu na tapu den anu, fu Yu no stotu Yu futu na wan ston.’ ” ₁₂Ma Yesus piki en taki: “A skrifi owktu taki: ‘Yu no mus tesi Masra yu Gado.’ ” ₁₃Di didibri kba tesi Yesus, a gwe fu luru wan tra okasi.

₁₄Di Yesus drai go baka na Galilea, A ben furu nanga a krakti fu a Yeye. Ini a heri kontren drape den sma ben e taki fu En. ₁₅A ben e gi leri ini den kerki fu den, èn ala sma ben e gi En bigi nen.

₁₆Dan Yesus go na Nasaret pe A ben kweki. Soleki fa A ben gwenti fu du tapu a sabatdei, A go na a kerki. A opo tnapu fu leisi ₁₇dan den gi En a buku san a profeiti Yesaya ben skrifi. Di A opo a buku, A leisi a pisi pe skrifi taki: