Wan begi fu yepi
1Gi a tiriman fu a singigrupu fu a tempel. Wan psalm fu David.
2Tye Gado, arki a kragi di mi e kragi,
kibri mi fu a frede di feyanti e meki mi frede.
3Kibri mi gi den prakseri fu den ogri-ati sma
gi a grupu fu den di e du kruktudu.
4Den e srapu den tongo leki nefi,
den bita wortu fu den e sutu leki peiri.
5Kibrikibri den e sutu tapu sma di no du noti,
wantronso den e sutu na den tapu,
den no e frede no wan sma.
6Den e gi densrefi dek'ati ini a ogri di den o du,
den e meki mofo fu seti wan sani fu miti mi,
den e taki: “Suma e si unu?”
7Den e waka nanga prakseri fu du ogri:
“Wi klari, a sani seti bun.”
Iya, den prakseri nanga a ati fu libisma dipi.
8Dan Gado sutu En peiri na den tapu,
sondro fu den ben ferwakti en den kisi mankeri.
9Den eigi tongo meki den fadon.
Ala sma di e si den, e seki den ede.
10Dan ala sma bigin lespeki Gado,
èn taki fu den sani di A du,
den e ferstan now taki na Gado wroko.
11Den sma di bun ini Gado ai o prisiri fu den sani di MASRA du,
èn den o suku kibripresi na En.
Ala den sma di e du Gado wani o gi En grani.
