Wan nyun ten o broko
1A dreisabana nanga a kontren pe sani no e gro
o prisiri srefsrefi.
A bigi wei o breiti
èn bromki o bigin gro drape.
2Den o gro bogobogo drape,
èn prisiri o de drape, iya, bun bigi prisiri.
Furu bon o gro drape leki a Libanon,
èn a o kon moi leki Karmel nanga Saron.
Sma o si a glori fu MASRA,
a makti fu a Gado fu unu.
3Meki den swaki anu kon tranga,
meki den kindi di e beifi tnapu steifi.
4Meki un taigi den wan di lasi ati taki:
“Un mus dyadya, no frede!
Yere, a Gado fu unu,
A e kon fu puru atibron,
Gado srefi e kon fu pai den baka,
A e kon ferlusu unu!”
5Dan den ai fu den breniwan,
nanga den yesi fu den dofuwan,
o opo.
6Den lanwan o dyompo leki dia,
den tongo fu den di no ben man taki o bari fu prisiri.
Bika watra o broko kon na doro ini a dreisabana,
èn kriki o lon ini a drei kontren.
7A faya santi o tron wan presi pe watra e tan sidon,
a gron di ben angri fu watra o lai nanga watrabron.
Na a presi pe busidagu ben meki den tanpresi,
ala sortu grasi o gro.
8Wan bun bradi pasi o kon drape,
wan pasi di den o kari: A Santa Pasi.
Sma di no krin ini Gado ai no o psa na en tapu,
a o de soso gi den sma di e anbegi Gado.
Don sma yu no o si na en tapu.
9Lew no o de drape,
no wan krasi meti o waka na en tapu.
Den no o de fu feni drape.
Soso den wan di Gado ferlusu o waka na en tapu.
10Den wan di MASRA ferlusu o drai kon baka.
Nanga bigi prisiri den e kon na Sion.
Wan têgo prisiri sa de na den tapu.
Den o breiti, den o prisiri.
Sorgu nanga dyeme sa lowe.
