10Ma now Yu poti wi na wan sei,
Yu e meki wi kisi syen.
Yu no hari gwe nanga a legre fu wi.
11Yu meki taki wi ben abi fu lon gi wi feyanti,
èn den di no lobi wi srefsrefi fufuru ala den sani fu un teki.
12Yu meki den kiri wi leki na meti den e srakti,
Yu panya wi go na mindri den tra folku.
13Yu seri a pipel fu Yu gi wan lawlaw moni,
Yu no meki moni nanga a seri di Yu seri den.
14Yu meki den kondre lontu wi e teki wi meki spotu,
den e koti odo gi wi èn den e lafu wi.
15Yu meki un tron wan odo gi den folku,
Yu e meki den folku e seki den ede te den e luku wi.
16Heri dei mi e waka nanga a syen.
Sma kan si na mi fesi taki mi e syen,
17te mi e yere fa den e teki wi e meki spotu,
fa den e lafu wi,
nanga a fasi fa den feyanti fu wi
nanga den di wan puru atibron na wi tapu,
e luku wi.
18Ala den sani dati miti wi,
ma wi no fergiti Yu
èn wi no broko a ferbontu fu Yu.
19Un no drai wi baka gi Yu,
èn un tan waka tapu Yu pasi.
20Ma toku Yu broko wi pis'pisi
na a presi pe bus'meti e libi
èn Yu meki dipi dungru tapu wi.
21Efu wi ben fergiti a Gado fu unu,
efu wi ben anbegi wan gado fu wan tra folku,
22Gado bo sabi dati.
A sabi ala san kibri ini a ati fu wan libisma.
23Fu tru, na fu Yu ede den e kiri wi dorodoro,
den e teki unu leki skapu di den e tyari go srakti.
24Wiki Masra! Fu sanede Yu e sribi?
Wiki! No poti wi fu têgo na wan sei!
25Fu sanede Yu e kibri a fesi fu Yu?
Fu sanede Yu e fergiti a bigi nowtu,
a pina ini san wi de?
26Un didon brokobroko ini a doti,
wi no man opo wisrefi fu a gron.
27Opo, kon yepi unu!
Kon ferlusu unu, nanga a bigi lobi fu Yu.
