12Disi sa de a siki nanga san MASRA sa naki den tra folku di ben hari kon fu feti Yerusalem: Den skin sa pori gwe, aladi den e waka lontu libilibi ete. Den ai sa pori gwe ini den ai kasi èn den tongo sa pori gwe ini den mofo. 13Iya, a pisten dati MASRA srefi sa meki wan bigi bruya de na den mindri. A wan sa grabu a trawan hori èn den sa feti nanga makandra. 14Iya, Yuda srefi sa feti nanga Yerusalem. Yerusalem sa teki a gudu fu ala den folku di e libi lontu en: gowtu, solfru nanga bun furu krosi. 15A srefi siki di naki den sma sa naki den asi, den buriki, den kameel, nanga ala den meti di de ini a legrekampu.
16Ala den sma di ben tan na libi fu den tra folku di ben hari kon feti nanga Yerusalem, sa kon ala yari fu kon boigi gi a Kownu, MASRA fu ala sani èn fu hori a fesa fu memre taki den Israelitisma ben e libi fu wan pisten ini kampu. 17Efu wan folku de na grontapu di no wani hari go na Yerusalem fu boigi gi a Kownu, MASRA fu ala sani, dan alen no sa fadon ini a kondre dati moro. 18Efu den sma fu Egipte no wani hari go na Yerusalem tu, dan MASRA sa strafu den tu nanga a strafu nanga san A e strafu den tra folku di no wani kon hori a fesa fu memre taki den Israelitisma ben e libi wan pisten ini kampu. 19Disi sa de a strafu gi den sma fu Egipte nanga ala tra folku di no wani hari go hori a fesa fu memre taki den Israelitisma ben e libi fu wan pisten ini kampu.
20A pisten dati den sa skrifi tapu den bel fu den asi: Spesrutu gi MASRA. Den patu ini a oso fu MASRA den o teki leki beki na a altari. 21Iya, ala patu na ini Yerusalem nanga Yuda sa santa gi MASRA fu ala sani. Ala sma di wani tyari wan ofrandi kan teki den fu bori a meti na ini. A pisten dati no wan sma fu Kanaan sa de ini a oso fu MASRA fu ala sani.
