A wan tru Gado
1No wi, MASRA, no wi,
ma na Yu fiti fu kisi grani,
fu a bigi lobi fu Yu
nanga fu a fertrow di wi kan fertrow Yu.
2Fu sanede den sma fu den tra folku sa aksi taki:
“Pe a Gado fu den de?”
3A Gado fu wi de na heimel,
A e du ala sani di En ati firi fu du.
4Den gado fu den na fu solfru nanga gowtu,
sani di libisma meki nanga den eigi anu.
5Den abi mofo, ma den no man taki,
den abi ai, ma den no man si,
6den abi yesi, ma den no man yere,
den abi noso, ma den no man smeri.
7Den anu fu den no man firi,
den futu fu den no man tyari den waka,
no wan wortu no e kmoto na ini en mofo.
8Den sma di meki den
nanga den sma di e poti den fertrow na den tapu,
o kon tan leki den.
9Israel poti en fertrow tapu MASRA,
na En e yepi den,
na En e kibri den.
10Den bakapikin fu Aaron poti den fertrow tapu MASRA,
na En e yepi den,
na En e kibri den.
11Den sma di e lespeki MASRA poti den fertrow tapu MASRA
na En e yepi den,
na En e kibri den.
12MASRA no fergiti wi, A sa blesi wi,
A sa blesi den bakapikin fu Israel,
A sa blesi den bakapikin fu Aaron.
13A sa blesi den sma di e lespeki MASRA,
bigiwan nanga pikinwan.
14Meki MASRA gi un furu pikin,
unu nanga den pikin fu unu.
15Meki MASRA blesi unu,
a Wan di meki heimel nanga grontapu.
16Heimel na a heimel fu MASRA,
ma grontapu A gi na libisma.
17A no den dedewan sa prijse MASRA,
a no den wan di go na dedekondre,
18ma na wi, wi sa prijse MASRA,
now èn fu têgo.
Haleluya!
