Yésaya 15

Lah sak njeruhné sewengi Ar-Moab wis dirusak, dientèkké;

lah sak njeruhné sewengi Kir-Moab wis dirusak, dientèkké!

₂Wong-wongé lunga nang omahé dewa lan wong Dibon munggah ing puntuk-puntuk pangurbanané perlu nangis;

Moab, ngaduh-aduh awit sangka Nébo lan awit sangka Médeba.

Kabèh wong pada nggunduli sirahé ing kono

lan nyukur jénggoté kanggo tanda kasusahan.

₃Wong pada nganggo salin kasusahan ing ndalan,

ing payon lan ing alun-alun

wong kabèh pada ngaduh-aduh, tiba nangis.

₄Hèsbon lan Eléalé pada nangis nggeruh-nggeruh,

swarané nganti krungu tekan Yahas.

Awit sangka kuwi para suradadu Moab sing nganggo gaman pada mbengok,

nyawané gemeter.

₅Aku mbengok awit Moab;

wong sing ngungsi wis pada tekan Soar, ing Eglat-Selisia.

Lah wong pada ngunggahi

unggah-unggahan Luhit karo nangis;

lan ing dalan sing menyang Horonaim

wong pada njerit awit kena karusakan.

₆Lah kali ing Nimrin dadi sat, dadi ara-ara samun

suketé wis garing, suket nom wis entèk,

tetukulan wis ora ana sing ijuh.

₇Awit sangka kuwi kabèh banda sing ditumpuk

lan samubarang kabèh sing disimpen

pada digawani menyang sabrangé kali Haarabim.

₈Lah jeritané mau, bakal krungu tekan sak tanah pangwasané Moab kabèh,

tangisé krungu nganti tekan Eglaim,

malah nganti tekan Beer-Elim.

₉Awit banyu ing Dimon wis kebak getih,

nanging sing nibani marang Dimon

kuwi bakal Tak tambahi menèh,

ya kuwi singa bakal ndekep para wong sing bisa utyul sangka Moab

lan sing ijik ing negara kono.