Yésaya 9

wong sing pada manggon ing negara sing peteng ndedet

wis pada kepletèkan pepadang.

₂Panjenengan wis nukulaké surak-surak,

lan kebungahan sing gedé.

Wong-wong pada bungah-bungah ing ngarepé Panjenengan,

kaya bungahé wong ing waktu panèn,

kaya surak-suraké wong waktu ngedum rayahan.

₃Awit pasangan sing numpang gulu

lan rakit ing pundaké

lan pentungé wong sing nindes

wis Panjenengan tugel kaya kalahé Midian.

₄Awit saben sepatuné prajurit sing grudak-gruduk

lan saben jubah sing dlèwèran getih

bakal dadi pangané geni.

₅Awit ana Bayi sing wis lair kanggo kita,

ana Putra sing wis dikèkké marang kita,

lambangé pemrintahan ing pundaké,

lan asmané disebut: Juru Pituduh sing nggumunaké,

Gusti Allah sing Mahakuwat,

Bapak sing Langgeng, Ratuné Katentreman.

₆Gedé pangwasané,

lan tentrem rahayu bakal ora ana entèkké

ing damparé Daved lan ing kratoné,

awit kuwi didasari lan dikuwatké

karo keadilan lan kabeneran

wiwit saiki nganti ing sak lawas-lawasé.

Jalusuné atiné GUSTI sing ngwasani langit lan bumi,

bakal nindakké iki.

₇Gusti Allah wis ngekèki tembungé marang Yakub,

lan tembungé kuwi nibani marang Israèl.

₈Sak bangsa kabèh bèn weruh,

ya kuwi Efraim lan sing manggon ing Samaria,

sing ngomong karo sombong lan gemedé:

₉“Pageré bata ambruk,

kita arep ngedekké pager watu tatahan;

wit ajir pada ditegori,

bakal kita ganti karo wit tyemara.”

₁₀GUSTI terus nglurukké para mungsuhé Resin,

lan mboyongi para mungsuhé:

₁₁Wong Aram sangka wétan lan wong Filistèn sangka kulon,

kuwi pada nguntal Israèl karo tyangkemé sing amba.

Senajan iki mau kelakon kabèh, nesu-Né durung mandek,

lan tangan-Né ijik dietungké.

₁₂Senajan mengkono bangsa kuwi ora bali marang Panjenengané sing ngrangkèt,

lan ora nggolèki GUSTI sing ngwasani langit lan bumi.

₁₃Mulané GUSTI terus ngetok endasé lan buntuté Israèl,

wité lan pangé bareng sedina.

₁₄Para pinituwa lan para wong sing kajèn lan mulya kuwi endasé,

lan nabi sing goroh kuwi buntuté.

₁₅Awit wong-wong sing pada nuntun bangsa iki kuwi tukang nasarké,

lan wong-wong sing dituntun kuwi dadi ketriwal.

₁₆Awit sangka kuwi GUSTI ora seneng bab para nom-nomané,

lan ora welas marang anak-anaké lola

lan marang para randané,

awit wong kuwi kabèh pada murtad lan nindakké penggawé ala,

lan saben tutuk semauré gemblung.

Senajan iki kabèh kelakon, nesu-Né durung mandek,

lan tangan-Né ijik dietungaké.

₁₇Awit duraka kuwi murup kaya geni

sing mangan eri lan suket nganti entèk,

terus ngobong kekayon ing alas,

nganti kemebulé pada mumbul.

₁₈Awit sangka nesuné GUSTI sing ngwasani langit lan bumi,

negara kuwi kobong,

lan bangsa kuwi dadi pangané geni;

ora ana wong siji-sijia sing melasi seduluré.

₁₉Pada ngemplok nengen, nanging ijik ngelih,

pada ngemplok ngiwa, nanging durung warek,

saben wong mangan dagingé kantyané:

₂₀Manasé mangan Efraim lan Efraim mangan Manasé,

lan bebarengan pada nglawan Yéhuda.

Senajan iki kabèh kelakon, nesuné durung mandek,

lan tangan-Né ijik dietungké.