Wulang Bebasan 10

₁Wulang bebasané Salomo,

Anak sing wityaksana ndadèkké bungahé bapaké,

nanging anak sing goblok kuwi nggawé kasusahané ibuné.

₂Banda, olèh-olèhé tumindak duraka kuwi ora maédahi,

nanging kabeneran kuwi nylametaké wong sangka pati.

₃GUSTI ora négakké wong bener ngalami kaliren,

nanging kepénginané wong duraka ditampik.

₄Tangan sing males ndadèkké mlarat,

nanging tangané wong sregep kuwi ndadèkké sugih.

₅Sapa sing nglumpukké ing waktu panas, kuwi pinter,

nanging sing turu waé ing waktu panèn, kuwi nggawé isin.

₆Berkah kuwi manggon ing sirahé wong bener,

nanging tutuké wong duraka kuwi ndelikké penggawé ala.

₇Pengéling-éling marang wong bener kuwi ngekèki berkah,

nanging jenengé wong duraka dadi bosok.

₈Sapa sing wityaksana ing ati, kuwi nggatèkké marang pepakon,

nanging sing bodo ing tetembungan, kuwi bakal tiba.

₉Sapa sing resik kelakuané kuwi tentrem mlakuné,

nanging sing nandangi mlintat-mlintut, bakal konangan.

₁₀Sapa sing kedèp-kedèp mripaté, kuwi nukulaké kasusahan,

nanging sing bodo ing tetembungan, kuwi bakal tiba.

₁₁Tutuké wong bener kuwi sumberé urip,

nanging tutuké wong duraka, kuwi ndelikké penggawé ala.

₁₂Sengit ndadèkké tukaran,

katrésnan nutupi sak kabèhé panerak.

₁₃Lambéné wong pinter kuwi ana kawityaksanané,

nanging gegeré wong tanpa pikiran kuwi dityepaki pentung.

₁₄Wong wityaksana kuwi nglumpukké kaweruh,

nanging tutuké wong bodo kuwi karusakan sing ngantyam.

₁₅Bandané wong sugih kuwi kanggo kutané sing kuwat,

nanging sing njalari karusakané wong mlarat kuwi kemlaratan.

₁₆Upahé penggawéné wong bener kuwi nuntun marang urip,

olèh-olèhé wong duraka kuwi nuntun marang dosa.

₁₇Sapa sing nampani piwulang nuju marang dalané urip,

nanging sing nglalèkké marang pamelèh kuwi kesasar.

₁₈Sapa sing ndelikké sengité kuwi goroh lambéné,

lan wong sing tukang ngèlèk-èlèk kuwi wong bodo.

₁₉Sing okèh gunemané kuwi mesti ana paneraké,

nanging sing ngendek lambéné kuwi kanggonan kepinteran.

₂₀Ilaté wong bener kuwi kaya slaka pilihan,

nanging pikirané wong duraka kuwi setitik ajiné.

₂₁Lambéné wong bener kuwi dadi pangoné wong okèh,

nanging wong bodo mati, awit tyupet pikirané.

₂₂Berkahé GUSTI kuwi sing nyugihké,

ora awit ditambahi karo rekasané déwé.

₂₃Sing dadi kabungahané wong bodo kuwi yèn nglakoni penggawé ala,

nanging wong pinter kuwi senengé yèn olèh kawityaksanan.

₂₄Wong duraka katekan apa sing disumelangké,

nanging wong bener bakal dikèki apa sing dikarepké.

₂₅Yèn katekan karo lésus, wong duraka entèk,

nanging wong bener kuwi dasaré langgeng.

₂₆Kaya tyukak kanggo untu lan kebul kanggo mripat,

ya mengkono kuwi wong males kanggo sing ngongkon.

₂₇Wedi lan ngajèni marang GUSTI kuwi ndawaké umur,

nanging taun-tauné wong duraka kuwi dityendekké.

₂₈Pengarep-arepé wong bener kuwi dadi kabungahan,

nanging pengarep-arepé wong duraka dadi tanpa guna.

₂₉Dalané GUSTI kuwi pengayoman kanggo wong sing jujur,

nanging kanggo wong sing nglakoni ala dadi karusakan.

₃₀Wong bener ora bakal diontang-antingké selawasé,

nanging wong duraka ora bakal manggon ing negara.

₃₁Tutuké wong bener ngetokké kawityaksanan,

nanging ilat rangkep kuwi diketok.

₃₂Lambéné wong bener weruh samubarang sing betyik,

nanging tutuké wong duraka mung nglairké sing ala.