Wulang Bebasan 11

₁Timbangan sing goroh kuwi disengiti karo GUSTI,

nanging watu timbangan sing tyotyok ndadèkké senengé Gusti.

₂Yèn kesombongan teka, pemoyok uga nututi,

nanging kawityaksanan manggon ing wong sing andap asor.

₃Wong sing jujur kuwi ketuntun karo katemenané,

nanging wong goroh kuwi dirusak karo ora bèrèsé.

₄Yèn bebendu teka, kasugihan ora migunani,

nanging kabeneran ngluwari sangka pati.

₅Dalané wong bener dirata karo kebenerané,

nanging wong duraka tiba awit sangka dosané.

₆Wong sing jujur ditulungi karo kebenerané,

nanging wong goroh kuwi kejiret karo hawa srakahé.

₇Pengarep-arepé wong duraka gagal waktu dina patiné,

nanging pengarep-arepé wong ala bakal tanpa guna.

₈Wong bener dietokké sangka kangèlan,

terus wong duraka sing nggentèni.

₉Wong duraka ngrusak sak pepadané karo tutuké,

nanging wong bener ditulungi karo kaweruhé.

₁₀Kabekjané wong bener, ndadèkké kabungahané wong sak kuta,

lan yèn wong duraka entèk, wong pada ramé surak-surak.

₁₁Berkahé wong jujur ndadèkké mekaré kuta,

nanging tutuké wong duraka njalari ambruké.

₁₂Sapa sing ngrèmèhké sak pepadané kuwi tanpa pikiran,

nanging wong sing pinter kuwi meneng waé.

₁₃Sapa sing nyatyat, kuwi mbukak perkara,

nanging wong setia nutupi perkara.

₁₄Yèn tanpa penggedéné, bangsa ambruk,

nanging yèn tukang rembuké okèh terus ana katentreman.

₁₅Sapa sing nanggung wong liyané sing durung dikenal, kuwi bakal sangsara banget,

nanging wong sing ora njukuk tanggung jawap, kuwi slamet.

₁₆Wong wadon sing apik atiné bakal kajèn,

mengkono wong sugih olèh kasugihan.

₁₇Wong sing welas ati mbetyiki awaké déwé,

nanging sing kereng kuwi nyiksa awaké déwé.

₁₈Wong duraka olèh gawé sing tanpa guna,

nanging sapa sing nyebar kabeneran olèh berkah sing tetep.

₁₉Sapa sing nggondèli kabeneran sing sejati kuwi nuju marang urip,

nanging sapa nguber sing ala kuwi marani pati.

₂₀Wong sing atiné lityik, kuwi ala ing ngarepé GUSTI,

nanging para wong sing tanpa tyiri, ndadèkké senengé Gusti.

₂₁Tenan, wong ala mesti nampa ukuman,

nanging turunané wong bener bakal ditulungi.

₂₂Kaya anting-anting emas ing tyongoré babi,

ya kaya mengkono kuwi wong wadon ayu sing ora wityaksana.

₂₃Pengarep-arepé wong bener nekakké kabekjan,

nanging pengarep-arepé wong duraka nekakké bebendu.

₂₄Ana sing ngawut-awut bandané, nanging mundak sugih,

lan ana sing medit banget, senajan mengkono tansah kekurangan.

₂₅Sapa sing kerep ngedum berkah, bakal nampani kalubèran,

sapa sing ngekèki ngombé, bakal diwènèhi ngombé.

₂₆Sapa sing ndelikké gandum, mesti dionèk-onèké karo wong

nanging wong sing ngedol gandum, sirahé bakal katekan berkah.

₂₇Sapa sing nggolèki kabetyikan, kuwi ngupaya supaya disenengi karo wong,

nanging sing ngarah marang sing ala, bakal katekan karo memala.

₂₈Sapa sing ngendelké marang kasugihané bakal ambruk,

nanging wong bener bakal semi kaya godong nom.

₂₉Sapa sing ngésruhké brayaté, bakal olèh angin,

wong bodo bakal dadi baturé wong wityaksana.

₃₀Upahé wong bener kuwi wit panguripan,

lan sapa sing wityaksana kuwi bisa narik atiné wong.

₃₁Yèn wong bener olèh balesan ing ndonya,

luwih menèh wong duraka lan wong dosa!