Masmur 103

Duh nyawaku, memujia marang GUSTI!

Hé! isiné batinku kabèh, memujia marang asmané sing sutyi!

₂Duh nyawaku, memujia marang GUSTI,

lan aja lali marang kabèh kabetyikané!

₃Panjenengané sing ngapura sak kabèhé kesalahanmu,

lan maraské sak kabèhé lelaramu.

₄Sing ngentasaké uripmu sangka kubur,

lan makutani kowé karo katrésnan lan kawelasan,

₅sing mareki kekarepanmu karo apa sing apik,

nganti kowé dienomké menèh kaya manuk garuda.

₆GUSTI ngekèki adil

lan sing bener marang kabèh wong sing dianiaya.

₇Gusti wis nduduhké dalan-dalané marang Moses,

lan penggawéan-penggawéan-Né marang wong Israèl.

₈GUSTI kuwi welas lan trésna,

gedé sabaré lan lubèr katrésnan-Né;

₉ora tansah nesoni,

enggoné nesu ora selawasé.

₁₀Sing ditindakké marang kita ora tanding karo dosa kita,

enggon-Né ngekèki balesan marang kita ora sak boboté karo kesalahan kita,

₁₁nanging sak pira duwuré langit ngungkuli bumi,

ya semono gedéné katrésnan-Né kanggo para wong sing ngabekti marang Panjenengané;

₁₂sak pira adohé wétan sangka kulon,

ya semono enggoné ngedohké panerak kita sangka kita.

₁₃Kaya bapak enggoné nduwé kawelasan marang anak-anaké,

ya kaya mengkono GUSTI enggoné ngekèki kawelasan

marang para wong sing ngajèni Panjenengané.

₁₄Awit Panjenengané ngerti kita kuwi sangka apa,

lan éling yèn kita iki lebu.

₁₅Nanging manungsa kuwi dina-dinané kaya suket,

kaya kembang ing ara-ara, kaya mengkono enggoné ngembang;

₁₆yèn keterak angin, terus wis ora ana,

tilas panggonané wis ora kenal marang dèwèké menèh.

₁₇Nanging katrésnané GUSTI,

kuwi wiwit ing kelanggengan, nganti tekan ing kelanggengan, kanggo para wong sing ngabekti marang Panjenengané,

uga keadilané kanggo para anak putuné,

₁₈kanggo para wong sing pada nyekel perjanjian-Né

lan sing éling nindakké, angger-anggeré Gusti.

₁₉GUSTI wis nguwatké dampar-Ré ing swarga,

lan kraton-Né ngwasani samubarang kabèh.

₂₀Hé para mulékaté, para suradadu sing gagah sing nglakoni apa préntahé Gusti,

karo ngrungokké swarané tembungé,

pada memujia marang GUSTI.

₂₁Hé kabèh suradadu-Né lan abdi-Né sing nglakoni kekarepan-Né,

pada memujia marang GUSTI.

₂₂Hé kabèh sing digawé,

ing sak tanah pangwasan-Né,

pada memujia marang GUSTI!

Hé nyawaku, memujia marang GUSTI.