Masmur 105

₁Pada ngluhurké GUSTI, pada sebuten asmané,

penggawéan-Né pada kenalké ing antarané para bangsa!

₂Pada ngidunga kanggo Panjenengané, kidungna karo masmur;

sak kabèhé penggawéan-Né sing nggumunaké pada tyeritakna!

₃Pada gunggung-gunggungen asma-Né sing sutyi,

atiné para wong sing pada nggolèki GUSTI bèn pada bungah.

₄Pada nggolèkana GUSTI lan kekuwatan-Né,

pada tansah nggolèkana praupan-Né!

₅Pada ngélingana marang mujijat sing wis pada ditindak-Ké,

tanda-tanda mujijat lan keadilan sing diutyap-Ké,

₆hé para anak-putuné Abraham, abdiné,

hé para anaké Yakub, pilihan-Né!

₇Ya Panjenengané kuwi GUSTI, Gusti Allah kita,

keadilan-Né rata ing sak lumahé bumi.

₈Panjenengané éling karo perjanjiané nganti tekan sak lawas-lawasé,

ya kuwi pitutur-pitutur sing wis didawuh-Ké marang 1000 turunan,

₉sing wis ditalèni karo Abraham,

lan sumpah marang Isak;

₁₀sing ditetepaké dadi pernatan kanggo Yakub,

dadi perjanjian langgeng kanggo bangsa Israèl,

₁₁mengkéné tembungé Gusti: “Kowé bakal Tak wènèhi negara Kanaan,

dadi negara panduman sing ditemtokké kanggo kowé.”

₁₂Waktu tyatyahé durung sak piraa,

mung setitik, dadi wong mantya ing kono.

₁₃Lan pada nglembara sangka panggonané bangsa sing siji, menyang panggonané bangsa liyané,

sangka kraton sing siji menyang panggonané taleré bangsa liyané;

₁₄Panjenengané ora nglilani yèn nganti pada dianiaya karo sapa-sapa,

para ratu pada diukum awit sangka dèwèké kabèh;

₁₅tembungé: “Para sing Tak jebatani aja nganti kowé ngganggu-gawé,

lan aja nindakké sing ala marang para nabi-Ku!”

₁₆Waktu Panjenengané nekakké pailan ing negara kono,

lan sak kabèhé tandon pangan dientèkké,

₁₇terus ana wong sing diutus ndisiki dèwèké kabèh:

Yosèf sing didol dadi batur tukon.

₁₈Sikilé diketyèk,

guluné diranté karo wesi,

₁₉nganti tekan ing waktuné tembungé Gusti kelakon,

lan putusané GUSTI mbenerké dèwèké.

₂₀Ratu terus ngongkon ngluwari,

pangwasa para bangsa pada ngluwari dèwèké.

₂₁Terus didadèkké pemimpiné omahé,

lan ngwasani apa sak duwèké kabèh,

₂₂dililani ngwasani para penggedéné abdiné sak karepé piyambaké,

lan mulangi kawityaksanan marang para pinituwané.

₂₃Mengkono Israèl terus teka ing negara Egipte,

lan Yakub dadi wong mantya ing tanahé Ham.

₂₄Gusti Allah terus ndadèkké umaté tangkar-tumangkar,

didadèkké kuwat ngungkuli para mungsuhé;

₂₅atiné mungsuhé mau diwalik nganti pada sengit marang umaté Gusti Allah,

lan abdi-Né pada ditindes.

₂₆Gusti Allah terus ngutus Moses, abdi-Né,

lan imam Harun pilihan-Né.

₂₇Loro-loroné nganakké tanda-tanda-Ku ing tengahé,

lan mujijat ing tanah Ham.

₂₈Gusti nekakké peteng ndedet, nganti awan dadi peteng,

nanging pada mbangkang marang tembungé;

₂₉banyuné didadèk-Ké malih dadi getih,

lan iwak-iwaké pada dipatèni.

₃₀Kodok-kodok pada uyel-uyelan ing negarané,

malah nganti tekan ing kamar-kamaré ratuné.

₃₁Gusti Allah ngetokké tembung, terus katekan laler,

lan lemut-lemut ing sak tanahé kabèh;

₃₂Panjenengané nibakké udan ès dadi gantiné udan ing kono,

lan geni sing mulat-mulat ing negarané;

₃₃wit anggur lan anjir pada dirubuhké,

lan kabèh wit-witan ing panggonané disempali.

₃₄Gusti Allah ngetokké tembung, terus ana walang,

lan kuwi walang lumpatan sing tanpa itungan okèhé,

₃₅terus mangan sak kabèhé tetukulan ing negarané,

lan mangan pametuné lemahé.

₃₆Gusti matèni sak kabèhé anak mbarep ing negarané,

wohé kekuwatané sing wiwitan.

₃₇Umaté terus dituntun metu karo nggawa slaka lan emas,

lan tunggalé kabèh taleré ora ana sing kejengklok siji-sijia.

₃₈Waktu metuné wong Egipte pada bungah-bungah,

awit wong Egipte pada katekan wedi marang dèwèké kabèh.

₃₉Gusti Allah nggelarké mendung digawé mayungi umaté,

lan geni sing madangi ing wayah mbengi.

₄₀Para leluhuré pada ndedonga, Gusti Allah terus nekakké manuk gemak,

lan mareki umaté karo roti sangka langit.

₄₁Gusti mbengkahké watu, terus ana banyu mantyur,

sing mili kaya kali ing lemah garing.

₄₂Kuwi awit Panjenengané éling marang tembungé sing sutyi,

marang Abraham abdi-Né.

₄₃Gusti Allah nuntun umaté metu karo bungah-bungah,

lan pilihan-Né karo surak-surak.

₄₄Pada dikèki negarané para bangsa,

nganti pada nampa olèh-olèhé rekasané para bangsa,

₄₅supaya pada tetep nindakké pernatané Gusti Allah,

lan nggatèkké marang sak kabèhé piwulangé.

Haléluya!