Masmur 106

₁Haléluya!

Pada ngluhurna GUSTI, awit Panjenengané kuwi betyik!

katrésnan-Né kuwi langgeng sak lawasé.

₂Sapa sing bisa nyritakké penggawéané GUSTI sing ngidap-idapi,

lan ngabarké kabèh pujian marang Panjenengané?

₃Rahayu wong sing netepi angger-angger,

sing nindakké keadilan tekan selawas-lawasé.

₄Duh GUSTI, supaya Panjenengan élingi kula, awit sangka kawelasan-Mu marang umat Panjenengan,

Panjenengan supaya nggatèkké kula, awit keslametan sangka Panjenengan,

₅supaya kula bisaa weruh kabekjané para pilihan Panjenengan,

supaya kula mèlu bungah ing njeruhné kebungahané umat Panjenengan,

lan supaya bisa ngétokké panggunggung bareng karo umat duwèké Panjenengan piyambak.

₆Kita karo para leluhur kita, wis pada nandangi dosa,

kita wis pada kesalahan lan nandangi duraka.

₇Para leluhur kita waktu ing negara Egipte,

pada ora ngerti marang mujijaté Panjenengan,

pada ora éling marang gedéné kawelasan Panjenengan,

malah pada nglawan marang sing Mahaluhur,

ing pinggiré segara Abang.

₈Nanging pada ditulungi slamet karo Gusti Allah awit sangka asma-Né,

supaya pada ngerti marang kekuwatan-Né.

₉Segara Abang dinesoni nganti dadi asat,

para leluhur kita terus pada dilakokké ing segara gedé,

kaya liwat ing ara-ara samun.

₁₀Kaya mengkono enggoné pada diluwari sangka tangané wong sing sengit,

lan pada diluwari sangka tangané mungsuhé.

₁₁Mungsuhé pada ketutupan karo banyu,

ora ana sing kèri siji-sijia.

₁₂Waktu kuwi para leluhur Panjenengan terus pada ngandel marang pitutur-Mu,

lan ngidungké pamuji marang Panjenengané.

₁₃Nanging terus gelis lali marang penggawéan-Né,

lan ora ngentèni marang pituduhé;

₁₄pada ngumbar kekarepané ing segara wedi,

lan njajal marang Gusti Allah ing ara-ara samun.

₁₅Pada diuja kekarepané,

nanging awaké uga terus diganjar lelara nglayung.

₁₆Sakwisé mengkono pada mèri marang Moses ing tarupé,

lan marang imam Harun, abdiné GUSTI sing sutyi.

₁₇Bumi terus bengkah nguntal Datan,

lan nutupi grombolané Abiram.

₁₈Ana geni sing mulat-mulat ing tengahé grombolan mau,

lan urupé nggosongké para wong sing duraka kuwi.

₁₉Ing gunung Horeb pada nggawé retya pedèt,

lan sujut marang retya tyitakan;

₂₀pada ngijoli kamulyan-Né

karo ujut sapi lanang sing mangan suket.

₂₁Pada lali marang Gusti Allah Juruslameté,

sing wis nindakké perkara-perkara sing gedé ing negara Egipte;

₂₂penggawéan-penggawéan sing nggumunaké ing tanahé Ham,

penggawéan-penggawéan sing ngidap-idapi ing pinggiré segara Abang.

₂₃Mulané Gusti ngomong bakal matèni para leluhur kita,

yèn ora Moses pilihan-Né, nengahi ing ngarepé Gusti,

nyirep nesu-Né nganti Panjenengané ora sida ngentèkké para leluhur kita.

₂₄Para leluhur kita pada ngemohi negara sing apik kuwi,

pada ora ngandel marang pangandika-Né,

₂₅malah pada pating kedumel ing tarupé,

lan ora ngrungokké marang swarané GUSTI.

₂₆Mulané Gusti terus ngatyungké tangan-Né marang para leluhur kita,

arep pada dipatèni ing ara-ara samun,

₂₇lan turunané bakal pada dibuyaraké ing antarané para bangsa,

lan disebar ing negara-negara.

₂₈Uga pada rumaket marang Baal péor,

lan mangan kurban-kurban sing dibelèh kanggo wong mati.

₂₉Dadi pada nggawé nesuné atiné Gusti awit sangka penggawéné,

mulané pada katekan bebendu.

₃₀Pinéhas terus tandang nindakké pengadilan,

nganti bebenduné terus sirep.

₃₁Bab kuwi kepitung dadi penggawé betyik turun-temurun ing sak lawas-lawasé.

₃₂Ing sak tyedaké banyu ing Mériba,

para leluhur kita pada nggawé nesuné Gusti,

Moses terus katekan karo kangèlan,

awit sangka para leluhur kita,

₃₃awit para leluhur kita pada njalari nesuné Moses,

nganti Piyambaké ketrutyut enggoné ngomong.

₃₄Para bangsa pada ora dientèkké,

kaya sing wis dipréntahké karo GUSTI marang para leluhuré,

₃₅nanging pada dadi siji karo para bangsa mau,

lan niru pertingkahé,

₃₆brahalané pada disembah,

nganti dadi jiret kanggo para leluhuré.

₃₇Pada ngurbanké anak-anaké lanang,

lan anak-anaké wadon marang para roh-roh ala,

₃₈dadi pada ngutahké getihé wong sing ora salah,

ya kuwi getihé anaké lanang lan wadon,

sing pada dibelèh dadi sajèn marang brahalané wong Kanaan,

nganti negara kono terus reget awit sangka enggoné utang getih mau.

₃₉Pada najisaké awaké déwé karo pertingkahé kuwi,

lan pada laku bédang ing sak njeruhné penggawéné.

₄₀Mulané nesuné GUSTI mulat-mulat marang umaté,

lan serik marang bangsa duwèké piyambak kuwi,

₄₁terus pada dipasrahké ing tangané bangsa liyané,

terus ditelukaké karo wong sing pada nyengiti.

₄₂Pada ditindes-tindes karo mungsuhé,

terus teluk marang pangwasané.

₄₃Wis bola-bali enggoné pada dipitulungi karo Gusti Allah,

nanging pada nglawan waé karo rantyaman-rantyaman-Né,

pada kedelep ing sak njeruhné kesalahané.

₄₄Nanging Gusti Allah weruh kangèlané,

waktu krungu sambaté.

₄₅Panjenengané éling marang perjanjiané awit sangka para leluhur kita,

nganti getun awit sangka gedéné katrésnan-Né.

₄₆Pada dililani olèh kawelasan

sangka kabèh wong sing pada nyekel.

₄₇Duh GUSTI, Gusti Allah kita, kita supaya Panjenengan slametké,

kita pada klumpukna sangka antarané para bangsa,

supaya kita kabèh pada ngluhurké marang asma Panjenengan sing sutyi,

lan pada gedé ing ati karo pamuji marang Panjenengan.

₄₈Pinujia GUSTI, Gusti Allahé Israèl,

sangka kelanggengan tekan ing kelanggengan

lan umaté kabèh pada ngutyapké: “Amin”.

Haléluya!