Masmur 107

₁Pada pasraha maturkesuwun marang GUSTI, awit Panjenengané kuwi apik!

Awit katrésnan-Né kuwi langgeng ing selawasé.

₂Mengkono tembungé para wong sing pada ditebus karo GUSTI,

sing ditebus sangka pangwasané sing nggawé susah,

₃sing diklumpukké sangka negara-negara,

sangka negara wétan lan kulon,

sangka lor lan sangka kidul.

₄Ana wong sing pada nglembara ing ara-ara samun,

ora nemu dalan sing tekan ing kuta sing dienggoni karo wong.

₅Pada kaliren lan ngelak,

nyawané kesel banget.

₆Sak njeruhné kangèlané terus pada sambat marang GUSTI,

terus pada diluwari sangka sangsarané,

₇diduduhi dalan sing bener,

nganti terus tekan kuta sing dienggoni karo wong.

₈Wongé bèn pada maturkesuwun marang GUSTI,

awit sangka katrésnan-Né,

awit sangka mujijaté Gusti marang para anak-anaké manungsa,

₉awit Gusti gelem mareki nyawané wong sing ngelak,

lan nyawa sing kaliren diwarekaké karo kabetyikan.

₁₀Ana wong sing lungguh ing pepeteng sing peteng ndedet,

dikurung karo sangsara lan wesi.

₁₁Awit pada nglawan marang pepakoné Gusti Allah,

lan ngrèmèhké pituduhé sing Mahaluhur,

₁₂mulané ditelukaké atiné karo kasusahan,

pada kejlungup, ora ana sing nulungi.

₁₃Ing sak njeruhné kangèlané kuwi, bareng pada sambat marang GUSTI,

terus pada diluwari sangka kasangsarané,

₁₄diluwari sangka pepeteng sing peteng ndedet,

lan ranténé pada dipedoti.

₁₅Wong kuwi bèn pada ngluhurké marang GUSTI awit sangka katrésnan-Né,

lan mujijaté Gusti marang para anak-anaké manungsa;

₁₆awit Gusti wis gelem ngrusak lawang-lawang slaka,

lan nugeli slorok-sloroké wesi.

₁₇Ana wong sing pada ngalami lara awit sangka penggawéné dosa,

lan disiksa awit sangka kesalahané.

₁₈Wis pada jelèh marang sak rupané pangan,

lan wis pada tekan ing gapurané pati.

₁₉Ing sak njeruhné kasusahané terus pada sambat marang GUSTI,

terus pada diluwari sangka kasusahané.

₂₀Gusti ngekèki tembung lan terus pada diwaraské,

pada utyul sangka luwangé kubur.

₂₁Wong kuwi mau bèn pada maturkesuwun marang GUSTI, awit sangka katrésnan-Né,

lan awit sangka mujijaté Gusti marang para anak-anaké manungsa,

₂₂lan bèn pada masrahaké kurban maturkesuwun

lan nyritakké penggawéané Gusti Allah karo surak-surak.

₂₃Ana wong sing nyabrangi segara karo kapal,

sing nindakké dagang ing segara sing jembar,

₂₄pada weruh penggawéané GUSTI

lan mujijaté ing telengé segara.

₂₅Gusti ngomong lan nekakké lésus,

sing ngumbulké ombak-ombaké,

₂₆wongé pada mumbul tekan langit lan pada medun ing segara gedé,

nyawané remuk awit sangka tyilaka kuwi,

₂₇pada mumet lan senpoyongan kaya wong mendem,

lan entèk akalé.

₂₈Ing sak njeruhné kangèlané kuwi terus pada sambat marang GUSTI,

terus pada diluwari sangka kangèlané;

₂₉lesusé disirep

lan ombaké segara pada anteng.

₃₀Wong-wong mau pada bungah, awit kahanané kabèh wis tentrem,

lan terus dituntun menyang kuta sing disenengi.

₃₁Wong kuwi bèn pada masrahaké maturkesuwun marang GUSTI, awit sangka katrésnan-Né,

awit sangka mujijaté Gusti marang para anak-anaké manungsa.

₃₂Wong mau bèn pada ngluhurké Gusti ing pasamuané umat kuwi,

lan memuji marang Panjenengané ing kumpulané para pinituwa.

₃₃Kali-kali didadèkké ara-ara samun,

lan sumberé banyu didadèkké lemah bongkor,

₃₄negara subur didadèkké lemah asin,

sing mengkono kuwi awit sangka penggawé alané wong sing pada ngenggoni,

₃₅ara-ara samun didadèkké blumbang,

lan lemah bongkor didadèkké sumber banyu,

₃₆wong sing kaliren terus pada didèkèkké ing kono,

terus pada mbangun kuta sing dienggoni,

₃₇terus pada nyebar ing kebon lan nggawé kebon anggur,

sing ngetokké woh-wohan kanggo pametuné.

₃₈Nanging wong kuwi banget diberkahi karo Gusti, nganti terus banget enggoné tambah-tambah,

lan kéwan-kéwané pada didadèkké manak-manak.

₃₉Nanging terus suda-suda lan ngrekasa,

awit sangka pangwasané sangsara lan kasusahan.

₄₀Gusti terus ngesokké kewirangan marang para penggedéné,

pada didadèkké nglembara ing ara-ara samun, sing ora ana dalané.

₄₁Nanging wong mlarat pada dislametké supaya ora ditindes,

lan anak putuné pada ditangkar tumangkarké kaya kumpulan wedus kaé.

₄₂Para wong bener pada weruh terus pada bungah,

nanging kabèh sing ala pada mingkem.

₄₃Sapa wong sing wityaksana? Kuwi betyik gondèlana marang perkara kuwi kabèh,

lan gatèkna marang katrésnané GUSTI.