Masmur 108

₂Ati kula wis mantep, duh Gusti Allah,

kula bakal ngidung, kula bakal ngidungké masmur.

Tangia, hé! nyawaku.

₃Hé harep lan siter pada tangia!

ésuk wétan arep tak gugah.

₄Kula arep ngluhurké Panjenengan ing sak tengahé para bangsa, duh GUSTI

lan arep ngidungké masmur kanggo Panjenengan ing kumpulané para taleré bangsa;

₅awit kawelasan Panjenengan kuwi gedéné ngungkuli langit,

lan kasetian Panjenengan nganti sundul mendung.

₆Duh Gusti Allah, Panjenengan supaya ngluhurké Panjenengan piyambak nganti ngungkuli langit,

lan kamulyan Panjenengan supaya ngungkuli bumi kabèh.

₇Supaya para katrésnan-Mu pada bisa utyul;

supaya Panjenengan ngekèki keslametan karo tangan tengen-Mu,

lan nyauri marang kula.

₈Gusti Allah wis ngetokké tembung ing griya sutyiné:

“Aku arep surak-surak;

negara Sikem bakal Tak dum-dum, legokan Sukot arep Tak ukur,

₉Giléad kuwi duwèk-Ku, Manasé kuwi duwèk-Ku,

Efraim kuwi kudungé sirah-Ku,

Yéhuda kuwi tekené kraton-Ku,

₁₀Moab kuwi panggonan kanggo wisuh-Ku,

Edom Tak untyali kasut-Ku,

lan awit sangka tanah Filistèn

Aku surak-surak.”

₁₁Sapa sing bakal nuntun aku mlebu ing kuta sing kuwat?

Sapa sing nuntun aku menyang tanah Edom?

₁₂Duh Gusti Allah, apa duduk Panjenengan piyambak sing wis nampik kita,

lan ora metu bareng karo bala kita, duh Gusti Allah?

₁₃Panjenengan supaya ngekèki pitulungan nglawan mungsuh,

awit pitulungané manungsa kuwi tanpa guna.

₁₄Awit sangka Gusti Allah, kita bakal pada nindakké penggawéan-penggawéan sing gagah lan gedé,

lan Gusti Allah piyambak bakal ngiles-ngiles para mungsuh kita.