Masmur 74

Duh Gusti Allah, kenèng apa sebabé Panjenengan ngguwak kita sak lawasé?

Kenèng apa sebabé bebendu Panjenengan sing mulat-mulat nekani wedus ingon-ingonané Gusti?

₂Panjenengan supaya gelem éling umat Panjenengan sing wis Panjenengan jikuk wiwit waktu mbiyèn,

sing Panjenengan tebus dadi bangsa duwèké Panjenengan piyambak,

lan supaya gelem éling marang gunung Sion kraton Panjenengan!

₃Panjenengan supaya gelem teka ing panggonan sing sak terusé rusak;

sak kabèhé wis dientèkké karo mungsuh ing griya sutyi.

₄Satru Panjenengan pada njenggong ing griya pamuji Panjenengan,

lan wis ngedekké gendérané digawé tenger.

₅Kétoké kaya wong sing ngangkat kampak nganti duwur,

diempakké marang kayu sing ketel,

₆lan saiki ukir-ukirané

pada ditibani karo kampak lan bérang kabèh;

₇griya Panjenengan sing sutyi diobong,

lan panggonan griyané asma Panjenengan dinajiské nganti tekan ing lemah;

₈pikirané atiné mengkéné: “Apiké pada tak entèkké kabèh waé!”

Terus griya pamuji ing sak kabèhé negara diobong kabèh.

₉Tanda kita ora ana sing kétok,

nabi ya wis ora ana menèh,

lan sedulur kita ora ana sing ngerti bakal nganti sak pira suwéné menèh.

₁₀Duh Gusti Allah, bakal nganti sak pira suwéné

anggèné satru kuwi nyepatani,

lan mungsuh anggèné ngèlèk-èlèkké asma Panjenengan tanpa mandek kuwi?

₁₁Kenèng apa Panjenengan nggèrèt mbalik tangan Panjenengan,

lan numpangké tangan Panjenengan sing tengen ing dada?

₁₂Nanging Panjenengan, duh Gusti Allah, dadi Ratu kula wiwit jaman mbiyèn mula,

sing ngekèki keslametan ing bumi.

₁₃Ya Panjenengan kuwi sing mbukak segara karo kekuwatan Panjenengan,

sing ngremuki endasé ula naga ing sak nduwuré banyu.

₁₄Panjenengan sing ngremuki endasé para Léwiatan,

Panjenengan pakakké marang kéwan galak ing ara-ara samun.

₁₅Panjenengan sing metyah sumber lan kali;

Panjenengan sing ngesatké kali-kali sing ajek mili.

₁₆Awan kuwi duwèké Panjenengan,

wengi kuwi uga duwèké Panjenengan,

Panjenengan sing mernahké pepadang lan srengéngé.

₁₇Panjenengan sing netepké watesé bumi kabèh,

waktu ketiga karo waktu rendeng Panjenengan sing nganakké.

₁₈Panjenengan supaya gelem éling kuwi: mungsuh nyepèlèkké, duh GUSTI,

bangsa sing keblinger kuwi ngèlèk-èlèkké asma Panjenengan.

₁₉Nyawané manuk dara Panjenengan aja nganti Panjenengan pakakké marang kéwan galak;

Panjenengan supaya aja nganti terus-terus lali marang nyawané para wong duwèké Panjenengan,

sing ditindes!

₂₀Panjenengan supaya éling marang perjanjian Panjenengan,

awit panggonané sing peteng ing bumi kuwi kebak susuh penggawé ala.

₂₁Wong sing disiya-siya aja nganti mulih karo kisinan.

Wong sing kasangsaran lan wong sing mlarat supaya pada ngelem-elem asma Panjenengan.

₂₂Duh Gusti Allah, Panjenengan supaya gelem ngadek lan nindakké pengadilan Panjenengan!

Supaya gelem éling marang wong sing nyepèlèkké para wong sing keblinger marang Panjenengan sedina muput kuwi.

₂₃Panjenengan supaya aja nganti lali marang swarané satru Panjenengan,

lan mbengok-mbengoké wong sing pada nglawan marang Panjenengan,

Tanpa mandek, malah mundak banter mbengoké kuwi.