Masmur 75

₂Kita pada ngidungké maturkesuwun marang Panjenengan, duh Gusti Allah, kita pada ngidungké maturkesuwun,

wong-wong sing nyebut asma Panjenengan

pada tyerita mujijat penggawéané Panjenengan.

₃“Yèn Aku netepaké waktuné,

Aku déwé sing bakal ngadili karo sing bener.

₄Bumi lan kabèh wong sak isiné pada lebur;

Aku, ya Aku déwé sing njejekké tyagak-tyagaké.” Sela

₅Aku ngomong marang para wong gemunggung: “Kowé aja pada gemunggung.”

Lan marang para wong duraka: “Kowé aja pada masang sungu!

₆Aja pada masang sungumu nganti duwur,

lan aja ngomong karo sombong!”

₇Awit kamulyan kuwi tekané ora sangka wétan utawa sangka kulon,

lan ya ora sangka ara-ara samun,

₈nanging Gusti Allah kuwi sing dadi Rèkter:

nglorot wong sing siji lan ngangkat sijiné.

₉Tangané GUSTI nyekel tuwung isi anggur sing muntuk,

kebak tyampuran bumbu;

Panjenengané terus ngiling sangka kono;

lah ampasé bakal disruput lan diombé

karo kabèh wong duraka ing bumi.

₁₀Nanging aku bakal surak-surak ing sak lawas-lawasé,

Gusti Allahé Yakub bakal tak puji karo masmur.

₁₁Kabèh sunguné para wong duraka bakal diremuk,

nanging sunguné wong bener kuwi bakal pada diduwurké.