Masmur 76

₂Gusti Allah kuwi kesuwur ing Yéhuda,

asmané kesuwur ing Israèl!

₃Tarupé wis ing Salèm,

lan griyané ing Sion!

₄Ing kono Gusti wis nugeli panah sing nggilap,

tamèng lan pedang lan gaman-gamané perang. Sela

₅Gemerlapé padang Panjenengan kuwi kwasané ngungkuli

pegunungan sing ana wiwit jaman mbiyèn.

₆Para wong kendel wis pada direbut,

pada ngantuk angles,

para suradadu kabèh wis pada kaya kélangan kekuwatané.

₇Duh Gusti Allahé Yakub, awit sangka bebendu Panjenengan,

jaran lan sing numpaki pada keturon.

₈Panjenengan kuwi ngidap-idapi!

Sapa sing tahan ing ngarepé Panjenengan

yèn Panjenengan nesu?

₉Panjenengan nibakké putusané pengadilan sangka langit;

bumi wedi lan kamitenggengen,

₁₀waktu Gusti Allah ngadek nggawa pengadilan,

lan ngluwari kabèh wong sing ditindes ing bumi. Sela

₁₁Tenan para wong brangasan terus bakal pada memuji marang asma Panjenengan,

turahané wong brangasan pada Panjenengan talèni.

₁₂Pada ngutyapna janji terus pada bayaren ngadep marang GUSTI Allahmu!

Kabèh wong ing ngarepé Gusti,

bèn pada masrahaké pisungsung marang Panjenengané sing diwedèni.

₁₃Panjenengané sing nglemeské semangaté para pemimpin,

Panjenengané sing ngidap-idapi kanggo para ratu ing bumi.