Masmur 77

₂Aku nyebut marang Gusti Allah karo swara banter,

karo swara banter marang Gusti Allah, supaya ngrungokké aku.

₃Ing dina kangèlan aku nggolèki Gusti;

ing wayah mbengi tanganku tak angkat,

lan ora dadi kesel,

nyawaku olèh panglipur.

₄Yèn aku ngangen-angen marang Gusti Allah, terus aku ngaduh-aduh,

yèn tak rasak-rasaké, nyawaku mundak dadi lemes. Sela

₅Panjenengan nggawé mripat kula tansah kelop-kelop;

kula semplak, nganti ora bisa omongan.

₆Kula mikir-mikir marang lelakonan waktu jaman mbiyèn;

kula kèlingan taun-taun sing wis kepungkur.

₇Ing wantyi wengi kula mikir-mikir njeruhné ati,

kula nggagas-nggagas lan nyawa kula nggolèk-nggolèk:

₈“Gusti apa ya nampik sak lawasé,

lan apa ora bakal ngekèki kawelasan menèh?

₉Katrésnan-Né apa wis entèk sak terusé,

perjanjiané apa wis tekan ing pungkasané nganti turun-temurun?

₁₀Gusti Allah apa wis lali marang sing ditrésnani,

kawelasan apa ditugel awit sangka bebenduné?” Sela

₁₁Ing kono tembungku: “Iki sing nyuduk atiku,

nanging tangané tengen sing Mahaluhur wis owah!”

₁₂Aku bakal ngéling-éling pengawèan-penggawèané GUSTI,

ya, kula bakal éling marang mujijat Panjenengan waktu jaman mbiyèn.

₁₃Kula bakal nyebut kabèh penggawéané Panjenengan,

lan bakal ngélingi marang sak kabèhé penggawéan Panjenengan.

₁₄Duh Gusti Allah, awit Panjenengan kuwi sutyi!

Gusti Allah sing ngendi sing gedé kaya Gusti Allah kita?

₁₅Panjenengan kuwi Gusti Allah sing nindakké mujijat;

Panjenengan wis ngétokké pangwasa Panjenengan ing kumpulané para bangsa.

₁₆Umat Panjenengan, tyedak turunané Yakub lan Yosèf,

wis Panjenengan tebus karo tangan Panjenengan. Sela

₁₇Duh Gusti Allah, banyu-banyu wis pada weruh Panjenengan,

banyu-banyu wis pada weruh Panjenengan lan pada gemeter,

malah segara gedé ya ndredek.

₁₈Mendung nggrojokké banyu,

ombaké swarané mendung werna-werna,

malah panah Panjenengan pada pating tylorot.

₁₉Swarané gluduk Panjenengan gembleger,

klélap-klélap pada madangi ndonya,

bumi gemeter lan gonjang-ganjing.

₂₀Awit Panjenengan ngliwati segara,

lan dalan Panjenengan ngliwati banyu sing amba,

nanging tlapak tilas Panjenengan ora kétok.

₂₁Panjenengan wis nuntun umat Panjenengan kaya nggiring wedus gèmbèl lan wedus,

lantaran Moses lan imam Harun.