Masmur 83

₂Duh Gusti Allah, Panjenengan supaya aja meneng,

aja mung mangku tangan, duh Gusti Allah!

₃Awit mungsuh Panjenengan pada gembruduk,

wong sing pada sengit marang Panjenengan pada kemetak,

₄pada ngrantyam tyara-tyara ala nglawan Panjenengan,

lan pada bebarengan bakal nglawan para sing Panjenengan ayomi.

₅Omongané mengkéné: “Hayuk kita pada ngentèkké bangsa kuwi

supaya jenengé Israèl ora katyeluk menèh!”

₆Tenan, wis pada bebarengan ngrantyam,

pada nggawé perjanjian nglawan Panjenengan:

₇Sing pada manggon ing tarupé bangsa Edom lan Ismaél,

bangsa Moab karo Hagar,

₈Gebal lan Amon lan Amalèk,

Filistèn bareng karo wong ing Tirus,

₉uga Asyur pada dadi siji karo wong-wong iki,

pada dadi tangan-sikilé taleré Lot. Sela

₁₀Kabèh kuwi pada dadèkna kaya bangsa Midian,

kaya Siséra lan Yabin ing tyedaké kali Kisyon,

₁₁sing wis pada dientèkké ing Endor,

pada dadi rabuké lemah.

₁₂Para penggedéné pada dadèkna kaya Orèb karo Seèb,

lan kabèh penggedéné kaya Sébah lan Salmuna,

₁₃sing pada omongan: “Hayuk pada ngenggoni

panggonané omahé Gusti Allah.”

₁₄Duh Gusti Allah kula, wong kuwi pada dadèkna kaya dedak sing mabul-mabul,

kaya kulit gabah sing kabur karo angin.

₁₅Kaya geni sing ngobong alas,

lan kaya urupé geni sing nggosongké gunung-gunung,

₁₆pada diuyaka karo lésusé Panjenengan,

lan dadèkna kagèt karo lésus Panjenengan.

₁₇Rainé pada kebuntela karo kisinan,

supaya pada nggolèki asma Panjenengan, duh GUSTI.

₁₈Ya bèn pada ngalami kisinan lan kagèt tekan sak lawasé,

pada kisinan lan terus pada entèk,

₁₉supaya pada weruh, yèn mung Panjenengan sing asma GUSTI,

sing Mahaluhur lan ngwasani ing sak lumahé bumi.