Masmur 84

₂Tenan anggèné nyenengké griya Panjenengan,

duh GUSTI sing ngwasani langit lan bumi!

₃Nyawa kula remuk awit kangen marang platarané GUSTI,

ati karo raga kula pada bungah-bungah

tumuju marang Gusti Allah sing urip.

₄Uga manuk tyilik wis olèh omah,

lan manuk sriti olèh susuh, kanggo nyèlèhké anaké,

ing mesbèh Panjenengan, duh GUSTI, sing ngwasani langit lan bumi,

Ratu kula lan Gusti Allah kula.

₅Rahayu wong sing pada manggon ing griya Panjenengan,

lan tansah ngluhurké asma Panjenengan. Sela

₆Rahayu wong sing kekuwatané ing Panjenengan,

sing nduwé karep bakal jiyarah.

₇Yèn mlaku ing legokan sing garing,

kuwi didadèkké panggonan sing ana sumberé;

tur dilubèri karo berkahé udan kaping pisan.

₈Mlakuné mundak suwé mundak kuwat,

bakal teka ing ngarepé Gusti Allah ing Sion.

₉Duh GUSTI, sing ngwasani langit lan bumi, Panjenengan supaya gelem ngrungokké pandonga kula,

supaya gelem ngrungokké kula, duh Gusti Allahé Yakub. Sela

₁₀Duh Gusti Allah, Panjenengan supaya gelem weruh tamèngé kita,

supaya gelem nyawang marang praupané sing Panjenengan jebati!

₁₁Ing plataran Panjenengan sedina

kuwi apiké ngliwati 1000 dina ing liya panggonan;

kula arep ngadek ing lawangé griyané Gusti Allah kula,

kuwi luwih apik tenimbang manggon ing tarupé wong duraka.

₁₂Awit Gusti Allah, GUSTI dadi srengéngéné lan tamèngé;

Panjenengané ngekèki kawelasan lan kamulyan;

Gusti ora ngendek samubarang sing betyik marang wong sing mlakuné tanpa tyiri.

₁₃GUSTI sing ngwasani langit lan bumi,

rahayu wong sing pertyaya marang Panjenengan.